Ƀơi Anih jơnum thôn 2, să Phú Xuân, tơring čar Dak Lăk lu mơnuih ƀôn sang hrŏm hăng grup wai lăng plơi ječ ameč ngă giong bruă prăp rơmet kơ anih plĕ hră mrô 10. Bơnal pôr pơhing, tơlơi iâu pơthưr, hla kơ hơmâo akă yol hiam; kơthung plĕ hră, kơƀang grê, apui, ia, sang juă glai hơmâo prăp lui djŏp, hơdjă agaih. Ơi Trần Văn Hùng,  mơnuih amăng Grup plĕ hră mrô 10 brơi thâo, lơ 15/3 pơ anăp, 1.060 čô mơnuih nao plĕ hră pơ anai. Yua prăp rơmet hlâo, bruă tŭ jum, anih anom hăng wai lăng rơnuk rơnua hơmâo ngă kjăp laih kơ hrơi mơak prong mơ̆ng mơnuih ƀôn sang.

“Mơ̆ng hră tĕp anăn mơnuih nao plĕ hră ƀơi sang jơnum thôn 2 hơdôm hrơi rơgao, gơmơi ăt pôr pơthâo, pơtô ba neh wa sem lăng tong ten ƀing khua či ruah. Mơ̆ng anun ruah mă mơnuih rơgơi, thâo pơmin, apăn bruă či mut ngă khua pơ ala mơnuih ƀôn sang djŏp gưl”.

Să Phú Xuân hơmâo akŏ pơdong mơ̆ng 3 boh să Ea Puk, Ea Dăh hăng Phú Xuân (tơring glông Krông Năng hơđăp). Ruah khua pơ ala mơnuih ƀôn sang dêh čarh tal 16 hăng khua pơ ala djŏp gưl rơwang thun 2026-2031, să hơmâo năng ai 25.000 čô mơnuih nao plĕ hră ƀơi 7 anih ruah khua, 19 anih plĕ hră. Ơi Nguyễn Tiến Ấn, Kơ-iăng khua jơnum min mơnuih ƀôn sang să, ding kơna Jơnum min ruah khua să brơi thâo, truh ră anai, 19/19 anih plĕ hră hơmâo prăp lui giong laih anih anom, rơnuk rơnua, jum tuai; hră, anăn păn, tơlơi pơhing kơ mơnuih či ruah hơmâo tĕp rơđah rơđông ƀơi anih plĕ hră hăng ƀơi internet; hơdôm mông jơnum bưp mơnuih ƀôn sang hơmâo ngă giong laih, tơguan truh hrơi mơak prong mơ̆ng lŏn ia ta đôč yơh: “Jơnum min mơnuih ƀôn sang să Phú Xuân hơmâo pơkra, pơhrup bơnal pôr pơthâo, tơlơi iâu pơthưr, kơthung plĕ hră...ƀơi hơdôm anih ruah khua djơ̆ hăng tơlơi pơkă mơ̆ng Khul ruah khua Dêh čar. Truh mông anai, bruă prăp rơmet ruah khua hơmâo ngă giong laih. Bruă tĕp anăn ƀơi hơdôm anih plĕ hră hyơmâo ngă giong laih, dŏ tơguan truh hrơi ruah khua đôč yơh”.

Ƀơi să M’Drak, ataih mơ̆ng a kual prong tơring čar Dak Lăk năng ai 90km, hrơi prăp rơmet ăt ječ ameč, dik dak hnun mơn. Ơi Nguyễn Đức Thảo, Khua Jơnum min mơnuih ƀôn sang să, Khua Jơnum min ruah khua sang să brơi thâo, bruă ruah khua pơ ala mơnuih ƀôn sang dêh čar tal 16 hăng khul khua pơ ala djŏp gưl ƀơi anai hơmâo năng ai 15.800 čô mơnuih nao plĕ hră ƀơi 10 bit anih ƀơi 8 anom bruă ruah khua. Truh ră anai, bruă prăp rơmet hơmâo ngă giong laih, tơguan truh hrơi plĕ hră đôč yơh. Ơi Nguyễn Đức Thảo pôr pơthâo: “Ră anai gơmơi tĕp djŏp laih anăn ƀing khua či ruah ƀơi hơdôm anih plĕ hră, ƀơi anih juăt hơmâo lu mơnuih nao rai hăng ƀơi sang să mơtăm. Pơphun giong laih mông jơnum pơčrông sai tal 3 hăng lăi pơthâo anăn sit nik 40 čô tơbiă anăn či ruah mă 24 čô khua pơ ala mơnuih ƀôn sang să rơwang thun 2026-2031”.

Tui hăng yă Cao Thị Hoà An, ding kơna Ping gah dêh čar, Kơ-iăng khua Ping gah tơring čar, Khua Jơnum min ruah khua tơring čar Dak Lăk, kiăng bơwih brơi năng ai 2,42 klăk čô mơnuih nao plĕ hră, tơring čar hơmâo akŏ pơdong 102 jơnum min ruah khua gưl să, phương, prăp lui 2.119 anih plĕ hră. Truh ră anai, 100% anih plĕ hră hơmâo prăp giong laih anih anom, gơnam yua, pơhlom rơnuk rơnua, čơkă tuai; bruă jơnum pơčrông sai, tĕp hră mơnuih nao plĕ hră hăng pơphun bưp mơnuih nao plĕ hră  kiăng ƀing khua tơbiă anăn lăi pơthâo bruă gơñu či ngă hơmâo ngă djơ̆ tơlơi pơtrun laih, prăp lui giong, tơguan truh hrơi plĕ hră đôč yơh. Khua jơnum min ruah khua tơring čar Dak Lăk kiăng hơdôm gơnong bruă, hăng jơnum min mơnuih ƀôn sang să, phường lăng glăi dong anăn mơnuih nao plĕ hră, pơhlom abih bang mơnuih amăng hnưr thun nao plĕ hră dưi nao plĕ hră ruah khua: “Khŏm kơđiăng lăng glăi abih anăn mơnuih nao plĕ hră, pơhlom ƀu dưi pơgao lui pô hlơi ôh. Biă ñu ƀing hơmâo anăn plĕ hră ngă bruă ƀơi hơdôm anom bruă, kual sang măi, mă bruă pơ ataih; ƀing plĕ hră lĕ čơđai sang hră; ăt kah hăng mơnuih aka ƀu hơmâo hră căn cước, mơnuih blung a nao plĕ hră. Biă ñu lĕ mơnuih duam ruă, glăk dŏ pơjrao pơ sang ia jrao ăt khŏm hơmâo lăng tong ten, pơhlom abih bang dưi nao plĕ hră”.

Hăng tơlơi prăp rơmet tong ten, hlom bom, mơ̆ng tơring čar truh pơ să, 102 boh să phương ƀơi Dak Lăk prăp lui gong laih kơ hrơi ruah khua. Mơ̆ng bruă prăp rơmet anih anom, gơnam yua truh kơ lăng glăi abih anăn mơnuih nao plĕ hră, abih bang tơlơi anai kiăng huăi pơgao lui pô hlơi. Lơ 15/3 pơ anăp, hrŏm hăng mơnuih ƀôn sang amăng dêh čar, rơbêh 2,42 klăk čô mơnuih plĕ hră ƀơi Dak Lăk amra mut amăng hrơi mơak prong mơ̆ng lŏn ia ta./.