Amai Pi Năng Thị R En, ti să Khánh Trung, kdriêk Khánh Vĩnh jing sa klei bi klă kơ klei yăl dliê tlaih ƀun ti krĭng mnuih djuê ƀiă ti čar Khánh Hoà. Gŏ sang amei tuôm dôk hlăm sang tĭ ƀrôč, grăp blư̆ hjan prŏng nao đuĕ hĕ anôk mkăn. Kyua mâo hdră êlan đru rŭ mdơ̆ng sang dôk kjăp, amai R En ară anei mâo leh anôk dôk êđăp ênang.

“Amâo knŭk kna đru rŭ mdơ̆ng sang kjăp, amâo mâo lŏ mâo klei tĭ ƀrôč leh anăn hjan sač. Gŏ sang amâo guôn lŏ nao kơup hjan ti sang amĭ ôh. Gŏ sang kâo ăt lŏ lĭng čan čiăng mkra sa tlô. Mâo hdră knŭk kna đru kơ hdră duh ƀơ̆ng, hmei srăng lŏ gĭr rông mnơ̆ng, mă bruă knuă, êdei dih mâo klei hdĭp hơĭt hĭn. Kâo dưi rông êmô mơ̆ng 2 drei jing 10 drei”.

Čar Khánh Hoà mâo êbeh 82.000 čô mnuih djuê ƀiă, lu hĭn jing djuê ana Raglai, bi kƀĭn ti 2 kdriêk Khánh Sơn leh anăn Khánh Vĩnh. 4 thŭn êgao, Êpul gơ̆ng bruă ƀuôn sang čar Khánh Hoà ba mdah 15 hdră mtrŭn, bruă sang čư̆ êa čar ba mdah 33 klei bi klă, 10 hdră êlan leh anăn lu hră mơar gĭt gai, hluê ngă hdră đru kơ mnuih ƀuôn sang krĭng čư̆ čiăng. Hlăm anăn, čar mâo leh dŭm hdră mtrŭn brei kơ alŭ wăl yua ngăn prăk leh anăn ngăn prăk djŏ hdră bhiăn čiăng đru kơ dua kdriêk Khánh Sơn leh anăn Khánh Vĩnh.

Hlăm klei ngă hdră, čar jêñ jêñ mkŏ mjing, ksiêm dlăng ti dŭm alŭ wăl čiăng hmao ruh mgaih klei dleh dlan, mtrŭt bi pral klei ngă hdră. Wưng thŭn 2021 – 2025, ênoh prăk ngă hdră mâo êbeh 790 êklai prăk, hlăm anăn 85% mơ̆ng ngăn prăk gưl dlông. Ară anei hnư hrui wĭt kah knar grăp čô mnuih djuê ƀiă đĭ 2 blư̆ mkă hŏng thŭn 2020, mâo êbeh 30 êklăk prăk sa čô hlăm sa thŭn, gŏ êsei ƀun hrŏ 7,2% hlăm sa thŭn. Čar dưi msir hlăm 1.130 boh sang dôk êjai, sang ti ƀrôč, mkra mđĭ dŭm êtuh anôk bruă ƀuôn sang.

 Truh kơ ară anei, 100% ênoh să mâo êlan oto truh kơ wăl krah, jih jang gŏ sang dưi yua pui kmlă leh anăn êa doh. Võ Nam Thắng, khua knơ̆ng bruă djuê ana leh anăn klei đăo čar Khánh Hòa brei thâo, hdră êlan đru rŭ mdơ̆ng sang mrâo leh anăn mđĭ kyar hdră duh ƀơ̆ng đru kơ mnuih ƀuôn sang bi hơĭt klei hdĭp, tlaih ƀun hơĭt kjăp.

