Tơlơi pơhing mơ̆ng Ding jum ling tơhan, djop puih kơđông ling tơhan mơ̆ng gưl Trung đoàn pơngŏ hơmâo pok pơhai ngă tui 1.800 ring bruă čơkă hrơi hơdor glăi, rơnoh prăk tuh pơ alin abih tih 260 klai; hơmâo ngă giong rơbêh 1.400 ring bruă hăng rơbêh 400 ring bruă hlăk dŏ ngă tui. Djop anom bruă, puih kơđông, tơring čar, plơi pla ngă hrŏm djru prăk ming pơkra glăi sang dŏ, anih hơdor pioh, kơkuh pơpŭ ƀơi sang anŏ, djru brơi kơ 32/34 čô tơhan pơyơr pran jua pôr tơlơi pơhing pơklaih rơngai lŏn ia rơnuk blah ngă đưm, hăng rơnoh prăk truh 2 klai 56 klăk prăk. Ră anai hlăk ngă giong 24 ring bruă ƀơi sang anŏ, dŏ glăi ƀơi 8 boh sang anŏ amra ngă giong hlâo kơ lơ 22/12 thun anai.

Abih bang amăng ling tơhan pok pơhai djru prăk, man pơdong sang hơdor tơngia, sang gum pơgôp, sang kơ ƀing gơ̆p, lui hĭ sang tơ̆i, sang hluh...djru brơi lu mơnuih ƀôn sang amăng plơi pla, truh ră anai hơmâo pok pơhai laih mơ̆n rơbêh 24.900 boh sang. Amăng anun, ba yua lăi pơthâo ƀrô djơ̆ lơ 22/12 lĕ 15.600  boh sang, mrô dŏ glăi amra ƀuăn pơdong ngă giong amăng thun 2025, hăng rơnoh prăk rơbêh 1.624 klai prăk. Thiếu tướng, ơi Đoàn Quang Hòa, Khua anom bruă djru jơlan hơdră, anom kơđi čar ling tơhan mơnuih ƀôn sang Việt Nam brơi thâo:

“Kơnong djru man pơdong sang gum pơgôp, sang kơ ƀing gơ̆p yua kơ anom bruă kơđi čar jak iâu ƀơi tơring glông Định Hóa, tơring čar Thái Nguyên blan 11/2023, hơmâo 40 boh sang bruă, anom bruă gah ling tơhan ƀuăn djru man pơdong 3.857 boh sang hăng rơnoh prăk lĕ 242 klai 500 klăk prăk. Tơdơi kơ jak iâu, djop sang bruă, puih kơđông ling tơhan ăt djru pơtô lăi, jak iâu pơčruh prăk, kiăng gum ba djop mơnuih hơmâo anăn dŏ kơƀah sang dŏ. Mrô sang gum pơgôp, sang ƀing gơ̆p ră anai lĕ hơmâo 12.863 boh sang, lu hloh tơhnal pơkă lĕ 4.863 boh sang”.

Ding jum ling tơhan ăt git gai djru prăk kơ Binh đoàn 15 man pơdong 4 boh sang Rung (Sang Rông) plơi kơ hơdôm boh plơi pla hăng rơnoh 12 klai prăk. Ling tơhan kual sa djru man pơdong plơi pla phrâo ƀơi să Tam Kim hăng Hoa Thám, tơring glông Nguyên Bình, tơring čar Cao Bằng hăng rơnoh prăk tuh pơ alin truh 70 klai. Đại tá Nguyễn Xuân Thủy, Kơ-iăng Khua anom bruă pôr tơlơi pơhing gah ling tơhan brơi thâo:

“Ding jum ling tơhan djru man pơdong sang hră gưl sa hăng sang hră gưl dua Điện Biên ƀơi să Thanh Xương, tơring glông Điện Biên, tơring čar Điện Biên hăng rơnoh prăk 120 klai; djru hrŏm 10 ring bruă brơi kơ djop puih kơđông ling tơhan gum ngă pơhrŏ ƀun rin hơđong kơjăp, man pơdong plơi pla phrâo, man pơdong ring bruă bơwih brơi mơnuih ƀôn sang mơ̆ng Keh prăk yua kơ mơnuih ƀun rin hăng rơnoh prăk 23,8 klai prăk”.

Prăp lui hơdor glăi tal 80 thun hrơi akŏ pơdong ling tơhan mơnuih ƀôn sang Việt Nam, 35 thun hrơi mơak abih bang mơnuih ƀôn sang gum hrŏm pơgang lŏn ia, phrâo anai, anom pơtô bruă ping gah dêh čar, Ding jum ling tơhan, Ding jum tơlơi pơhing hăng pôr pơthâo ngă hrŏm pơphun jơnum lăi pơthâo tơlơi pơhing kơ abih bang bruă mă hơdor glăi anai.

Tui hăng anun, lu bruă mă yom pơphăn kah hăng Anom bruă kơđi čar ling tơhan mơnuih ƀôn sang Việt Nam pô git gai, ngă hrŏm anom bruă Khul tơdăm dra mut phung rơnuk HCM, pok pơhai bruă pơplông hơduah ĕp gru grua “80 thun hrơi akŏ pơjing khul ling tơhan mơnuih ƀôn sang Việt Nam hăng 35 thun hrơi abih bang mơnuih ƀôn sang gum hrŏm pơgang lŏn ia dưi hơmâo lu tơdăm dra mut phung, hlăk ai mut hrŏm, pơplông. Pơdah tơlơi adoh suang bơni kơ bruă ling tơhan hăng pơphun pơplông adoh suang amăng dêh čar, pơplông čih ră ruai glăi kơ Đại đội hăng pơplông video clip, ling tơhan kâo khăp. Jơnum pơplông adoh suang ƀing kơhnăk bơni kơ bruă ling tơhan mơnuih ƀôn sang hăng pơphun adoh suang hăng mơnuih ƀôn sang, amăng abih bang ling tơham tơdăm dra čơđai sang hră gưl prong tal 10. Anom bruă ping gah ling tơhan, Ding jum ling tơhan git gai djop sang bruă, anom bruă amăng ling tơhan prăp lui ngă hrŏm djop sang bruă čih tơlơi pơhing, pôr tơlơi pơhing ƀơi dêh čar hăng djop tơring čar pơtrut bruă mă pơtô lăi, pôr pơthâo kơ bruă ling tơhan, pơgang lŏn ia, pơtô pơblang gah ling tơhan, jak iâu pơplông hrơi blan ngă tui “Pơ-ư ang gru grua–Čih tŏ tui boh tơhnal dưi ngă- lăp hăng pơanăn Ling tơhan rơnuk Wa Hồ”.

Boh nik ñu ƀrô djơ̆ tal hơdor glăi, Ding jum ling tơhan pok pơhai bruă mă, pơdă rup ling tơhan bơwih ƀong huă Việt Nam tal 2 ƀơi tơdron rơdêh por Gia Lâm, ƀôn prong Hà Nội mơ̆ng lơ 19-22/12, hăng hơbô̆ ngă, anih pơdă gơnam gru prong hloh pơkă hăng tal blung a. Jơnum ngă yang hơdor glăi tal 80 thun hrơi akŏ pơjing khul ling tơhan mơnuih ƀôn sang Việt Nam hăng 35 thun abih bang mơnuih ƀôn sang gum hrŏm pơgang lŏn ia amra pơphun prong kơdrưh biă mă mơguah lơ 20/12/2024 ƀơi sang jơnum prong dêh čar.