14 thŭn gưl tal êlâo hluê ama nao kơ êa ksĭm na mă kan hdang ti anôk trah mă Hoàng Sa, pô mă kan hdang Nguyễn Lợi, ti kdriêk Plao ksĭ Lý Sơn, čar Quảng Ngãi dưi ƀuh leh wăl prŏng prĭn mơ̆ng êa ksĭ, mơ̆ng klei mơak êjai mâo mă kan hdang, klei msĭn mơ̆ng dŭm aruăt êa hŏ hang…Êbeh 40 thŭn lŏ čuê bruă ama, dôk mbĭt hŏng kŭm păn, hŏng êa ksĭ. Nguyễn Lợi lač, mmông lu hĭn jing duh ƀơ̆ng ti êa ksĭ, wĭt ti êa ksĭ kơh klă klơ̆ng jing wĭt ti ƀuôn sang”.

Plao ksĭ Hoàng Sa, Trường Sa jing mơ̆ng Việt Nam, kyuanăn khă dleh dlan kâo ăt srăng nao, nao mđĭ kyar bruă duh mkra, răng mgang klei dưi kiă kriê êa ksĭ plao ksĭ. Kâo gĭr kpưn hluê êa ksĭ čiăng kơ ana čô êdei anăp diñu kpưn mbĭt hŏng pô”.

Grăp čô mă kan hdang Lý Sơn, mơ̆ng hruê k’kiêng thâo klă Hoàng Sa jing krĭng ksĭ mâo dŭm gưl ayŏng ama tuh kđeh êrah, jing leh mnuih Lý Sơn srăng mâo bruă klam răng kriê. Pô mă kan hdang Nguyễn Ngọc Khánh ti Quảng Bình ăt mâo klei mĭn, nao ti êa ksĭ amâodjŏ knŏng duh ƀơ̆ng, ƀiădah lŏ jing bruă klam răng mgang klei dưi kiă kriê yuôm bhăn mơ̆ng lăn čar:

Hmei mă bruă ti êa ksĭ mơ̆ng sui leh, ară anei lŏ jing bruă klam, mơak êdi čiăng đru răng mgang êa ksĭ, plao ksĭ lăn čar drei.

Bi hŏng grăp čô mă kan hdang ăt msĕ mơh hŏng grăp čô mnuih ƀuôn sang Việt Nam, Hoàng Sa, Trường Sa jing krĭng lăn Việt Nam mơ̆ng đưm đă lă êlâo, jing sa kdrêč mơ̆ng aduôn aê lui kơ anak čô, jing anôk nao truh mơ̆ng mnuih ƀuôn sang hlăm dum êtuh thŭn êgao.

Nai prĭn Luật Trần Công Trục, khua kiă kriê hđăp êpul bruă knông lăn mơ̆ng knŭk kna brei thâo: Klei bi klă hƀuê ênuk, hdră bhiăn kơ klei dưi kiă kriê mơ̆ng Việt Nam hŏng 2 plao ksĭ anei dưi mâo leh anăn dôk mâo lu ala čar, êpul êya tar rŏng lăn leh anăn phung kreh knhâo bi klă: Việt Nam jing ala čar tal êlâo hlăm hƀuê eneuk mâo klei dưi kiă kriê hŏng knŭk kna ti 2 plao ksĭ Hoàng Sa leh anăn Trường Sa yap mơ̆ng dua plao ksĭ anei ka mâo pô, ƀiă êdi mơ̆ng ênuk gưl 17 êjai ka mơ̆ng hlăm klei kiă kriê mơ̆ng sa lăn čar, truh kơ Hoàng Sa mâo dŭm êpul lĭng kahan China plah mmiă hruê 19/1/1974. Klei kiă kriê leh anăn hluê ngă klei dưi kiă kriê mơ̆ng Việt Nam ti 2 plao ksĭ anei jing klă nik, jêñ jêñ, êđăp ênang, găl guôp hŏng hdră bhiăn kiă kriê leh mơ̆ng hdră bhiăn tar rŏng lăn.

