Ƀơi plơi prong Buôn Ma Thuột, tơring čar Dak Lak, ƀing Khua pơ ala mơnuih ƀôn sang tơring čar Dak Lak hơmâo bưp mơnuih ƀôn sang hăng ƀing kông ñơ̆n. Nao bưp mơnuih ƀôn sang hơmâo Khua apăn bruă Ping gah, Khua anom pơtô ba mơnuih ƀôn sang gơnong glông, ƀing khua pơ ala mơnuih ƀôn sang tal XV Bùi Thị Minh Hoài hăng giăm 150 čô mơnuih lan lan lĕ ƀing kông ñơn mơng hơdôm anih anom, anom bơwih ƀong sĭ mơdrô amăng plơi prong.

Tơdơi kơ hmư̆ lăi pơthâo kơ boh tơhnal amăng jơnum lok 7, Khua pơ ala mơnuih ƀôn sang dêh čar tal XV hăng boh than mă bruă mơng ƀing Khua pơ ala mơnuih ƀôn sang tơring čar tơdơi kơ jơnum lok 6 truh ră anai, mơnuih ƀôn sang ƀơi Dak Lak hơmâo hơdôm tơlơi pơgôp hiăp đing nao hơdôm boh tơhnal bơdjơ̆ nao hră pơhlôm nua mơnuih mơnam, prăk apah, sang dŏ, hơdră djru mơnuih mă bruă…Sit biă ñu, mơnuih ƀôn sang rơkâo ngă gêh gal kiăng ƀing ding kơna, mơnuih mă bruă dưi hơmâo hră pơhlôm nua ia jrao dưi duh prăk lơm khăm pơjrao ƀơi hơdôm anih anom ia jrao rơngiao mông mă bruă, hrŏ trun thun pơdơi lơtret hăng ƀing mơnuih mă bruă anun lĕ ƀing nai sang hră čơđai anet, ƀing kông ñơn mă bruă amăng gơnong bruă glêh glar, bơdjơ̆ sat nao drơi jăn…Amai Ngô Thị Ánh Đào, Anom bruă djru pơtô pơjuăt brơi ƀing čơđai drơi jăn ƀu klă tơring čar Dak Lak brơi thâo:

“Rơkâo Ƀirô Khua pơ ala mơnuih ƀôn sang dêh čar, ƀing khua mua tơring čar rơkâo djop gưl bơdjơ̆ nao hơmâo hơdră tong ten kiăng pơhlôm brơi hơdră djru lăp djơ̆ hăng gơnong bruă pơtô hrăm gah sang hră čơđai anet anun lĕ hơmâo hơdră đĭ tui prăk apah, pơhrŏ trun hrơi pơdơi lơtret, ba ƀing nai ia pơtô mut amăng anih mă bruă glêh glar hăng ngă sat kơ drơi jăn kiăng ƀing nai pơtô gah sang hră čơđai anet hơđong pran jua mă bruă hăng gir run tŏ tui mă bruă”.

Hrŏm hăng anun, hơmâo lu mơnuih rơkâo Kơnuk kơna đing nao sem lăng, hơmâo hơdră man pơdong sang dŏ mơnuih mơnam, sang dŏ rơgêh brơi ƀing kông ñơn. Amai Nguyễn Thị Thanh Thủy, kông ti pơčruh ngăn bơwih brơi tuai čuă ngui Dak Lak lăi rơđah, amăng hrơi blan nua gơnam đĭ kơtang, prăk yua rĭm hrơi, čem rông ană bă đĭ kơtang, ƀing kông ñơn ƀu hơmâo prăk pơkrem pioh kơ blơi sang dŏ.

“Rơkâo Kơnuk kơna đing nao sem lăng, hơmâo hơdră man pơdong sang dŏ mơnuih mơnam, sang dŏ nua rơgêh dưi blơi tla tui ƀơƀrư̆ ƀudah brơi kông ñơn čan prăk mă kmlai ƀiă kiăng hơmâo sang dŏ hơđong tơlơi hơdip mơda, bơwih ƀong huă”.

Ăt amăng môn bưp mơnuih ƀôn sang, ƀing Khua pơ ala mơnuih ƀôn sang tơring čar Dak Lak hơmâo jao 100 anung gơnam brơi ƀing kông ñơn sang anŏ tơnap tap amăng tơring čar.

