Git gai jơnum, pơčrong sai boh yom phun, Kơ-iăng Khua git gai pơ ala mơnuih ƀôn sang dêh čar yă Nguyễn Thị Thanh lăi pơtong, Jơnum min apăn bruă phun pơ ala mơnuih ƀôn sang dêh čar pơdah pran jua hơdor tơngia prong prin hăng mơ-it tơlơi bơni hơ-ơč hiam klă hloh kơ nai pơtô tha rơma, sui thun, ƀing pơ ala mơnuih ƀôn sang dêh čar tom ngă hăng hlăk ngă nai pơtô hrăm hră, ngă bruă amăng gơnong bruă pơtô hăng pơjuăt, hrŏm hăng abih bang giăm 1,6 klăk čô nai pơtô hrăm hră, mơnuih apăn bruă gah anom bruă pơtô hrăm amăng đơ đam dêh čar.

Ƀing khua mua pơdah pran jua tŭ ư hrŏm prong anŏ kiăng biă mă čih pơkra Tơlơi phiăn Nai pơtô hrăm hră kiăng ngă pơgiong glông bruă tơlơi phiăn kơ nai pơtô, laih dơ̆ng hơmâo jơlan hơdră djru phara pioh akŏ pơdong hăng pơđĭ kyar tui khul mơnuih ngă bruă nai pơtô hrăm hră; pơsir hĭ tơlơi kơƀah amăng bruă wai lăng mơ̆ng kơnukkơna gah bruă nai pơtô hrăm hră ră anai. Tui hăng pô pơ ala ơi Trần Văn Thức, grup mơ̆ng tơring čar Thanh Hóa, bruă iâu pơmut nai pơtô amăng sang hră kơnuk kơna glăk ngă tui djơ̆ tơlơi phiăn hrŏm abih bang kơ bruă iâu pơmut mơnuih mă bruă sit nik, anai ăt hơmâo mơ̆n anŏ aka ƀu gêh găl, ngă hơmâo anih rơbêh nai, anih kơƀah mơnuih pơtô hrăm hră, tơl ƀu dưi pơtô hơdôm mơta tơlơi hrăm pok pơhai amăng hơdră pơtô hrăm gưl phun thun 2018.