Lơ 5/2, Kông ty pơčruh ngăn Banana Brothers Farm, tơring glông Mdrak, tơring čar Dak Lak hơmâo ngă yang pơphun bruă ba nao sĭ mơdrô  5 kntainer truh 100 tơn pơtơi ba nao pơ dêh čar Khač hăng Hàn Quốc. Yă Lê Thị Mỹ Hạnh, Khua kông ty brơi thâo, thun hlâo, kông ty hơmâo ba sĭ rơbêh 10.000 tơn pơtơi pơ dêh čar Hàn Quốc, Khač, Japan hăng Mông Cổ....Thun anai, kông ty pok prong năng ai 500 ha kiăng pơđĭ tui rơnoh pơtơi pioh ba sĭ hăng lông lăng amăng anih anom sĭ mơdrô phrâo:

“Amăng thun 2025, ƀing gơmơi čang rơmang biă mă pok pơhư prong đang hmua pla pơtơi phrâo hăng pơđĭ tui rơnoh pơtơi pioh sĭ mơdrô dưi truh pơ mơnuih ƀôn sang blơi yua lu hloh, yua kơ anŏ kiăng mơ̆ng mơnuih ƀong pơtơi jai hrơi lu tui”.

Hăng kong ty mơnuih ƀôn sang ngă pô Ban Me Green Farm, plơi prong Ƀuôn Ma Thuột, tơring čar Dak Lak, mơ̆ng akŏ thun  2025, hơmâo kĭ hră hơdor pioh hăng ngă hrŏm hăng bơnah ngă hrŏm pơgiăng nao 100 kông congtainer boh sầu riêng, dưm dưm hăng 2.700 črek sơ̆l boh sầu riêng laih lôk giong dưm amăng măi pơrơ-ot pioh sĭ mơdrô pơ dêh čar tač rơngiao. Ơi Nguyễn Văn Công, khua kông ty brơi thâo:

“Thun 2025 hơmâo lu tơlơi mưn čang rơmang hiam klă, lu bơnah sĭ mơdrô hơmâo kĭ hră blơi gơnam ba tơbiă blung a mơ̆ng sang hơjai dưm gơnam laih anun kông ty  hơmâo pok pơhai bruă mă ngă hrŏm pok pơhư prong sang dưm gơnam jing hơjai pioh pơkra ming gum hrŏm hăng lu anih”.

Sa tơlơi pơhing mơak pơkŏn amăng bruă sĭ mơdrô hăng tač rơngiao boh troh đang hmua ƀơi Dak Lak lĕ pơkra ming tơpung kơphê jơman hloh, kơphê pơkra hiam phara hơmâo jar kmar đing rai laih. Hrŏm hăng pơkra ming tơpung kơphê, asar kơphê krô ba sĭ, lu mơta gơnam sĭ mơdrô pơkra ming mơ̆ng tơpung kơphê lŭk ƀâo mơnâo jơman hloh hơmâo pơtong rơđah kơnuih hiam kơphê, mơnâo ƀâo bơngưi, ia kơphê mơñum jơman truh pơ lu dêh čar, kual lŏn amăng rŏng lŏn tơnah. Amăng anun, hơmâo anih anom sĭ mơdrô tơnap hăng ruah biă mă samơ̆ anih prong kah hăng Mi, Japan, Hàn Quốc, kual Mi kô̆ dưi ba truh laih soh....Ơi Lê Đình Tư, Khua kông ty sa ding kơna Minodo Farm Care, plơi prong Ƀuôn Ma Thuột, lăi lĕ: thun 2025 ăt lu tơlơi čang rơmang kơ sa thun hrưn ƀudah tơpưn nao pơ ataih hloh gơnam tam boh troh đang hmua Dak Lak, tơdah dưi tuh pơ alin, đing nao djơ̆ hơdră.

“Hơdôm anom bruă pơkra ming gơnam sĭ mơdrô tong ten hăng tơpung kơphê hiam jơman hloh, blung hlâo lĕ khom djru ba jơlan hơdră tơlơi phiăn či ngă bruă. Dua lĕ prăk kăk kiăng blơi pơblih gơnam yua mă bruă phrâo hăng ia rơgơi, bruă hyu pôr pơthâo marketing, hyu pơdah gơnam amăng mông jơnum pơdă sang čơ jar kmar, rơnoh prăk tuh pơ alin lu, hơmâo tơlơi djru ba mơ̆ng kơnuk kơna gơnong dlông truh pơ tơring čar kah dưi”.

Ơi Nguyễn Hoài Dương, Khua Gơnong bruă ngă hmua hăng pơđĭ kyar plơi pla tơring čar Dak Lak, brơi thâo: thun 2025, tơring čar ăt pơtum ngă bruă pơđĭ tui boh tŭ yua gơnam đang hmua, kiăng ngă djơ̆ tơhnal pơkă ba sĭ mơdrô pơ dêh čar tač rơngiao.

“Ƀing gơmơi đing nao biă mă hăng ngă gêh găl brơi djop sang bruă sĭ mwodrô pơkra ming gơnam sĭ mơdrô hiam klă hloh, hơmâo hră pơsit, hơmâo gru anăn rơđah rơđong laih anun dưi pơhno hăng lu gơnam amăng anih anom sĭ mơdrô prong. Biă mă ñu anih anom sĭ mơdrô kiăng gơnam hiam, hơdjă rơgoh jai hrơi ruah biă mă. Anun lĕ atur pơkă gơnam tam pioh pơđĭ tui rơnoh sĭ mơdrô boh troh đang hmua ƀơi Dak Lak lăi pha, kual Dap Kơdư hnun mơ̆n”.

Hăng anŏ gêh găl prong hăng tơlơi gir run ƀu pơdơi ôh mơ̆ng anom bruă sĭ mơdrô, tơlơi čang rơmang nao amăng thun 2025, boh troh đang hmua ƀơi tơring čar Dak Lak ăt pơđĭ tui boh tŭ yua hiam, djă anăn gru kơnăl klă, pok prong anih anom sĭ mơdrô pơ tač rơngiao, kiăng ba glăi boh tơhnal phrâo tŭ yua. Tơlơi anai, djru pơgôp hrŏm bruă pơđĭ tui rơnoh pơhrui glăi kơ mơnuih ƀôn sang, sang bruă sĭ mơdrô hăng pơtrut bơwih ƀong huă mơnuih mơnam ƀơi tơring čar, anăp nao tơhnal pơkă pơđĭ tui rơnoh pơhrui glăi abih bang truh dua mrô pơ anăp anai.