Kiăng pơhlôm brơi jơnum lok 7, Khua pơ ala mơnuih ƀôn sang dêh čar tal XV pơ anăp, phrâo rơgao, ƀing Khua pơ ala mơnuih ƀôn sang tơring čar Lâm Đồng hơmâo pơphun bưp mơnuih ƀôn sang djop plơi pla amăng tơring čar. Ƀơi hơdôm anih bưp, mơnuih ƀôn sang lêng kơ đăo gơnang hăng čang rơmang hơdôm hơdră bruă anai pơtrut pơđĭ kyar bơwih ƀong huă-mơnuih mơnam, hơdră găn rơgao tơnap tap yua hrŏ trun bơwih ƀong huă mơng Kơnuk kơna, mơng Ƀirô Khua pơ ala mơnuih ƀôn sang dêh čar amăng djop tal jơnum laih rơgao. Laih dong, tŏ tui rơkâo lu bruă bơdjơ̆ nao bruă wai lăng kơnuk kơna amăng djop mơta bruă.

Ƀơi să Rô Men, tơring glông Đam Rông, mơnuih ƀôn sang čang rơmang Ping gah, Kơnuk kơna kiăng tŏ tui đing nao pok pơhai hơdôm jơlan hơdră tuh pơ alin amăng kual mơnuih djuai ania ƀiă, pơhlôm tơlơi hơdip mơda, djru čan prăk mă kmlai ƀiă tuh pơ alin pơđĭ kyar bơwih ƀong, pơtrut kơtang amăng bruă ngă hră pơ-ar pơsit mă yua lŏn mơnai, pơhlôm brơi sang dŏ brơi hơdôm boh sang anŏ ƀun rin, pơkra ming hăng pok prong jơlan mrô 27, tuh pơ alin dưm truă apui kơđen bơngač rơđah, man pơkra jơlan glông, ia hơdjă amăng plơi pla….

Lơm anun, mơnuih ƀôn sang ƀơi să Mê Linh, tơring glông Lâm Hà đing nao biă mă kơ bruă pơgăn hưp ƀong kông ngăn kiăng tŏ tui kơtưn hăng pơtrut kơtang, đing nao pel ĕp, krăo lăng ngă tui tơlơi phiăn mơng ƀing apăn bruă ƀơi ƀon lan; ngă tui ha amăng plĕ hơdôm hơdră tuh pơ alin pơđĭ kyar kual mơnuih djuai ania ƀiă, pơhlôm hơđong tơlơi hơdip mơda….Mơnuih ƀôn sang Trương Văn Trình, dŏ amăng ƀut plơi 5, să Mê Linh, tơring glông Lâm Hà brơi thâo:

“Bruă pơgăn bưp ƀong kông ngăn gưl tơring čar hơmâo grup pel ĕp laih. Samơ̆ lơm pel ĕp pơ hơdôm boh tơring glông, să hơpă thơ, grup pel ĕp lêng kơ hơmâo hră lăi pơthâo hă ƀŭ ? hơmâo lăi pơthâo amăng anih anom pôr pơhing mơn ? Bơ giăm anai hloh lĕ gưl tơring glông hơmâo krăo lăng, git gai, sem lăng ƀing apăn bruă gah yŭ hơmâo ngă tui hă ƀŭ kiăng hơmâo tơlơi pơplih, ngă gêh gal, khŏm ngă brơi kơ klă kiăng ba glăi pran đăo gơnang amăng mơnuih ƀôn sang. Ƀu djơ̆ tơlơi pơgôp mơng mơnuih ƀôn sang mơ̆ tơring glông ƀu ngă tui, ƀu črâo ba, tơdah tui anai ƀu djơ̆”.

Ƀing pơ ala mơng hơdôm anih anom, gong gai djop ƀôn lan amăng tơring čar Lâm Đồng hơmâo lăi glăi hơdôm boh tơhnal, djop bruă mơ̆ mơnuih ƀôn sang đing nao. Ƀing khua mua pơ ala mơnuih ƀôn sang tơring čar Lâm Đồng ăt tŭ yap, pơƀut glăi tơlơi pơgôp hiăp kiăng rơkâo djop anom bruă bơdjơ̆ nao sem lăng, pơsir hĭ pơ anăp anai./.