Tlam 26/9 hlue si mmông alŭ wăl, Knăm drông klă sĭt Khua gĭt gai Đảng, Khua lăn čar Tô Lâm leh anăn mô̆ ñu hŏng êpul bi ala gưl dlông Việt Nam nao čhưn gưl Knŭk kna ti ala čar Cuba mkŏ mjing leh kdrưh kơăm ti Sang krŭ kdơ̆ng ti ƀuôn prŏng phŭn La Habana. Leh knăm drông, Khua gĭt gai Đảng, Khua lăn čar Tô Lâm hŏng Khua gĭt gai Đảng tal sa, Khua ala čar Cuba Miguel Diaz-Canel Bermudez ngă khua êpul bi ala gưl dlông dua ala čar mâo klei bi trông. Dua khua gĭt gai mñă klă klei msĕ dua ala čar kơ hƀuê ênuk, hdră êlan truh kơ yang ƀuôn ngă phŭn leh anăn klei bi hgŭm kjăp mâo Khua gĭt gai Hồ Chí Minh leh anăn Khua gĭt gai Fidel Castro mkŏ mjing. Đua khua gĭt gai bi mklă lŏ dơ̆ng mđĭ kyar ktang klei bi hgŭm, boh nik klei bi hgŭm kluôm Việt Nam – Cuba đĭ sa hnơ̆ng mrâo, tŭ dưn leh anăn kjăp hĭn. Dua khua gĭt gai tŭ ư bi hgŭm mkŏ mjing jăk Klei bi trông hlak mblang tal VI plah wah dua Đảng leh anăn Klei bi trông kreh knhâo lu ala čar tal II kơ hnơ̆ng trah dlăng krŭ kdơ̆ng mơ̆ng Khua gĭt gai Hồ Chí Minh leh anăn Khua gĭt gai Cuba Fidel Castro leh anăn bruă bi hgŭm mkăn hlăm wưng kơ anăp.

Hlăm klei bi trông, Khua gĭt gai Đảng, Khua lăn čar Tô Lâm hưn hŏng Khua dlăng bruă Đảng tal sa, Khua lăn čar Miguel Díaz-Canel Bermúdez kơ bruă Đảng, Knŭk kna leh anăn mnuih ƀuôn sang Việt Nam mđup brei kơ mnuih ƀuôn sang Cuba 10 êbâo ton braih; Êpul hgŭm mnuih mă bruă Việt Nam mđup brei Anôk bruă kơ phung mă bruă Cuba leh anăn dŭm alŭ wăl Việt Nam ăt mđup brei kơ mnuih ƀuôn sang Cuba dŭm mta mnơ̆ng.

Tlam  26/9 mmông alŭ wăl, Khua gĭt gai Đảng, Khua lăn čar Tô Lâm bi tuôm leh hŏng Khua bruă kƀĭn ala knŭk kna yang ƀuôn Cuba Esteban Lazo Hérnandez