Hlăm klei blŭ hrăm, Khua knŭk kna Phạm Minh Chính mñă klă hdră êlan mơ̆ng Việt Nam jing bi myuôm bruă mtrŭt mđĭ klei mjĕ giăm bi hgŭm kluôm dhuôm hŏng Belanda. Dua tĭng tŭ ư bi mguôp mtrŭt mjhar klei nao čuă gưl knŭk kna Việt Nam mơ̆ng Mtao leh anăn mô̆ mta Belanda hlăm wưng kơ anăp, lŏ dơ̆ng pai mă klei găl mơ̆ng klei kuôl kă mnia mblei êngiê Việt Nam – EU (EVFTA), gĭr ba hnơ̆ng mnia mblei dua tĭng mâo 15 êklai dolar Mi hlăm wưng kơ anăp.

Dua tĭng ăt bi trông kơ đa đa boh klei hlăm alŭ wăl leh anăn tar rŏng lăn dôk bi mđing. Bi kơ boh klei ksĭ Ngŏ, dua čô Khua knŭk kna mñă klă klei yuôm bhăn mơ̆ng bruă răng mgang klei êđăp ênang, klei êngiê bruă dŭ mdiăng leh anăn mgaih msir klei amâo thâo bi djŏ hŏng hdră bhiăn tar rŏng lăn, boh nik jing Unclos 1982.