
Hlăm klei bi kƀĭn kluôm mơ̆ng Klei bi kƀĭn gưl dlông kơ êa ksĭ mơ̆ng Êpul hgŭm lu ala čar tal 3 (UNOC 3), mkŏ mjing ti Prăng, Khua knŭk kna Phạm Minh Chính mâo leh klei blŭ hrăm yuôm bhăn bi ala kơ 10 ala čar Êpul hgŭm dŭm ala čar Ngŏ Dhŭng Asi (ASEAN), mbĭt anăn bi kah mbha klei mĭn mơ̆ng Việt Nam kơ klei răng mgang leh anăn yua hơĭt kjăp êa ksĭ leh anăn mnơ̆ng dhơ̆ng hlăm êa ksĭ. Khua knŭk kna iêô mthưr êpul êya lu ala čar brei ngă bruă pral hĭn, ktang hĭn, jih ai tiê hĭn leh anăn brei mâo klei hrăm mbĭt mơ̆ng dŭm ala čar, krĭng wăl leh anăn kluôm rŏng lăn hlăm bruă răng mgang leh anăn yua hơĭt kjăp êa ksĭ.

Khua knŭk kna kčĕ 4 klei mđing mâo: mđĭ lar klei êđăp ênang, bi hgŭm hlăm êa ksĭ; mđĭ kriê dlăng êa ksĭ kjăp; dlăng êa ksĭ jing boh kdrŭt mđĭ kyar; leh anăn mđĭ klei bi hgŭm kluôm kơ hdră kñăm kjăp. Ñu ăt bi mklă hnơ̆ng yuôm bhăn mơ̆ng Klei kuôl kă Êpul hgŭm lu ala čar kơ Hdră bhiăn êa ksĭ thŭn 1982 msĕ si klei bhiăn tur knơ̆ng kriê dlăng êa ksĭ. Khua knŭk kna hưn mdah hdră tă: bi mguôp kreh knhâo hŏng boh sĭt djuê ana, mđĭ kdrăp mrâo leh anăn mlih mrô, yua jih hnơ̆ng klei găl bruă duh mkra êa ksĭ, bi hgŭm hŏng lu bruă, mkŏ mlir ala čar, leh anăn mđĭ klei bi hgŭm lu ala čar. Việt Nam ƀuăn rơ̆ng ngă bruă ktang, kluôm čiăng ngă hdră kñăm, hŏng ai tiê “3 klei mprăp: pŏk ngă hdră êlan mđĭ kyar bruă duh mkra mtah, mđĭ klei bi hgŭm kluôm rŏng lăn, leh anăn ba anăp hlăm dŭm klei mĭn răng mgang êa ksĭ.
Viết bình luận