Hluê klei hưn ti knăm anei, prăk čiăng rŭ mdơ̆ng 1.200 boh sang kơ gŏ sang ƀun hlăm alŭ wăl čar đăo tĭng truh hlăm brô 96 êklai prăk. 4 knơ̆ng prăk mâo Agribank, Vietcombank, Viettinbank lehanăn BIDV mđup brei 60 êklai prăk, ênoh adôk mâo êpul kahan ksiêm đru.

Nao lehanăn blŭ hrăm ti knăm anei, Thượng tướng Lương Tam Quang, K’iăng khua Phŭn bruă kahan ksiêm lač jăk kơ phung đru brei prăk kăk pŏk ngă hdră anei ti čar Dak Lak. Thượng tướng Lương Tam Quang bi mni kơ êpul kahan ksiêm čar lehanăn bruă sang čư̆ êa alŭ wăl hlăm wưng bhiâo dưi ngă leh 2 boh sang ba jao kơ 2 gŏ sang dleh dlan ti kdriêk Čư̆ Mgar lehanăn mtă kơ Anôk bruă kahan ksiêm čar Dak Lak, dŭm êpul ngă bruă brei pŏk ngă mđrăm mbĭt hdră rŭ mdơ̆ng 1.198 boh sang adôk, rơ̆ng hnơ̆ng tŭ jăk lehanăn ngă leh êlâo kơ hruê 31/10 thŭn anei./.