Tơring čar Gia Lai hmâo lu mơta gơnam mă mơ̆ng đang hmua, đang kyâo pla pơkra gơnam sĭ kơ dêh čar tač rơngiao hmâo gơgrong ba ƀơi anăp mơ̆ng tơlơi pơkă pơgang rơngiă glai klô mơ̆ng EU, amăng anun hmâo kơphê, kơ su, hnal kyâo hăng hơdôm gơnam mă mơ̆ng hnal kyâo. Hơdôm mơta gơnam anai glăk ba glăi prăk pơhrui glăi năng ai ñu mơ̆ng 500 – 600 klăk dolar Mi kơ tơring čar. Amăng anun EU lĕ anih anom yôm phăn. Hăng tơlơi kiăng phrâo mơ̆ng EU, anom bơwih ƀong khom hơduah ĕp anih anom pla pơkra djơ̆ phiăn, pơhlôm ƀu hmâo gơnam mă mơ̆ng glai klô phă ƀudah ngă răm rai.

Ơi Lê Đức Vương – Khua gơgrong rơwang bruă mơ̆ng Sang bruă Nestle Việt Nam ƀơi Gia Lai brơi thâo, tơdơi kơ EU lăi pơhing kơ tơlơi phiăn, abih bang kah hăng hơdôm bôh anom bơwih ƀong prong sĭ kơphê kơ EU hmâo gơgrong hlâo ngă giong tui tơlơi pơkă. Lơm anun hơdôm bôh anom anet hăng sang anô̆ mơnuih ƀôn sang bưp lu tơlơi tơnap yua kơƀah anăn hơduah ĕp bruă pla pơkra kơjăp hăng prăk pioh ngă tui kơƀah. Khă hnun hai, hơdôm tơlơi pơkă anai ăt pok tơbiă mơn tơhnal gal prong kơ anom bơwih ƀong Gia Lai pơđĭ dlông nua anăn gơnam, pơjing anô̆ gal bơkơtưn pơ̆ kual Mi Kô̆:

 “Ding jum đang hmua hăng rơhuông adai lŏn mơnai djru anom bơwih ƀong pioh thâo bôh tŭ yua lơm gum hrŏm hơdôm tơlơi pơkă kơ pơgăn phă glai klô hăng pơsit djơ̆. Hăng anom bơwih ƀong anet hăng sang anô̆ mơnuih ngă đang hmua lĕ khom ngă polygon (sa gơnam măi mok djru hơduah ĕp anih anom pla pơkra) hăng pơsit anih anom. Tơdah gơñu ngă soh tơlơi pơkă thơ tơdơi anai ngă glăi rơngiă lu prăk. 100 truh 200 bôh sang anô̆ lĕ amuñ, bơ̆ tơdah hơdôm pluh rơbâo bôh sang anô̆ lĕ tơnap biă. Kơphê sĭ kơ EU hmâo tơlơi tŭ yap EUDR thơ, dưi sĭ nua lu hloh hăng kơphê juăt sĭ mơ̆ng hlâo. Klă biă, yua kơ tơlơi anai amra pơsur anom bơwih ƀong hmâo prăk apah bơni tơdah gơñu ngă tui hơdôm tơlơi pơkă anai. Anai jing gai kưl prong biă”.

Tui hăng ƀing juăt bruă sĭ mơdrô hăng anih anom sĭ mơdrô, kiăng dưi ngă juăt hăng EUDR, hơdôm bôh anom bơwih ƀong khom tañ pơjing anăn hơduah ĕp anih anom pla pơkra gơnam kơjăp, dưi mă yua hơdră blockchain pioh thâo rơđah tơlơi lăi pơhing; Gum hrŏm hăng hơdôm khul pel ĕp pơsit gơnam ƀu bơdjơ̆ nao tơlơi phă glai klô; Mă yua hơdră ngă đang hmua kơjăp, hrŏ trun đut hlah bơdjơ̆ nao glai klô...

Rơngiao kơ anun, Gia Lai lăi ha jăn hăng hơdôm bôh tơring čar kual Dap Kơdư lăi hrŏm ăt kiăng gơgrong hlâo gum hrŏm mơn hơdôm rơwang bruă djru pơplih phrâo kơjăp, pơđĭ tơlơi pơmin mơ̆ng mơnuih ngă đang hmua hăng pô sĭ hyu gơnam kơ tơhnal yôm phăn mơ̆ng bruă ngă đang hmua tui jơlan gah kơjăp. Ơi Bùi Đức Hào - Gah Khul pơčeh phrâo sĭ mơdrô kơjăp sui thun, brơi thâo:

 “Kơnong kơ hơdôm blan tơdơi kơ Khul pơlir hơbit kual Mi Kô̆ mă yua tơlơi phiăn anai lĕ, Ding jum đang hmua hăng rơhuông adai glai klô hmâo mă yua jơlan hơdră bruă mă, pơjing anih djă pioh kual pla hăng ngă tui hơdôm jơlan gah lăp djơ̆ hăng hơdôm tơlơi kiăng mơ̆ng EUDR. Hơdôm bôh tơring čar ăt hmâo pơphun mă bruă laih mơn. Kơphê ƀơi tơring čar Gia Lai dŏng raih daih ƀơi hơdôm bôh tơring glông, dŏng amăng kual asuek kual ataih lĕ amra tơnap tap hloh. Khă hnun hai, Gia Lai ăt jing tơring čar blung a hmâo grŭp mă bruă ODA, tui anun amra gal brơi kơ hơdôm bruă pơ̆ anăp anai truh kih klă hiam”./.