Ti anôk bi tuôm, dua Khua knŭk kna mñă, klei bi mjĕ jăk siam, klei hgŭm mguôp lehanăn hgŭm bruă kluôm Việt Nam – Lao lŏ dơ̆ng đĭ kyar kjăp lehanăn tŭ dưn hlăm djăp mta bruă hlăm wưng êgao. Bi hgŭm bruă duh mkra, mnia mblei, duh bi liê dưi mtrŭt mđĭ lehanăn mâo lu klei bi mlih jăk siam. Bruă mnia mblei dua nah hlăm 3 mlan gưl 1 thŭn 2024 mâo 476,8 êklăk USD, đĭ 12% mkă hŏng wưng anei thŭn 2023. Hdră bi hgŭm hlăm bruă mjuăt bi hriăm, bruă dhar kreh, kreh knhâo, kdrăp mrâo, hiu čhưn ênguê lehanăn mjĕ mjuk mnuih ƀuôn sang… dưi mtrŭt mđĭ hluê hdră mđĭ boh tŭ dưn lehanăn hnơ̆ng tŭ jăk. Ƀri gưl anei, dua Khua knŭk kna bi trông leh kơ hdră msir kñăm pŏk ngă tŭ dưn dŭm klei kuôl kă gưl dlông lehanăn boh tŭ mơ̆ng Klei bi kƀĭn tal 46 Dhar bruă mlir knŭk kna Việt Nam – Lao. Dua tĭng tŭ ư mđĭ hdră bi hgŭm dua hdră duh mkra, boh nik kơ klei bhiăn, bruă ngăn prăk, bruă êlan klông nah gŭ, bruă pui kmlă, dăng kông, hâo hưn êlan kbưi, bruă hiu čhưn ênguê, bi đru mkŏ mkra hdră duh mkra hnŭk êngiê, ngă phŭn mil pô mguôp hŏng hdră ñŭ kma êlam hlăm tar rŏng lăn, klă sĭt lehanăn ba wĭt boh tŭ dưn.

Dua khua knŭk kna tŭ ư lŏ dơ̆ng bi hgŭm kjăp, sa ai ti dŭm anôk bi kƀĭn trông hlăm krĭng lehanăn tar rŏng lăn msĕ si ASEAN. Êpul hgŭm lu ala čar lehanăn dŭm klei bhiăn krĭng krông Mekông. Khua knŭk kna Phạm Minh Chính mñă kơ Việt Nam lŏ dơ̆ng sa ai lehanăn đru kơ Lao hluê ngă tŭ dưn dŭm bruă klam prŏng hlăm thŭn 2024, hlăm anăn mâo bruă klam ngă Khua kiă kriê ASEAN./.