Git gai bôh yôm mông jơnum, Kơ-iăng Khua git gai pơ ala mơnuih ƀôn sang dêh čar Nguyễn Thị Thanh lăi rơđah Jơnum min apăn bruă Khua pơ ala mơnuih ƀôn sang dêh čar pơdah pran jua hơdor tơngia dơlăm hăng mơ-ĭt tơlơi hư-ưč hmưi mơ-ak klă hiam hloh truh ƀing nai pơtô čơđai nao hlâo, hrŏm hăng giăm truh 1 klăk 600 rơbâo čô nai pơtô, mơnuih apăn bruă wai lăng pơtô pơhrăm amăng djop kual mơ̆ng lŏn ia. Hrŏm hăng anun rơkâo khua pơ ala mơnuih ƀôn sang đing nao bơkơtuai kơ hơdôm tơlơi ba tơbiă amăng Tơlơi phiăn pioh kơ nai pơtô čơđai.

Lăi nao kơ tơlơi pơkă amăng tơlơi phiăn kơ bruă ruah nai pơtô, khua pơ ala Trần Văn Thức, grŭp Thanh Hóa brơi thâo ră anai bruă ruah nai pơtô amăng hơdôm bôh sang hră anih pơtô mơ̆ng kơnuk kơna glăk ngă tui tơlơi pơkă hrŏm kơ ruah nai pơtô, anai lĕ tơlơi akă gal ba truh tơlơi rơbêh nai pơtô ƀơi sa dua bit anih lĕ, bôh than ngă lu anih anom ƀu dưi ruah nai pơtô, ƀu dưi pơphun pơtô pơhrăm sa mơta tơlơi hrăm pioh pok pơhai jơlan hơdră pơtô pơhrăm 2018.

 “Kâo tŭ ư hrŏm prong hăng bruă čih tơlơi phiăn jao gơgrong hlâo kơ bruă pơtô pơhrăm amăng ruah nai pơtô, mă yua nai pơtô. Kiăo tui, Ding jum pơtô pơhrăm, Ding jum mơnuih mă bruă, tơhan rơka ruă hăng mơnuih mơnam lĕ ƀirô git gai čih pơkra bruă mă, akô̆ bruă, kơčăo bruă pơđĭ kyar abih bang ƀing nai pơtô tui phiăn pơkă ƀong prăk kơnuk kơna gah pô dưi wai lăng, lăi pơthâo gưl hmâo tơlơi dưi pơsit, git gai bruă nai pơtô mă bruă gah sang hră kơnuk kơna dưi hmâo anom hmâo tơlơi dưi jao, hơdôm bôh ƀirô wai lăng pơtô pơhrăm ƀudah anih anom pơtô pơhrăm git gai amăng ruah nai pơtô. Anai lĕ tơlơi pơkă yôm phăn biă amra dưi pơtlaih mơtăm hơdôm tơlơi tơnap, biă ñu lĕ jai hrơi jai kơtang tui gah rơbêh nai pơtô, kơƀah nai pơtô mơ̆ng lu thun hăng anai ƀơi lu anih anom”.

Gum pơhiăp kơ hơdôm tơlơi pơkă pơgang nai pơtô, khua pơ ala Nguyễn Văn Cảnh, Grŭp tơring čar Bình Định lăi nao tơlơi ăt dô̆ mơn ƀơi sa dua čô amĭ ama čơđai kơdŏng glăi nai pơtô, čơđai sang hră pơhiăp sat kơ nai pơtô bơdjơ̆ nao gru rup nai pơtô, bơdjơ̆ nao phiăn juăt pơpŭ nai pơtô. Khua pơ ala rơkâo:

 “Kâo rơkâo Mơta tơlơi 11 khom pơhrua nao tơlơi pơkă hơdôm tơlơi amĭ ama čơđai sang hră ƀu dưi ngă hăng nai pơtô lơm nai pơtô ngă hloh kơ rơnoh dưi, amĭ ama čơđai ăt ƀu dưi mơn pơsir tơlơi ƀu mơ-ak ƀơi anăp hăng nai pơtô mơ̆, khom hluai tui sang hră grŭp pơ ala kơ amĭ ama, ƀirô kơnuk kơna. Mơta tơlơi 9 Pơkă kơ bruă mă mơ̆ng nai pơtô, kâo rơkâo pơplih pơkra jing bruă mă hăng gơgrong mơ̆ng nai pơtô. Hăng sa dua bruă gơgrong mơ̆ng nai pơtô lĕ khom pơhrua nao bôh yôm hmâo tơlơi gum hrŏm mơ̆ng amĭ ama čơđai sang hră hăng mơnuih hrăm. Bơhmutu ñu, lơm thâo krăn tơlơi thâo mơ̆ng pô hrăm drơi pô nai ƀu dưi ngă tui bôh thâo mơ̆ng pô hrăm mơ̆ khom lăi pơthâo nao rai hăng amĭ ama čơđai”.

Gah hơdră bruă prăk blan hăng prăk djru hăng nai pơtô, khua pơ ala Dương Khắc Mai, Grŭp tơring čar Dak Nông pơdah pran jua tŭ ư prong hăng hră čih pơkra tơlơi phiăn pơkă prăk blan nai pơtô dăp dlông hloh amăng črăn pơkă prăk blan mă bruă čar, kiăng pơtlaih tơlơi tơnap hăng anô̆ phara hăng bruă nai pơtô. Khua pơ ala rơkâo bruă dăp črăn prăk blan khom nao hrŏm hăng anô̆ kơjăp mơ̆ng nai pơtô.

 “Amăng hơdôm hrơi rơgao. Tui anun lu nai pơtô hmâo hrăm, bôh thâo pran jua mă bruă klă biă. Hrŏm hăng anun ăt dô̆ mơn sa dua čô nai pơtô yap wot mơnuih apăn bruă gưl wai lăng ngă soh gah pran jua bruă mă pioh hmâo hơdôm tơlơi lăp rơngôt truh rơnoh khom pơsir. Kâo kiăng lăi tơlơi anai lĕ yua kơ hrơi anai ƀing ta glăk ngă tơlơi phiăn nao hrŏm hăng bruă ngă tui hơdră bruă phara prăk blan lĕ lơm ngă tui tơlơi phiăn khom hmâo hơdôm tơlơi pơkă pioh pơđĭ dlông anô̆ kơjăp nai pơtô amăng ƀrư̆ pơjing nai pơtô sit nik rơgơi gah bruă mă djơ̆ tui abih bang hơdôm tơlơi pơkă kơ pran jua mơ̆ng nai pơtô abih pran jua gơgrong hăng bruă mă”.

Pơhiăp amăng mông bơkơtuai mơ̆ng Khua pơ ala mơnuih ƀôn sang, Khua Ding jum pơtô pơhrăm Nguyễn Kim Sơn pơdah pran jua bơni hăng hơdôm tơlơi gum pơhiăp Khua pơ ala mơnuih ƀôn sang bơkơtuai kơ hră čih pơkra Tơlơi phiăn nai pơtô. Khua Ding jum lăi lĕ, hăng hơdôm tơlơi pơmin dŏng yua, tŭ ư prong, pơlir hơbit prong hmâo lăi pơthâo nao rai, dưi lăng ƀuh tơlơi tŭ ư mơ̆ng ƀing khua pơ ala; anun ƀu kơnong kơ tơlơi dŏng yua hăng hră čih Tơlơi phiăn nai pơtô ôh mơ̆ ñu dô̆ pơdah bruă gơgrong hăng bruă pơtô pơhrăm hăng lŏn ia dong./.