Hơdôm hrơi anai, ƀơi hmua3 hektar či plơi thôn 10,să HòaPhú, plơi prong Ƀuôn Ma Thuột, rơkơi bơnai Hoàng Văn Hồng hrŏm hăng hơdôm čô ngă kông ñơn dŏ ƀư̆ pơkra glăi ƀep puih ia añĕ hăng pơkơjăp glăi gong gơgrong ba đing bruih ƀơi phun pơtơi  hlăk boh tha ngơnguč hơgăl khŏp lăng hiam biă mă. Ñu brơi thâo sang anŏ gơñu pơblih đơ đam lŏn pla añăm pơtam hăng pla mơtor ba pla pơtơi soh mơ̆ng akŏ thun 2021. Phun pơtơi gơñu hơmâo ba glăi boh tŭ yua lu samơ̆ bruă răk rem wai lăng  huăi rơngiă lu hrơi mông đơi ôh.

"Thun anai, ƀing tuai blơi hlăk ĕp lăng tơl đang hăng ngă hră pơkôl blơi hlâo. Kâo him lăng prăk pơhrui glăi mơ̆ng bruă pla pơtơi ƀơi 3 hektar năng ai 1 klai prăk, lơ̆m sa hektar dưi pơhrui glăi 200 klăk prăk. Pla pơtơi dŏ djru pơkrem prăk jik rơ̆k hloh pơkă hăng pla kơtor hăng añăm pơtam. Hloh kơ anun dơ̆ng, pla pơtơi lĕ kơnong kiăng sa thun đôč dưi koh sĭ yơh, anun huăi rơngiă prăk tuh pơ alin kah hăng phun pla sui pơkŏn hrup tiu ƀudah boh ƀơr ôh”.

Ayong Đậu Văn Tuấn, dŏ ƀơi plơi thôn 5, să Hòa Phú, plơi prong Ƀuôn Ma Thuột, pơphun pla pơtơi mơ̆ng thun 2020. Hăng 5 hektar pla pơtơi ñu hơmâo pơhrui glăi hơđong, sang anŏ pok prong dơ̆ng đơ đam pla pơtơi lu hloh dua wơ̆t, lơ̆m hơmâo kĭ hră apah lŏn mơnuih ƀôn sang amăng kual pioh pla pơtơi.  Ayong Tuấn brơi thâo:

“Ƀơi kual lŏn Hòa Phú anai, ƀing gơmơi pla pơtơi pơjeh Thái Lan  along mơtam, hơmâo mă pơjeh mơ̆ng Ba Vì, tơring čar Hà Tây hơđăp. Kiăng pơtơi đĭ hiam tañ hăng boh lu,gơmơi ruah mă hơdôm anah pơtơi hiam, ba pla. Phun pơtơi pơjeh Thái Lan ñu gêh găl biă mă hăng lŏn mơnai glai klô, ayuh hyiăng pơ Dak Lak, yua kơ anun phun pơtơi pơ anai đĭ hiam boh klă”.

Ơi Nguyễn Văn Kha, khua sang bruă blơi pơtơi ƀơi Dak Lak ñu rai mơ̆ng tơring čar Hưng Yên, brơi thâo, rim thun, ñu blơi hơdôm rơbâo tơn pơtơi pioh sĭ mơdrô pơ djop tơring čar gah kual kơdư hăng sĭ mơdrô pơ dêh čar tač rơngiao. Thun anai, sang bruă sĭ mơdrô gơñu ngă hră pơkôl hlâo blơi pơtơi ƀơi 700 hektar pioh sĭ mơdrô amăng bơyan ƀong têt Ất Tỵ 2025:

“Sa thun kâo sĭ mơdrô hơdôm hơpluh rơbâo tơn pơtơi nao pơ dêh čar Khač, aka ƀu yap ôh sĭ mơdrô amăng dêh čar ta pô lu mơ̆n. Anŏ hiam boh pơtơi ƀơi Dak Lak jơman biă mă. Thun anai, gơmơi kĭ hră pơkôl sĭ mơdrô pơtơi hăng hơdôm rơtuh hektar, rơnoh blơi mơ̆ng 200-350 rơbâo prăk sa dong,  amung pơtơi”.

Đơ đam tơring čar Dak Lak ră anai hơmâo rơbêh 2.400 hektar đang pơtơi, rơnoh koh ba glăi sĭ hơmâo 66.000 tơn. Hơdôm pơjeh pơtơi ba pla lĕ pơtơi bia mơ̆ng kual Nam Mỹ hăng pơtơi lao mơ̆ng Thai Lan, pla ƀơi tơring glông Ƀuôn Đôn, Ea Kar, Krông Pač, Mdrak hăng plơi prong Ƀuôn Ma Thuôt. Hrŏm hăng lu mơta bohtroh đang hmua pơkŏn, phun pơtơi lĕ ăt hơmâo ba glăi bo tŭ yua lu mơ̆n amăng kual lŏn rơga, čuah laih anun kual lŏn plah wah lŏn tơdrơ̆t  Bayan hăng lŏn krăi ƀơi Dak Lak, djru ngă bruă pla lu pơjeh pla đĭ hiam hăng pơđĭ tui rơnoh pơhrui glăi kơ mơnuih ƀôn sang.