Ƀơi să guai dêh čar Ia Ciă, hơdôm hrơi hăng anai, tơlơi pơhing bruă mă prăp lui kơ hrơi plĕ hră ruah khua glăk pơphun tañ biă mă. Mơ̆ng mơguah sing bring, ƀing khua mua, ling tơhan puih kơđông tơhan pơgang guai dêh čar ƀơi Ia Čiă ƀuh ƀô̆ mơta truh pơ djop plơi pla ala ƀôn, ngă hrŏm khua mua amăng plơi pla pioh pơtô lăi, jak iâu mơnuih ƀôn sang ngă hrŏm bruă pơgang tơlơi dưi pô kơ lŏn ia, pơgang hơđong dêh čar; tơlơi dưi hăng bruă khom ngă mơ̆ng abih bang mơnuih ƀôn sang amăng bruă nao plĕ hră ruah khua. Ơi Phạm Văn Phúc, Khua git gai ping gah plơi Kom Yô̆, să Ia Čiă brơi thâo, rim wơ̆t hyu pơtô lăi, mơnuih ƀôn sang ƀu kơnong thâo hluh rơđah kơ tơlơi dưi, bruă glăm ba mơ̆ng ta pô đôč ôh, dŏ đăo kơnang tong ten tơlơi git gai mơ̆ng ping gah, tơlơi wai lăng mơ̆ng khua mua gong gai plơi pla.

“Truh mông anai hơmâo pơtô ba kơ bruă ruah khua klâo tal laih, ră anai ƀơi plơi pla, ƀôn ƀut ruah khua mrô 5 hơmâo ngă giong abih laih bruă čih anăn, pơtep hră pơthâo anăn mơnuih ƀôn sang ruah khua. Hrơi ruah khua amăng lơ 15/3/2026 hơmâo pơtô lăi tong ten truh pơ abih bang mơnuih ƀôn sang thâo hluh rơđah boh yom phun kơ bruă mă ruah khua”.

Amăng plơi pla, hăng tơlơi gơgrong ba mơ̆ng ƀing tha plơi, khua ƀôn, ƀing arăng đăo kơnang, kơnang kơ gơñu hyu pơtô lăi, jak iâu kiăng thâo hluh kơ bruă ruah khua, brơi mơnuih ƀôn sang ruah mă mơnuih rơgơi, thâo bruă, jĕ giăm ană plơi pla hloh, laih dơ̆ng ăt răng kơđiăng mơ̆n hăng tơlơi pơhing arăng pơčeh mă ča, kiăng kah ania pơpha djuai amăng plơi pla. Tha plơi ơi Rčom Čič, plơi Beng, să Ia Čia lăi:

“Kâo pô lăi pơthâo lu wơ̆t kiăng mơnuih ƀôn sang thâo hluh, ruah mă mơnuih hơmâo pran jua hiam klă, thâo rơgơi, hur har amăng bruă mă thâo đing nao djru kơ ană plơi pla. Ta lĕ mơnuih  ƀôn sang dŏ amăng să giăm guai dêh čar anun khom răng kơđiăng na nao ƀơi anăp hơdôm tơlơi pơmin soh sat arăng ngă pơrung pơrăng djuai ania laih anun pơmin sat či pơblư̆ kơnuk kơna, anăm brơi mơnuih ƀôn sang hmư̆ tơlơi arăng plư, khom ngă djơ̆ tơlơi phiăn kơnuk kơna, jơlan hơdră ping gah pơtrun laih anun pơkă amăng kual plơi pla”.

Thiếu tá Nguyễn Thanh Bảo, khua apăn bruă kơđi čar puih kơđông tơhan pơgang guai Ia Čia brơi thâo: Ngă tui djơ̆ tơlơi pơtrun mơ̆ng khua mua pơ dlông pơtrun, puih kơđông gơñu pơpha mơnuih mă bruă nao tơl rim sang anŏ, pơčrong sai hăng mơnuih ƀôn sang tum teč, djru pơtô lăi brơi mơnuih ƀôn sang thâo hluh boh yom tơlơi tŭ yua kơ bruă ruah khua, kiăng abih bang thâo hăng răng kơđiăng hăng tơlơi pơčut pơčao hăng ƀing ayăt roh, hŭi kah ania pơpha djuai, tơlơi gum pơgôp ƀơi kual lŏn giăm guai.

