Klei đuĕ nao kơ "Điện Biên Phủ - lăn êa êpa mhao" mâo bruă êdam êra gưl dlông hlăk ai CS Hồ Chí Minh mkŏ mjing mơ̆ng hrue anei 24/4 - 27/4/2024 hŏng lu bruă nao čuă, mđup brei mnơ̆ng kơ dŭm gŏ sang phung kahan hđăp, hdơrr knga mđĭ ai găp djuê kahan hđăp Điện Biên, gŏ sang mnuih mâo bruă tŭ dưn hŏng cách mạng, Amĭ Việt Nam jhŏng ktang, čuh brui mngưi bi hdơr kơ phung êngiă asei. Aguah anei, ti knhuah gru hƀuê ênuk gơ̆ng hla čhiăm gru Hà Nội, mkŏ mjing leh knăm đuĕ nao kơ “Điện Biên Phủ - Lăn êa êpa mhao”.

Hlăm bruă anei mâo 3 êlan mphŭn đuĕ nao ti dŭm čar, ƀuôn prŏng, lehanăn bi kčah bi tuôm ti ƀuôn prŏng Điện Biên Phủ, čar Điện Biên hlăm hrue 26/4 tinăp. Bruă anei ti anôk găn, phung bi ala srăng weh čuh brui mngưi ti dŭm anôk jing alŭ wăl knhuah gru hƀuê ênuk, nao čuă, mđup brei mnơ̆ng kơ gŏ êsei mnuih mâo bruă tŭ dưn hŏng các mạng, gŏ ếei knŭk kna dlăng ba, bi leh lehanăn mđup brei anôk bruă mơ̆ng hlăk ai kơ dŭm gŏ êsei, hđeh hriăm hră dleh dlan. Jih jang ênoh đru kơ čar Điện Biên lehanăn dŭm alŭ wăl ktuê êlan nao mơ̆ng êpul jing êbeh 7,6 êklai prăk./.