Amăng ayuh hyiăng pơhang pơ-iă hrơi akô̆ blan 4 bơyan phang kual Dap Kơdư, ƀing gơmơi bưp ping gah Y Tuyên Bkrông (djuai ania Êđê), 53 thun, ƀơi buôn Dray Hling, să Hòa Xuân, plơi prong Buôn Ma Thuột (Dak Lak), lơm ñu glăk hrŏm hăng sa dua čô mơnuih glăk klai kơmok mut amăng kơthung pruih tal 3 kơ đang kơphê pla plah tiu hăng sầu riêng. Ñu lăi pơthâo, hăng pô lĕ mơnuih ping gah drơi pô gơñu ngă tui klă na nao pran jua ba jơlan hlâo ngă gru amăng bruă ngă đang hmua, hrŏ trun rin rơpa. Tơdơi kơ lu thun pơđĭ kyar bruă tơjŭ pla, ră anai sang anô̆ hmâo prăk pơhrui glăi hơđong rơbêh kơ 200 klăk prăk sa thun mơ̆ng 1.500 ƀĕ phun kơphê, 400 ƀĕ gŏng tiu hăng 40 ƀĕ phun sầu riêng. Lơm bruă bơwih ƀong hơđong, ñu amra djru gum mơnuih amăng grŭp tơnap tap pơkon hăng neh wa amăng ƀuôn. Ơi Y Tuyên Bkrông brơi thâo:

 “Kâo lĕ mơnuih ƀơi anăp nao pơhrăm amăng să anai gah mă yua măi mok pla kơphê pla tiu hăng sầu riêng. Lơm pơhrăm kâo thâo pô amra pơtô glăi kơ mơnuih ƀôn sang hơdră mă yua măi mok bơwih brơi kơ phun kơphê”.

Ayong Y Vinh H’đơk (djuai ania Êđê) 38 thun, ƀơi ƀuôn Čư̆ Đnuê, să Hòa Xuân, plơi prong Buôn Ma Thuột, tơring čar Dak Lak ăt lĕ mơnuih ping gah thâo gir run, triăng bơwih ƀong huă. Lăng yôm pran jua mơnuih ping gah khin hơtai “khin pơmin, khin ngă”, rim thun ñu pơhrui hmâo rơbêh kơ 200 klăk prăk mơ̆ng bruă tơjŭ pla hăng bruă mă pô git gai bruă man pơdŏng. Tơdơi kơ lu thun bơwih ƀong huă, rơnuč thun 2023 phrâo rơgao, ñu hmâo pơdŏng laih sang dô̆ klă hiam prong 100m2, hmâo nua ha rơtuh klăk prăk. Ayong Y Vinh lăi pơthâo:

 “Tơdơi kơ pơphun bruă lĕ kâo ruah bruă man pơdŏng, laih anun hyu mă bruă arăng apah hăng čơkă mă dong ring bruă pơdŏng sang gưl 4, hmâo thun čơkă pơdŏng mơ̆ng 3-4 bôh sang, hmâo thun ƀiă biă bruă lĕ 2 bôh sang. Kâo iâo adơi ayong man pơdŏng amăng ƀuôn, năng ai ñu mơ̆ng 7-8 čô mơnuih, 4 čô mơnuih man pơdŏng phun hăng 3 čô djru tui tlôn ƀudah 2 čô djru tui tlôn, apah prăk man pơdŏng phun lĕ mơ̆ng 400-450 rơbâo prăk sa hrơi sa cô mơnuih tui hluai thâo bruă. Lăi hrŏm abih bang pơhrui mơ̆ng kơphê hăng wot bruă man pơdŏng ăt hmâo mơ̆n mơ̆ng 150-200 klăk prăk sa thun".

Khul ling tơhan hơđăp plơi prong Buôn Ma Thuột hnâo 8.080 čô mơnuih, amăng anun hmâo 2.691 čô mơnuih lĕ mơnuih ping gah, năng ai ñu giăm truh 600 čô mơnuih lĕ djuai ania Êđê, Bơnông, Tày, Nùng, Dao, Thái, Hmông... Ơi Nguyễn Công Tình - Kơ-iăng Khua Khul ling tơhan hơđăp plơi prong Buôn Ma Thuột pơsit, hơdôm thun rơgao, mơnuih ping gah amăng khul leng kơ ngă tui klă bruă ba jơlan hlâo ngă gru, lăng yôm pran jua "Mơnuih ping gah nao hlâo, ană plơi kiăo tui tlôn”. Hơdôm mơnuih amăng khul anai ăt ngă tui klă mơn pran gơgrong, hrưn đĭ mơ̆ng "Ling tơhan Wa Hồ" amăng rơnuk phrâo hăng pran jua triăng, ƀu huĭ kơ tơnap bơwih ƀong huă ngă đang hmua, hrŏ trun rin rơpa. Mơ̆ng anun, hmâo gum hơgôp ƀu anet pioh kơ tơlơi pơđĭ kyar bơwih ƀong - mơnuih mơnam mơ̆ng plơi prong Buôn Ma Thuột, pơdŏng khul jai hrơi jai kơjăp kơtang abih bang, pơjing bruă mă kơ lu mơnuih mă bruă ƀơi plơi pla hăng prăk pơhrui glăi hơđong. Hơdôm mơnuih ping gah Y Tuyên Bkrông hăng Y Vinh H’đơk lĕ mơnuih ba gru hlâo tui anun. Ơi Nguyễn Công Tình brơi thâo:

 “Amăng hơdôm mông jơnum, ƀing gơmơi hmâo ngă gru hlâo hơdôm tơlơi pơplih phrâo lĕ mơnuih ping gah Y Vinh hăng Y Tuyên pioh hơdôm mơnuih amăng khul ƀudah khul plơi pla hrăm ngă tui pơđĭ kyar bơwih ƀong. Biă ñu pioh mơnuih ping gah djuai ania ƀiă sut lui tơlơi ƀu khin, ngă klă bruă bơwih ƀong huă hrŏ trun rin rơpa kah hăng dua čô mơnuih ping gah Y Vinh hăng Y Tuyên. Mơ̆ng anun, pơjing jơlan lar hyu amăng Khul ling tơhan hơđăp plơi prong hăng plơi pla”.

Djơ̆ mơ̆ng lăi hă djơ̆ mơn, ƀing ping gah djuai ania Êđê amăng Khul Ling tơhan hơđăp plơi prong Buôn Ma Thuột kah hăng ơi Y Tuyên ƀudah Y Vinh hmâo hăng glăk hmâo pran pơtrut, tơlơi đăo gơnang hăng pran lar hyu pioh hơdôm mơnuih amăng khul pơkon ƀudah neh wa djop djuai ania ƀơi plơi prong Buôn Ma Thuột hrăm tui, ngă tui hrưn đĭ ƀơƀrư̆ tơlaih mơ̆ng ƀun rin ƀudah ngă pơdrŏng, djru pơdŏng plơi prong Buôn Ma Thuột lăi ha jăn hăng tơring čar Dak Lak lăi hrŏm jai hrơi jai pơdrŏng kơtang./.