Aguah 25/6 (hlue si mmông alŭ wăl) ti Đại Liên, China, Khua knŭk kna Phạm Minh Chính mâo leh klei blŭ hrăm hlăm Knăm mphŭn pŏk kluôm Klei bi kƀĭn grăp thŭn dŭm phung ba anăp tal 15 mơ̆ng Klei bi kƀĭn bruă duh mkra dlông rŏng lăn ti Đại Liên (WEF Đại Liên) mbĭt hŏng Khua knŭk kna China Lý Cường, Khua mil čhil Balan Andrzej Duda, Khua Klei bi kƀĭn bruă duh mkra dlông rŏng lăn Klaus Schwab.

Khua knŭk kna Phạm Minh Chính bi mni kơ bruă ba anăp mơ̆ng bruă duh mkra China hŏng klei đĭ kyar bruă duh mkra kluôm rŏng lăn. Jing ala čar riêng gah jĕ giăm, “mlir čư̆, mlir êa krông”, hrăm mbĭt mkŏ mjing “Êpul êya bi đru êdei anăp Việt Nam - China jing yuôm bhăn”, Việt Nam hơ̆k mơak ti anăp klei đĭ kyar mơ̆ng China. Việt Nam đăo knang China lŏ dơ̆ng mđĭ lar bruă klam, mđĭ boh kdrŭt đĭ kyar mrâo, mđĭ ktang klei mĭn lu tĭng, mđĭ klei bi hgŭm lu ala čar, răng kriê wăl hdĭp mda êđăp ênang, hơĭt kjăp, bi hgŭm, đĭ kyar mdrŏng sah ti krĭng wăl leh anăn dlông rŏng lăn. Sa bruă duh mkra China ktang, ñŭ kma êlam srăng ba klei hmăi jăk kơ bruă duh mkra dlông rŏng lăn.