Tơring čar Kon Tum hơmâo dưm dăp kual pla phun sâm Ngọc Linh giăm 32.000 ektar ƀơi dua boh tơring glông Đăk Glei hăng Tu Mơ Rông (giăm 17.000 ektar kual pla phun hăng 15.000 ektar pla jum dar). Ơi Hồ Công Vũ, kơ-iăng khua anom bruă mă yua hăng pơđĭ kyar glai rưng, anom bruă wai lăng glai tơring čar Kon Tum brơi thâo, hlâo adih, bruă pơđĭ kyar kual pla phun sâm Ngọc Linh bưp lu tơlơi tơnap tap, gun găn. Tơlơi anai lĕ yua rơbêo 50% lŏn mơnai pioh pơđĭ kyar phun Sâm Ngọc Linh dong amăng kual wai lăng kjăp mơng kual glai rưng phun, ƀu brơi ngă bơdjơ̆ nao tui hơdôm tơlơi pơkă amăng tơlơi phiăn bơdjơ̆ nao lŏn mơnai, glai rưng. Tui ơi Hồ Công Vũ, tơlơi gun ră anai hơmâo tơlơi phiăn lŏn mơnai thun 2024 pơsir hĭ, ngă gêh gal kiăng mơnuih ƀôn sang, anom bơwih ƀong sĭ mơdrô, gong gai ƀon lan pơđĭ kyar kual pla phun sâm Ngọc Linh.

“Tơring čar Kon Tum hơmâo lu wŏt rơkâo hăng gơnong glông, hăng phrâo anai črăn 248 tơlơi phiăn lŏn mơnai thun 2024 brơi pla phun kyâo jrao gah yŭ glai rưng phun. Kơnuk kơna him lăng amra hơmâo tơlơi pơtrun kơ bruă pơđĭ kyar phun kyâo jrao gah yŭ glai rưng, tơlơi pơtrun anai hơmâo pơplih pơkra, mă tơlơi pơgôp hiăp tal 3. Anai lĕ tơlơi gal kiăng mơnuih pla phun sâm Ngọc Linh gah yŭ glai rưng lăi hrŏm, kual glai rưng phun hnun mơn”.

Ƀơi tơring čar Dak Nông, ơi Hồ Văn Mười, Khua Jơnum min mơnuih ƀôn sang tơring čar pơsit tong, tơlơi phiăn lŏn mơnai thun 2024 ngă gêh gal, pok rai tơlơi dưi kiăng tơring čar pơtrut pơđĭ kyar bơwih ƀong huă amăng đơ đam 254.000 ektar glai rưng, dưm dưm giăm 40% đơ đam kual glai rưng amăng tơring čar. Hơdôm tơlơi pơkă phrâo kơ rơnoh hăng brơi yua apah glai rưng amra djru bruă wai lăng ba glăi boh tŭ yua, sit biă ñu lĕ glai rưng sô hơđăp hăng glai phrâo pla lơm pơđĭ kyar bơwih ƀong huă gah yŭ glai rưng. Tơring čar Dak Nông glăk git gai hơdôm anom bruă, gơnong bruă, gong gai ƀon lan hơdôm boh tơring glông pok pơhai khut khăt hơdôm bruă jao kiăng tañ ba tơlơi phiăn lŏn mơnai thun 2024 djơ̆ sit nik, pơsir hĭ hơdôm bruă ječ kah hăng sui pơ anăp mơng ƀon lan.

“Tơlơi phiăn lŏn mơnai lĕ tơlơi čang rơmang prong mơng mơnuih ƀôn sang đơ đam dêh čar amăng anun hơmâo Dak Nông. Tơlơi phiăn hơmâo pơplih pơkra lăp djơ̆ biă mă, mut amăng tơlơi hơdip sit nik. Anai lĕ tơlơi gal brơi Dak Nông, kual Dap kơdư, mơnuih ƀôn sang pơđĭ kyar bơwih ƀong huă bơdjơ̆ nao lŏn ngă hmua, glai rưng”.

Kual Dap kơdư hơmâo giăm 2,6 klăk ektar glai rưng, amăng anun hơmâo giăm 2,2 klăk ektar lĕ glai sô hơđăp. Tơlơi phiăn lŏn mơnai thun 2024 hơmâo mơnuih ƀôn sang, anom bơwih ƀong sĭ mơdrô hăng gong gai djop ƀon lan lăng yôm amăng bruă ngă gêh gal djơ̆ tơlơi phiăn kiăng pơsir hĭ tơnap tap, gun găn amăng pơđĭ kyar bơwih ƀong huă amăng kual glai rưng, sit biă ñu pơđĭ kyar bơwih ƀong huă gah yŭ glai rưng, kual glai wai lăng phun. Hơdô hlăk ektar hơmâo pok phư amra jing tơlơi gal prong kiăng hơdôm boh tơring čar kual Dap kơdư pơđĭ kyar./.