Aguah 4/6, Khua knŭk kna Phạm Minh Chính gĭt gai klei bi kƀĭn Knŭk kna grăp gưl mlan 5/2025 ti Anôk bruă Knŭk kna. Klei hưn mdah brei ƀuh bruă duh mkra kluôm hơĭt kjăp, klei prăk luč ênoh dưi ktuê dlăng, lu ênoh mrô đĭ kyar jăk mkă hŏng mlan êlâo leh anăn hŏng wưng anei thŭn 2024.

Klah čŭn klei bi kƀĭn, Khua knŭk kna mñă klă: Boh klei duh mkra- ala ƀuôn lŏ dơ̆ng mâo klei bi knăl jăk, mlan êdei jăk hĭn kơ mlan êlâo, 5 mlan akŏ thŭn jăk hĭn hŏng wưng anei thŭn dih. Khua knŭk kna mtă kƀĭn hlăm 11 êpul bruă klam phŭn, hlăm anăn mñă klă ruh mgaih klei bhiăn jing phŭn. Klei bhiăn jing klei găl bi ktưn prŏng hĭn, brei mkra mđĭ ktang, amâo kyua hlei pô mkăn ƀiădah jing kyua mnuih ƀuôn sang leh anăn djuê ana. Khua knŭk kna gĭt gai ngă tŭ dưn Hdră ngă bruă pŏk ngă “êpul pă bruă phŭn” mơ̆ng phŭn bruă kđi čar, pral mdrơ̆ng hŏng hdră êlan jia mơ̆ng Mi, lŏ dơ̆ng mkra mlih hră mơar knŭk kna, bi mlih mrô leh anăn bi khuăt êpul mă bruă, mjing tur đĭ kyar kjăp kơ lăn čar.