Anom bơwih ƀong hrŏm să Ea Tân, tơring glông Krông Năng, tơring čar Dak Lak hơmâo 220 boh sang anŏ pơlir pla kơphê đơ đam rơbêh 330 ektar. Ơi Nguyễn Trí Thắng, khua anom bơwih ƀong hrŏm brơi thâo, kiăng đĭ tui rơnoh bơwih ƀong huă kiăng pơlir hơbit bơwih ƀong tui kual đang hmua pơprong kiăng pla ƀiă prăk tuh pơ alin, pơjing rai gơnam hiam hơdjă lăp djơ̆ hăng hơdôm hơnong pơkă, tơlơi tŭ yap mơng jar kmar:

“Nua blơi pơhrui mơng anom bơwih ƀong hrŏm lêng kơ đĭ ƀiă pơhmu hăng pơkŏn hăng anom bơwih ƀong hrŏm ăt djru brơi ƀing ding kơna kơ boh thâo uă pơkra hăng anom bruă blơi pơhrui kơphê hiam hơdjă đĭ nua ƀiă. Tơdơi kơ 4-5 thun lu ding kơna hơmâo pơplih tơlơi hơdip mơda hăng yôm hloh lĕ hơđong bơwih ƀong huă”.

Pơtrut kơtang pơlir hơbit bơwih ƀong huă, blơi pơhrui gơnam tam pơjing rai hơdôm anih pơlir sĭ mơdrô gơnam tam hiam hơdjă lĕ hơdră bruă mơ̆ kông ti TNHH sa ding kơna sĭ hăng blơi mut mơng tač rơngiao 2-9 Dak Lak (Simexco DakLak) hơmâo tơlơi truh kih amăng anih anom sĭ mơdrô. Mut hrŏm amăng bruă pơlir hơbit, mơnuih ngă hmua hơmâo anom bruă tuh pơ alin pơjeh phun pla, gơnam yua gah ngă hmua kiăng hơđong bruă pla pơjing hăng blơi pơhrui gơnam tam hăng nua hơđong. Ơi Lê Đức Huy, Khua kông ti Simexco Dak Lak brơi thâo, yua pơlir hơbit, anom bơwih ƀong sĭ mơdrô gơnam đang hmua pioh uă pơkra hiam hơdjă.

“Hăng tơlơi gơgrong hăng tơlơi thâo hluh mơng mơnuih ngă hmua hăng mơnuih ngă hmua jing ƀing ngă hrŏm. Mơnuih ngă hmua jing ƀing bơwih ƀong sĭ mơdrô gơnam đang hmua. Lơm thâo hluh tui anun mơnuih ngă hmua ngă tui klă biă mă. Anai lĕ atur kjăp phik kiăng hơdôm boh kông ti ba gơnam ngă hmua mơng gơñu ba sĭ mơdrô amăng rŏng lŏn tơnah”.

Đơ đam tơring čar Dak Lak ră anai hơmâo rơbêh 470 anom bơwih ƀong hrŏm glăk ngă bruă gah ngă hmua, amăng anun, hơmâo giăm 150 anom bơwih ƀong hrŏm mut hrŏm pơlir hơbit pơkra pơjing gơnam. Ơi Huỳnh Bài, Khua khul pơlir anom bơwih ƀong hrŏm tơring čar Dak Lak brơi thâo: Lu hloh hơdôm anih pơlir hơbit glăk đing nao hơdôm gơnam phun anun lĕ kơphê, tiu, braih pơdai, boh troh…Bruă pơlir hơbit glăk ƀơƀrư̆ pơsir hĭ bruă ngă raih daih, đơđet, ba bruă pla pơjing tui pơƀut, djơ̆ hăng tơlơi rơkâo.

“Ƀơƀrư̆ tŭ mă hăng rơnoh anai kiăng anăp nao črâo ba anom bơwih ƀong hrŏm kah hăng hơdôm boh sang anŏ pơlir hơbit hăng anom bơwih ƀong sĭ mơdrô tui hơdră hơđong kjăp kiăng pơhlôm djơ̆ tơlơi pơkă pla pơjing kah hăng gơnam hiam hơdjă”.

Tui ơi Nguyễn Hoài Dương, Khua gơnong bruă ngă hmua hăng pơđĭ kyar ngă hmua tơring čar Dak Lak, amăng hrơi mông nua gơnam đang hmua ƀu pơdơi đĭ trun, bruă kơtưn pơlir hơbit amăng bruă ngă hmua jing tơlơi kiăng ngă. Gơnong bruă ngă hmua glăk iâu pơthưr tuh pơ alin pơjing rơnoh pơlir hơbit amăng pla pơjing blơi pơhrui gơnam tam, sit biă ñu lĕ hăng hăng djop gơnam phun pla phun mơng tơring čar.

“Pơđĭ kyar hơdôm kual pla pơjing pơƀut, ngă tui tơlơi gal mơng rĭm boh kual kiăng pơtrut bơwih ƀong tui hơbô̆ bruă pơlir hơbit ngă hrŏm pơhưč lu anom bruă tuh pơ alin ƀơi hơdôm kual ngă hmua ƀon lan kiăng pơlir gum hrŏm blơi pơhrui gơnam tam hăng sit biă ñu lĕ pơtrut pơkra pơjing gơnam đang hmua, kyâo pơtâo pơjing rai gơnam nua yôm hăng blơi pơhrui gơnam đang hmua hơđong brơi mơnuih ƀôn sang”.

Hăng tơlơi mut hrŏm mơng mơnuih ngă hmua, anom bơwih ƀong hrŏm, anom bơwih ƀong sĭ mơdrô hăng gong gai ƀon lan, lu hơbô̆ bruă pơlir hơbit bơwih ƀong ƀơi Dak Lak ba glăi tŭ yua. Anai ƀu djơ̆ jing boh than ba glăi brơi kơ bruă pơhlôm hơđong sĭ mơdrô đôč ôh ăt atur kiăng hrưn đĭ nua gơnam. Bruă pơlir kjăp kơplah wah mơnuih ngă hmua, anom bơwih ƀong hrŏm hăng anom bơwih ƀong sĭ mơdrô ƀu djơ̆ pơjing rai bruă pơđĭ kyar bơkơnar amăng rơnoh gơnam đôč ôh mơ̆ ăt lĕ bruă kiăng bruă ngă hmua găn rơgao hơdôm tơlơi lông mơng anih anom sĭ mơdrô, anăp nao sa gơnong bruă ngă hmua hơđong kjăp./.