Dong mơ̆ng hrơi dô̆ čơđai sang hră gưl 3, Hoàng Tiến Dũng hmâo laih tơlơi hor kơ bruă mă yua măi mok pôr pơhing. Tơdơi kơ hrăm giong anih 12 thun 2003, tui tơlơi čang rơmang mơ̆ng sang anô̆, ñu mut hrăm Trung cấp Quân lực Sang hră Đại học Trần Đại Nghĩa hăng hrăm giong laih anun dưi ruah mut mă bruă gah Grŭp git gai Khul ling tơhan plơi prong Buôn Hồ mă bruă. Ƀơi puih kơđông, yua hmâo tơlơi hor kơtang hăng măi mok pôr pơhing, ñu dưi hmâo gưl dlông ngă gal brơi hrăm dong bruă pơjing anăn păn mă yua măi ƀơi Đại học Khoa học Tự nhiên ƀôn prong Hồ Chí Minh. Hrăm giong hăng ƀăng pơsit rơgơi, Hoàng Tiến Dũng pơphun ngă tui hơdôm bôh thâo hăng tơlơi găn rơgao dưi hrăm mut amăng bruă mă sit. Kơnong amăng 4 thun, ñu čih 2 črăn anăn mă yua wai lăng sa tơlơi pơčeh pơđam pơanah mă yua kơ hơdôm djuai phao tiểu liên AK. Thiếu tá Hoàng Tiến Dũng brơi thâo:

 “Bruă mă mơ̆ng anăn hmâo pơjing amăng măi lĕ djru wai lăng mơnuih amăng hnưr thun amra nao ngă tơhan; dưi wai lăng mơnuih hơpă pô hlơi hmâo rơkâo mă yua pơhlôm hlâo pơtrut pơsur, laih anun dăp tal 1, dăp tal 2; djru brơi mơnuih apăn bruă ngă bruă ruah ling tơhan ngă tui jơlan gah pơkă kơ bruă mă”.

Ƀu djơ̆ kơnong kơ hor kơ tơlơi čih lăi pơthâo đôč ôh, Thiếu tá Hoàng Tiến Dũng ăt gum hrŏm klă mơn hăng ƀing gŏp kơsem min pơčeh phrâo hơdôm jơlan hơdră mă yua phao hăng djop mơta phao kơtuang djru bruă pơhrăm prăp lui blah ayăt. Akô̆ thun anai, ñu hrŏm hăng Trung tá Phạm Văn Đông – Khua pơphô bruă Grŭp git gai Khul ling tơhan plơi prong Buôn Hồ, kơsem min pơčeh phrâo truh kih anăn mă yua “Djă pioh jơlan pơanah lu mơta” ƀơi đing pơđam phao tiểu liên AK lăi hrŏm hăng phao AR-15. Tơlơi pơčeh anai dưi hmâo gưl git gai Grŭp git gai khul ling tơhan plơi prong Buôn Hồ, Ƀirô git gai Khul ling tơhan tơring čar Dak Lak pơsit hăng amra dưi mă yua amăng bôh nik ñu pơ̆ anăp anai. Trung tá Phạm Văn Đông lăi pơthâo:

 “Hăng tơlơi pơčeh phrâo mơ̆ng kâo lĕ đing nao jơlan gah pel ĕp jơlan pơđam pơanah tơhrơi ăt kah hăng amăng mlăm mơmot tui per djă pơplih bơngač rơđah; bơ̆ kơnong hăng Dũng lĕ hiưm dưi čơphin mă anih pơđam djă pioh mơ-ĭt nao pơ̆ telephone. Dua bôh yôm anai lĕ anô̆ djă pioh glăi jing tơlơi pơčeh phrâo "Djă pioh jơlan pơanah lu mơta", hăng truh ră anai kâo hăng Dũng hmâo pơhrua hrŏm, laih anun kơsem min pơjing rai truh kih gơnam ngă rai anun”.

Tui hăng Thượng tá Tống Văn Quang – Ding kơna kơđi čar Grŭp git gai Khul ling tơhan plơi prong Buôn Hồ, hơdôm thun rơgao, khul mơnuih apăn bruă tơhan puih kơđông pơtrut kơtang na nao bruă ngă tui tơpă hơdôm bôh yôm, jơlan hơdră pơtô pơhrăm bruă kơđi čar, pơtô juăt tơlơi phiăn; Pơphun brơi mơnuih păn bruă, mơnuih ping gah rơkâo, pơkôl pơhrăm, hrăm tui, pơhrăm drơi pô tui tơlơi pơmin, pran jua, kơnuih Hồ Chí Minh; Lăng yôm pran jua gơgrong pô amăng kơsem min mă yua bôh thâo phrâo măi mok pôr pơhing amăng bruă pơhrăm prăp lui blah ayăt... Dong mơ̆ng anun jai hrơi jai hmâo lu mơnuih pơdah rơđah tơlơi pơplih phrâo amăng lu bruă mă, amăng anun ƀuh rơđah lĕ thiếu tá Hoàng Tiến Dũng hăng hơdôm tơlơi čih hmâo pơjing amăng măi “Wai lăng phao kơtuang bôh phao” hăng “Wai lăng mơnuih nao ngă tơhan”... Hơdôm tơlơi čih amăng măi anai hmâo hăng glăk dưi mă yua hyu djop amăng bôh nik, djru pơđĭ tui bôh tơhnal amăng ngă tui bruă jao pơgang Lŏn ia. Thượng tá Tống Văn Quang, pơsit kơ thiếu tá Hoàng Tiến Dũng:

 “4 thun na nao ƀing gŏp Dũng lĕ mơnuih ping gah ngă giong prong na nao bruă jao mơ̆ng puih kơđông, bơ̆ gah hơdôm tơlơi pơčeh phrâo lĕ ñu dưi hmâo Ding jum khul ling tơhan, Quân khu 5 hăng Ƀirô git gai Khul ling tơhan tơring čar Dak Lak ƀơk hră bơni. Hơdôm tơlơi čih mă yua amăng măi wai lăng tơhan pơhlôm hlâo pơsur hăng pơčeh phrâo yua kơ ñu pơčeh pơjing leng kơ dưi mă yua hyu djop ră anai hăng hơdôm thun pơ̆ anăp dong”.

Giăm hmâo 20 thun mă bruă ƀơi Grŭp git gai khul ling tơhan plơi prong Buôn Hồ, thiếu tá Hoàng Tiến Dũng hmâo hăng pơčeh rai lu tơlơi čih, anăn pioh mă yua hăng pơčeh phrâo pioh kơ bruă pơhrăm blah ba glăi bôh tơhnal. Hăng hơdôm tơlơi gir run lơm dô̆ mă bruă, ñu dưi hmâo hơdôm gưl git gai jao ƀơk lu črăn bơni yôm. Khă hnun hai hăng ñu, črăn apah bơni yôm hloh lĕ tơlơi đăo gơnang mơ̆ng mơnuih amăng sang anô̆ hăng ƀing gŏp. Anai amra lĕ phun than pơsur pran jua pioh ñu hrăm dong, kơsem min, pơjing rai hơdôm črăn tơlơi čih pioh mă yua tŭ yua hloh djru ngă tui truh kih bruă pơgang Lŏn ia amăng rơnuk phrâo./.