Leh 3 hruê mă bruă hŏng lu mta yuôm bhăn, boh nik hdră bruă knuă druh, hluê hdră mă bruă, hruê anei 23/5, Anôk bruă kƀĭn ala mŭt hlăm hruê mă bruă tal 4 mơ̆ng Klei bi kƀĭn tal 7, Anôk bruă kƀĭn ala gưl XV hŏng hdră bi trông ti êpul mă bruă. Tĭng dlăng boh tŭ hluê ngă hdră kčah mđĭ kyar bruă duh mkra – ala ƀuôn lehanăn ngăn prăk knŭk kna thŭn 2023, bruă hluê ngă hdră kčah mđĭ kyar bruă duh mkra – ala ƀuôn lehanăn ngăn prăk knŭk kna thŭn 2024. Aguah, phung bi ala bi trông ti êpul hŏng bruă hluê ngă klei mkiêt mkriêm, bi kdơ̆ng hŏng klei bi liê thŭn 2023; Boh tŭ hluê ngă dŭm mta kñăm ala čar kơ klei mtăp mđơr êkei mniê thŭn 2023.

Tlam, Anôk bruă kƀĭn ala bi trông ti Sang bi kƀĭn prŏng kơ boh tŭ ksiêm dlăng bruă msir mghaih klei akâo čiăng mơ̆ng mnuih ƀuôn sang ba m’ĭt kơ Klei bi kƀĭn tal 6, Anôk bruă kƀĭn ala gưl XV; phung khua hlăm knŭk kna lehanăn dŭm anôk bruă, mnuih djŏ tuôm hlak mblang, bi mklă dŭm bruă phung bi ala hưn mdah./.