Hmei mkŏ mjing êpul phung mâo kơhưm nao hgŭm hlăm dŭm sang măi hlăm leh anăn êngao čar čiăng mđĭ ai dưi hâo hưn. Mbĭt anăn bi mguôp hŏng sang hră kđi čar bi mbŏ klei hriăm klei blŭ mnuih djuê ƀiă kơ knuă druh kmeh gơ̆ng ti 2 kdriêk Khánh Sơn, Khánh Vĩnh leh anăn đa đa alŭ wăl, knơ̆ng dhar bruă. Hmei mđĭ hĭn klei hriăm mjuăt kơ knuă druh gĭt gai čiăng đru kơ diñu thâo klă leh anăn ngă hdră ala čar kñăm ti nah gŭ”.

Mrâo anei, 2 kdriêk Čư̆ čiăng Khánh Sơn leh anăn Khánh Vĩnh mâo Khua knŭk kna tŭ yap tlaih ƀun. Hdră mtrŭn mơ̆ng Phŭn bruă kđi čar dưi nao hlăm klei hdĭp đru mđĭ klei thâo săng, mkŏ mjing klei mlih kơ klei mĭn đĭ kyar mơ̆ng mnuih ƀuôn sang čư̆ čhiăng. Mơ̆ng klei čang guôn, lu hŏ sang dưi kpưn đĭ, jhŏng bi mlih ana pla mjing, mđĭ kyar bruă mkra mjing. Lu klei bi hmô mkra mjing bruă lŏ hma doh, mnơ̆ng dhơ̆ng OCOP, krĭng pla mjing VietGAP, Klei bi hmô đang war, êpul hgŭm bruă mta mrâo…dôk ƀrư̆ ƀrư̆ mkŏ mjing leh anăn pŏk mlar.

Bùi Hoài Nam, Khua bruă Đảng kdriêk Khánh Sơn brei thâo: truh kơ ară anei, dŭm alŭ wăl krĭng mnuih djuê ƀiă leh anăn čư̆ čhiăng hlăm čar dưi mkŏ mjing dŭm krĭng mkra mjing msĕ si krĭng pla mjing durian ti Khánh Sơn 2.900ha.

“Kdriêk Khánh Sơn tlaih ƀun, ƀiădah dŭm klei bi hmô đru mkra mjing, mđĭ kyar bruă duh mkra dưi bi myuôm hluê hdră hơĭt kjăp. Kdriêk Khánh Sơn dôk mlih mơ̆ng ana pla mjing hđăh jing mjeh mâo boh mâo ênoh, hnơ̆ng tŭ jăk. Hmei dôk mđing truh hnơ̆ng gŏ sang mnuih djuê ƀiă mdrŏng, thâo mâo đĭ lu”.

Mkăp lu ai dưi mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 – 2025, čar Khánh Hoà dưi mkŏ mjing krĭng čư̆ čhiăng đĭ kyar, hơĭt kjăp, jiă kma knhuah gru. Dŭm hdră êlan amâo djŏ knŏng đru kơ 2 kdriêk čư̆ čhiăng tlaih ƀun, ƀiădah lŏ jing boh kdrŭt mđĭ kyar wưng sui, mkŏ mjing krĭng boh kdrŭt mrâo, đru bi sĭt mta kñăm mđĭ kyar kluôm dhuôm čar Khánh Hoà truh thŭn 2030, hdră tă truh thŭn 2045.

Nghiêm Xuân Thành, Khua bruă Đảng čar Khánh Hoà mnă hlăm wưng kơ anăp, dŭm alŭ wăl čiăng kñăm ngă jăk bruă duh bi liê klei kreh knhâo, kdrăp mrâo čiăng mkŏ mjing klei kdlưn hĭn mrâo:

“Čiăng bi mrâo mrang bruă lŏ hma, dưm yua klei hưn mthâo mrâo mrang, klei mlih mrô. Boh klei anei bruă sang čư̆ êa srăng nao hgŭm. Anei jing klei duh bi liê thâo mĭn, brei kơ diñu grăn wah, grăp čô mnuih ƀuôn sang dleh êdi kơ boh klei anei. Mta kñăm jing mđĭ ênoh hlăm sa ênhă lăn. Čuăl mkă srăng ngă jăk. Êngao kơ durian čiăng lŏ pla thiăm ana pla mjing mkăn, rơ̆ng kơ mnuih ƀuôn sang mâo klei hdĭp hơĭt”.