Bruă “Khul hlăk ai prong pran săn hơtai hơđăp bơwih ƀong huă rơgơi – Yua kơ pran jua hơdor tơngia ƀing gŏp” hmâo đing nao pơđĭ kyar bơwih ƀong kơ mơnuih amăng khul amăng hơdôm gơnong bruă kah hăng pla pơkra gơnam mă mơ̆ng đang hmua; bơwih brơi hlô rông, mơnŭ bip. Mơnuih amăng khul djru nao rai tơdruă gah ngăn rơnoh yua bơwih ƀong, lăi pơthâo nao rai tơlơi găn rơgao wai lăng, bơwih ƀong huă sĭ mơdrô, bôh thâo phrâo măi mok, hơdră phrâo.

Kơnang kơ anun, truh ră anai đơ đam tơring čar hmâo 48 bôh sang anô̆ mơnuih amăng khul bơwih ƀong huă rơgơi, djru pơsir bruă mă brơi giăm truh 200 čô mơnuih amăng khul hlăk ai prong pran săn hơtai hơđăp ba jơlan hlâo hăng mơnuih amăng sang anô̆. Hlăk ai prong pran săn hơtai hơđăp hơdôm gưl tơring čar Dak Lak dô̆ gum hơgôp giăm truh 5 klai prăk kơ Keh prăk hơdor tơngia ƀing gŏp. Mơ̆ng anun, djru hơdôm rơtuh čô mơnuih ƀun rin gir run yak rơgao tơlơi tơnap, hrưn đĭ amăng tơlơi hơdip mơda./.