Hơdôm hrơi jê̆ hăng anai, ƀơi tơring čar Dak Lak hmâo hơdôm tal hơjan ƀu djơ̆ bơyan. Hơjan amăng hơdôm hrơi phun pla amăng bơyan bluh bơnga hơdai bôh ngă lu mơnuih bơngot amra bơdjơ̆ nao mrô hơdai bôh hăng anô̆ klă ñu, biă ñu lĕ phun kơphê hăng sầu riêng – hơdôm djuai phun pla ba jơlan hlâo ba glăi lu prăk ƀơi anai. Ƀơi anăp tơlơi ayuh hyiăng ƀu hơđong ră anai, gơnong bruă đang hmua tơring čar Dak Lak pơtă hơdôm bôh tơring glông, plơi prong hăng mơnuih ƀôn sang lăng tui đang hmua, gơgrong hlâo hơdôm gơnam mă yua, kơmok pruai djuai pơjeh pioh bong glăi hăng tal hơjan ngă bơdjơ̆ nao phun pla.

Hăng đang kơphê, sầu riêng glăk bluh bơnga, hơdai bôh đing nao pơgang hlôm hlâo sa dua kơman pơčrăm kah hăng ngă khiă hla, eh akan ƀong, wăng wil mriah. Ră anai, hơdôm bôh ƀirô wai lăng gah bruă anai prăp lui pơtô ba mơnuih ƀôn sang hơdôm bruă ngă đang tui bôh thâo phrâo kiăng bŏng glăi hăng hơjan ngă sui hrơi, pioh plai ƀiă bơdjơ̆ nao mrô hơdai bôh hăng anô̆ klă mơ̆ng bôh ñu./.