Amăng 2 thun 2024 hăng 2025, Lâm Đồng amra pơsir brơi 1.972 boh sang tơ̆i, sang hluh kơ mơnuih ƀôn sang ƀun rin, giăm ƀun rin amăng tơring čar. Amăng anun, 1.580 boh sang man phrâo hăng 392 boh sang pơhrêp, pơkra glăi, rơnoh prăk abih tih 88 klai 800 klăk prăk. Kơnong amăng thun 2024, Lâm Đồng hơmâo pơkă tơhnal pơtrun brơi pơsir 1000 boh sang kơ mơnuih ƀun rin, amăng anun man phrâo truh 840 boh sang hăng pơkra ming glăi 166 boh sang.

Tui hăng ơi Phạm S, Kơ-iăng Khua jơnum min mơnuih ƀôn sang tơring čar Lâm Đồng lăi, truh ră anai, hơdră gum tơngan hrŏm pơsir sang tơ̆i kơ mơnuih ƀôn sang ƀun rin ƀơi Lâm Đồng tŭ mă lu tơlơi djru hrŏm mơ̆ng lu sang bruă, tơpuôl mơnuih mơnam hăng djop drơi pô ngă bruă sĭ mơdrô pơčruh hrŏm rơnoh prăk hơmâo truh 45 klai. Hăng rơnoh prăk anai amra pơhlôm brơi djop ngă tui bruă pơsir hĭ sang tơ̆i, sang răm amăng thun anai djru brơi mơnuih ƀun rin djơ̆ tơhnal pơkă.