Tơdơi kơ hmư̆ hă lăi pơthâo kơ jơnum lok 7, khua mua pơ ala tal XV hăng boh tơhnal grup pơ ala mơnuih ƀôn sang dêh čar ƀơi tơring čar ngă tui mơ̆ng tơdơi kơ jơnum lok 6 truh ră anai, mơnuih ruah khua tơring čar Dak Lak hơmâo lăi pơthâo lu tơlơi rơkâo pơtum nao amăng bruă pơhlôm nua, prăk blan, sang dŏ, pơgang anŏ tŭ yua kơ mơnuih mă bruă apah....

Rơđah biă ñu, mơnuih ruah khua rơkâo brơi ngă gêh găl kơ mơnuih mut phung, mơnuih mă bruă apah dưi blơi hră pơhlôm nua ia jrao laih anun dưi tla prăk kah hăng ƀing hơmâo hră pơhlôm nua ia jrao sit nao pơkă lăng hăng pơjrao duăm ruă ƀơi djop sang ia jrao kơnuk kơna, pơhrŏ ƀiă thun mă bruă, tañ glăi pơdơi abih thun kơ hơdôm bruă mă gleh glar kah hăng ƀing nai pơtô gưl muai, mơnuih ngă kông ñơn amăng sang măi mă bruă lu tơlơi hŭi rơhyưt, hơmâo put jrao, mă bruă kơtrâ̆o....Hrŏm hăng anun, lu mơnuih ruah khua rơkâo kơnuk kơna sem glăi, hơmâo jơlan hơdră man pơdong sang kơ mơnuih mơnam tơnap tap, sang nua rơgêh ƀiă sĭ kơ mơnuih mă bruă apah blơi.

Ăt amăng mông bưp mơnuih ruah khua anai mơ̆n, Grup pơ ala mơnuih ƀôn sang dêh čar ƀơi tơring čar Dak Lak hơmâo ƀơk 100 anung gơnam kơ mơnuih mă bruă sang anŏ tơnap tap ƀơi tơring čar.