Hdră bhiăn Việt Nam hluê si klei kiă kriê klă sĭt, drei bi klă hŏng tar rŏng lăn knŭk kna Việt Nam jing ala čar tal êlâo kiă kriê, Việt Nam mâo ênŭm mnơ̆ng bi klă hƀuê ênuk, tur knơ̆ng hdră bhiăn mâo boh tŭ čiăng bi klă. Drei mă mmông kruăk knăl jing ti krah ênuk gưl 16, akŏ ênuk gưl 17.

Hŏng grăp čô mnuih ƀuôn sang Việt Nam, klei dưi kiă kriê leh anăn kluôm dhuôm lăn čar jing klei myưng mơang leh anăn amâo mâo dưi čhuak. Kyuanăn, êjai mâo arăng plah mmiă klei dưi kiă kriê, lĭng kahan leh anăn mnuih ƀuôn sang dreibi kgŭ krŭ kdơ̆ng, răng mgang knông lăn ala čar. Hluê Trung tướng Nguyễn Ngọc Tương, Khua hđăp bruă kđi čar Anôk bruă bi hriăm bruă lĭng kahan: Krŭ kdơ̆ng răng mgang klei dưi kiă kriê êa ksĭ, plao ksĭ jing boh klei yuôm bhăn, sui, kyuanăn klei mĭn mbĭt jing “Ktang phĭt, gĭr ktưn”, “Kjăp hlăm hdră bhiăn, mbruă hlăm hdră êlan” dŭm mta dôk hlăm hdră bhiăn srăng krơ̆ng kjăp, dŭm mta dôk hlăm klei êngiê, klei dưi kiă kriê, kluôm dhuôm lăn čar amâo mâo klei jang, ƀiădah srăng mâo hdră êlan djŏ guôp, rơ̆ng kjăp klei dưi kiă kriê êa ksĭ, plao ksĭ ƀiădah srăng rơ̆ng kjăp klei hơĭt bruă kđi čar, răng mgang wăl êđăp ênang čiăng mđĭ kyar lăn čar.

Đảng drei bi myuôm nanao bruă klam răng mgang kjăp klei dưi kiă kriê, kluôm dhuôm lăn čar ƀiădah srăng rơ̆ng kjăp wăl êđăp ênang, hơĭt kjăp čiăng mđĭ kyar lăn čar. Klei anei bi êdau klă hlăm hră mơar klei kƀĭn Kluôm tal 13 mơ̆ng Đảng mrâo êgao. Boh klei mkăn mâo Đảng mñă ktang jing bruă răng mgang klei dưi kiă kriê plao ksĭ, êa ksĭ, jing bruă mơ̆ng Đảng, jih jang mnuih ƀuôn sang, lĭng kahan leh anăn srăng bi lar ai ktang mơ̆ng jih jang, hlăm anăn mă êpul lĭng kahan yang ƀuôn jing kmeh gơ̆ng…Jih jang dŭm boh klei anăn jing yuôm bhăn sơnăk hŏng sa ala čar mâo êa ksĭ msĕ hŏng drei, mbĭt anăn ñu găl guôp hŏng hdră tă mbĭt mơ̆ng tar rŏng lăn ară anei.

Đảng, knŭk kna leh anăn mnuih ƀuôn sang sa ai hŏng hdră êlan: “Việt Nam gĭr ktưn, ktang phĭt răng mgang klei dưi kiă kriê lăn čar, êa ksĭ, plao ksĭ hluê si hdră bhiăn tar rŏng lăn”. Iêo mthưr ai ktang mơ̆ng jih jang, mkŏ mjing hdră êlan răng mgang lăn čar hlăm jih jang mnuih ƀuôn sang, răng mgang êa ksĭ, plao ksĭ hlăm wưng êgao jing leh khil mgang kjăp čiăng hlăm plao ksĭ, êa ksĭ klei dưi kiă kriê mơ̆ng lăn čar./.