Mơ̆ng hlăk dôk hriăm gưl 3, Hoàng Tiến Dũng mâo leh klei khăp čiăng hŏng bruă hưn mthâo mrâo mrang. Leh hriăm adŭ 13 ti thŭn 2002, hluê si klei hmăng hmưi mơ̆ng gŏ sang, ñu hluê hriăm gưl krah Quân lực sang hră gưl prŏng Trần Đại Nghĩa, leh jih hriăm dưi wĭt mă bruă ti knơ̆ng gĭt gai lĭng kahan wăl krah Ƀuôn Hồ. Ti anôk bruă, kyua mâo klei khăp ktang phĭt hŏng klei hưn mthâo mrâo mrang, ñu mâo gưl dlông mkŏ mjing klei găl hriăm lập trình ti sang hră gưl prŏng Khoa học Tự nhiên ƀuôn prŏng Hồ Chí Minh. Hriăm jih hrŏ hră tŭ yap êdah êdi, Hoàng Tiến Dũng kčưm bi lar dŭm klei hriăm leh anăn klei thâo hlăm bruă knuă. Knŏng hlăm 4 thŭn, ñu dưi čih dua phần mềm kriê dlăng leh anăn sa klei kčĕ kliêng mnah phao yua hlăm dŭm mta phao AK. Thiếu tá Hoàng Tiến Dũng brei thâo:

“Phần mềm anei đru kriê dlăng mnuih ƀuôn sang hlăm ênuk thŭn nao mŭt kahan, kriê dlăng hlei pô bi klă jing phung mkăp, hnơ̆ng 1, hnơ̆ng 1, đru kơ phung knuă druh ngă bruă ruah mă kahan hluê ngă dŭm hnơ̆ng čuăn thơ̆ng kơ bruă”.

Amâodjŏ knŏng khăp kơ bruă čih phần mềm, Thiếu tá Hoàng Tiến Dũng lŏ hur har mbĭt hŏng phung ƀĭng hgŭm ksiêm duah mkŏ mjing dŭm hdră êlan yua phao leh anăn dŭm mta phao ktuang đru mprăp kơ klei kdơ̆ng mblah. Akŏ thŭn anei, ñu mbĭt hŏng Trung tá Phạm Văn Đông – khua kčĕ bruă knơ̆ng gĭt gai lĭng kahan wăl krah Ƀuôn Hồ, ksiêm dlăng čih mkra kdrăp dưn yua “Mkin êlan mnah lu bruă” hlăng đĭng kliêng phao AK leh anăn phao AR-15. Hŏng klei mkra mjing anei mâo knơ̆ng gĭt gai lĭng kahan wăl kran Ƀuôn Hồ, knơ̆ng gĭt gai lĭng kahan čar Dak Lak bi klă leh anăn srăng dưi ba yua hlăm wưng kơ anăp. Trung tá Phạm Văn Đông brei thâo:

“Bi hŏng klei kčĕ mơ̆ng kâo jing kñăm kơ hdră êlan ksiêm dlăng êlan mnah phao ti yang hruê ăt msĕ mơh hlăm mmăt mlam hŏng cảm biến klei mngačm bi hŏng Dũng jing si srăng dưi mă rup anôk mnah leh anăn mơĭt hlăm đĭng blŭ. Dua mta phŭn anei bi mguôp jing klei kčĕ “Mklin êlan mnha lu tĭng” leh anăn ară anei kâo mbĭt hŏng Dũng dưi bi mklin, leh anăn ksiêm duah mkŏ mjing tŭ jing mnơ̆ng dhơ̆ng anăn”.

Hluê si Thượng tá Tống Văn Quang – Khua bruă kđi čar Knơ̆ng gĭt gai lĭng Kahan wăl krah Ƀuôn Hồ, dŭm thŭn êgao, êpul êya knuă druh lĭng kahan mơ̆ng anôk bruă mtrŭt mđĭ nanao bruă hluê ngă dŭm mta phŭn, hdră mtô bi hriăm bruă kđi čar, mtô mjuăt hdră bhiăn, mkŏ mjing kơ phung knuă druh, đảng viên bi klă, ƀuăn hluê hriăm hluê si gru mngač Hồ Chí Minh, bi myuôm ai tiê čŏng pô hlăm bruă ksiêm duah dưn kyua klei kreh knhâo mrâo mrang hlăm bruă klam mprăp kơ klei kdơ̆ng mblah…mơ̆ng anăn lŏ mâo lu hĭn phung êdah êdi hlăm dŭm mta bruă, hlăm anăn êdah hĭn jing thiếu tá Hoàng Tiến Dũng hŏng dŭm phần mềm “kriê dlăng phao ktuang” leh anăn “Kriê dlăng mnuih ƀuôn sang nao kahan”…dŭm phần mềm anei dưi ba yua kluôm hlăm boh sĭt, đru mđĭ hnơ̆ng tŭ dưn hlăm bruă răng mgang lăn čar. Thượng tá Tống Văn Quang, bi klă kơ thiếu tá Hoàng Tiến Dũng:

“4 thŭn đrông Dũng jing Đảng viên dưi bi leh djăp bruă klam mơ̆ng anôk bruă, bi kơ dŭm klei kčĕ mơ̆ng ñu mâo Phŭn bruă lĭng kahan, wăl kahan 5 leh anăn knơ̆ng gĭt gai lĭng kahan čar Dak Lak mđup brei hră pah mni. Dŭm Phần mêm kriê dlăng mnuih ƀuôn sang nao kahan leh anăn klei kčĕ mơ̆ng ñu dưi ba yua kluôm hlăm ară anei leh anăn dŭm thŭn kơ anăp”.

Giăm 20 thŭn bi mguôp hŏng Knơ̆ng gĭt gai lĭng kahan wăl krah Ƀuôn Hồ Hoàng Tiến Dũng dưi čih mkra lu phần mềm leh anăn klei kčĕ đru kơ bruă mprăp kơ klei kdơ̆ng mblah tŭ dưn. Hŏng dŭm klei gĭr hlăm klei mă bruă knuă, ñu mâo dŭm gưl khua gĭt gai mđup brei mêđai yuôm bhăn. Ƀiădah hŏng ñu, klei pah mni yuôm bhăn hĭn jing klei khăp čiăng kơ gŏ sang leh anăn phung ƀĭng hgŭm. Anei srăng jing klei mđĭ ai čiăng kơ ñu lŏ dơ̆ng hluê hriăm, ksiêm duah, mkŏ mjing dŭm phần mềm tŭ dưn hĭn đru mguôp hluê ngă tŭ jing bruă klam răng mgang lăn čar hlăm wưng mrâo./.