“Pơđĭ tui tơlơi thâo hluh kơ ană plơi pla, kiăng thâo tong ten tơlơi kiăng, tơhnal či ngă, boh yom phun kơ bruă plĕ hră ruah khua. Mơ̆ng anun, mơnuih ƀôn sang thâo hluh hăng ruah mơnuih ngă pô pơ ala brơi kơ ta, mơnuih tơpă hiam, mă bruă lăp, thâo rơgơi, kiăng pơtruh brơi hiăp kơ mơnuih ƀôn sang amăng plơi pla, boh nik ñu anih giăm guai dêh čar. Mơnuih ƀôn sang ăt khom gum pơgôp ten, ngă khua pô sit plĕ hră ruah khua. Ƀing gơmơi pơtô lăi kơ ană plơi pla brơi thâo hluh răng kơđiăng hăng tơlơi arăng pơčut pơčao laih anun ngă tui djơ̆ tơlơi phiăn kơnuk kơna, jơlan hơdră mơ̆ng ping gah amăng bruă pơhlom hlâo, pơgăn tơlơi soh sat mơ̆ng ƀing ngă ayăt roh, pơblư̆ lŏn ia, kah pơpha djuai ania”.

Să Ia Čia hơmâo pok pơhai 6 anih plĕ hră ruah khua ƀơi 10 boh plơi pla; pơphun kơjăp khul ngă bruă pôr tơlơi pơhing, pơhlom rơnuk rơnua hơđong, pơsir hră ngă kơđi ƀom kiơng….Hăng rơbêh 70% mrô mơnuih ƀôn sang lĕ mơnuih djuai ƀiă, tơlơi thâo hră aka ƀu lu ôh, aka bơkơnar, bruă pơtô lăi, pok pơblang brơi kơ ană plơi pla khom pơtong jing sa bruă mă phun, pơphun beč bal djơ̆ hơdră, amuñ thâo hluh, djơ̆ găl hăng plơi pla. Ơi Nguyễn Công Hòa, Khua Jơnum min mơnuih ƀôn sang să Ia Čia brơi thâo:

“Hơdôm khul dăp hơdră, hơmâo tơlơi phiăn pơkă, pơpha bruă mă brơi kơ rim ding kơna. Ƀing ling tơhan kơnuk kơna, ngă hrŏm, amăng anun hơmâo tơhan pơgang guai dêh čar, kông an, Khul git gai tơhan ƀơi să….hơmâo jơnum, pơpha bruă mă kiăng pơgang tơlơi rơnuk rơnua hơđong hlâo, amăng mông hăng tơdơi kơ ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang djop gưl guang bruă thun 2026-2031 kiăng tŭ yua hiam klă, truh kih, hơmâo tơlơi hơgĕt truh rung răng ƀơi guai dêh čar”.

Lơ̆m kual guai dêh čar rơnuk rơnua mơak, pran jua ană plơi pla sa hnơ̆ng, rim pok hră plĕ ruah ƀu kơnong sa tơlơi ruah pô pơ ala đôč ôh, dŏ jing sa tơlơi pơtong rơđah tơlơi dưi ngă pô, pơdah rai tơlơi kơtang gum pơgôp djuai ania. Mơ̆ng bruă ngă hrŏm abih bang glông bruă kơđi čar laih anun pran jua mă bruă glăm ba mơ̆ng rim čô mơnuih ƀơi jơlan guai dêh čar pơ anih đut tơhnal jơlan guai pơjing rai atur kơjăp pioh kơ Hrơi jơnum prong mơak kơ lŏn ia dưi pơphun rơnuk rơnua, ngă khua pô, djơ̆ hăng tơlơi phiăn.