Hăng đơ đam lŏn prong 70m2, hơmâo dua anih đih, sa anih čơkă tuai hrŏm hăng sang apui, sang juă glai, sang dŏ phrâo djru sang anŏ yă Nay H’Doănh, ƀơi plơi Mơ Nai Trang, să Ia Piar, tơring glông Phú Thiện dưi hơđong dŏ dong ƀong huă laih. Hrơi rơmet rơmot gơnam mut dŏ amăng sang phrâo, prong, hiam, ñu ol kơdor ră ruai: Hlâo adih, sang anŏ ñu hơdip amăng sang ƀu rup ôh, hơjan lĕ ƀlĕ, pơ-iă lĕ hang. Bơ hơne hơmâo sang phrâo baih jing hơđong pran jua bơwih ƀong, ngă bruă laih, ană bă hơmâo nao hrăm hră mơn. Tơlơi hok mơ-ak mơ̆ng sang anŏ yă Nay H’Doănh ăt jing tơlơi mơak mơ̆ng 335 boh sang anŏ pơkŏn hơmâo man pơdong sang dŏ phrâo ƀơi tơring glông Phú Thiện:“Hơmâo Ping gah, Kơnuk kơna lăng ba man pơkra brơi sang dŏ tui anai, kâo hơmâo pran biă yơh. Ƀu pơmin ôh dưi hơmâo sang hiam tui anai. Bơni kơ ƀing khua, bơni kơ jơlan hơdră anai hơmâo djru ba sang anŏ gơmơi hơmâo tơlơi hơdip mơak hloh”.

Hrŏm hăng tơring glông Phú Thiện, tơring glông Čư̆ Prong - kual hơmâo rơbêh 1.000 boh sang dŏ tơ̆i, sang ƀu yik yuk kiăng ruh pơkra phrâo - ăt glăk gir ngă giong bruă man pơdong sang dŏ phrâo djơ̆ hrơi pơkă. Pơsit anai jing bruă yôm phun, hơmâo tơlơi pơmin hiam, Grup git gai jơlan hơdră lŏm lui sang dŏ tơ̆i sang phô̆ mơ̆ng tơring glông hơmâo jao bruă kơ ding kơna hyu pel ĕp, sem lăng, pơtrut ngă bruă. Ơi Đinh Văn Dũng - Khua ping gah tơring glông, Khua Jơnum min pơ ala mơnuih ƀôn sang tơring glông Čư̆ Prong, khua grup git gai brơi thâo, tơring glông hơmâo iâu pơthưr abih bang, pơƀut ngă bruă kiăng pơklaih brơi tơlơi tơnap, pơphun ngă tŭ yua jơlan hơdră anai. Hrŏm hăng anun, tơring glông hơmâo pơƀut djŏp prăk hơmâo, brơi 54 klai či ngă bruă. Hơdôm boh să pôr pơthâo, iâu pơthưr mơnuih ƀôn sang jak iâu pô sang hơmâo man pơdong sang phrâo, sang anŏ iao gah ngă hrŏm hăng ling tơhan gum man pơkra sang dŏ. Truh ră anai, mrô sang hơmâo man pơdong hăng ngă giong mơ̆ng tơring glông rơgao kơ 70% laih. Ping gah tơring glông glăk gir ngă bruă, kiăng man giong abih bang 997 boh sang hlâo lơ 30/6/2025, pơhlôm 100% mrô sang dŏ rin, rin ƀơ ƀiă hơmâo sang dŏ phrâo:“Rim hrơi gơmơi pơƀut iâu pơthưr man pơdong mơ̆ng 8 truh kơ 10 boh sang. Rim blan, rim tơđar, Grup črâo bruă mơ̆ng tơring glông lăng glăi abih djŏp bruă kiăng ngă či pơtrut pơsur; laih dong iâu pơthưr djŏp gưl djru hrơi mă bruă. Tơring glông hơmâo 75% hrơi mă bruă mơ̆ng hơdôm boh sang anŏ, dŏ glăi lĕ gơmơi jak iâu jơnum min djŏp djuai ania mơnuih mơnam, khul grup hăng ling tơhan pơ tơring glông ču ba hrơi mă bruă. Hrŏm hăng anun, nao lăng kiăng sang dŏ hơmâo pơkra klă”.

Ră anai, tơring čar Gia Lai hơmâo ngă giong 93% jơlan hơdră lŏm lui sang dŏ tơ̆i sang phô̆. Amăng mrô 17 boh tơring glông, plơi prong jing hơmâo laih 10 boh tơring ngă giong laih, hơdôm boh tơring dŏ glăi lêng kơ hơmâo mơ̆ng 70% truh kơ 90% akŏ bruă. Bruă anai brơi ƀuh tơlơi git gai hmao klôn, lăp djơ̆ mơ̆ng djŏp gưl Ping gah, tơlơi gum ngă mơ̆ng abih bang anom bruă kơđi čar hăng abih bang mơnuih ƀôn sang.

Bruă lŏm lui sang dŏ tơ̆i sang phô̆ ƀơi Gia Lai jing pơsit brơi rơđah rơđông tơlơi git gai črâo bruă klă, hăng pran jua gir run kơtang mơ̆ng djŏp gưl ping gah. Mơ̆ng tơring čar truh kơ plơi pla, bruă kah pơpha bruă mă, kah pơpha hrơi mông ngă bruă, jơnum rim blan hăng pơtŏng glăi bruă mă rim wơ̆t hrơi tơjuh jing pơtrut pơsur bơkơtưn ngă bruă. Hơdôm khul grup ping gah yơh phun, nao hlâo iâu pơthưr mơnuih ƀôn sang. Pran jua “thâo khăp pap hơdor tơngia, hla hnil anung ba hla tơ̆i” hrŏm hăng tơlơi pơtrun “hlơi hơmâo pran djru pran, hrơi hơmâo gơnam djru gơnam” jing bang hyu djŏp laih. Abih bang khul grup kah hăng Kông an tơring čar, Binh đoàn 15, tơhan pơgang guai hăng djŏp anom bruă tơhan blah ngă ƀơi tơring čar gum hrŏm hrŏm gong gai, mơnuih ƀôn sang ngă tŭ yua jơlan hơdră anai. Tơlơi anai ngă hơmâo pran kơtang dưi man pơdong hơdôm rơbâo boh sang hăng lu rơnoh pơkă hloh kah hăng rơgêh hloh, tañ hloh, kjăp hloh...kơ hơdôm boh sang anŏ rin, rin ƀơ ƀiă, sang anŏ hơmâo anăn kơnuk kơna djru. Ơi Rahlan Chung - Kơ-iăng khua ping gah tơring čar, Khua Jơnum min mơnuih ƀôn sang tơring čar Gia Lai brơi thâo:“Bruă ruh hĭ sang dŏ tơ̆i, sang phô̆ khŏm hơmâo ngă rơđah rơđông, kiăo tui tơlơi kiăng mơnuih ƀôn sang, dưm kơnar, pơhlôm klă hăng tŭ yua. Khŏm iâu pơthưr abih bang tơlơi hơmâo mơ̆ng anom bruă kơnuk kơna, anom bơwih ƀong sĭ mơdrô, khul grup hăng abih bang mơnuih ƀôn sang, wơ̆t amăng tơring čar hăng gah rơngiao. Hrŏm hăng anun, kiăng iâu pơthưr mơnuih ƀôn sang gum djru kiăng sang dŏ kjăp hloh. Laih dong, hyu pel ĕp, sem lăng, bơni mơtăm mơnuih mơnam, khul grup ngă bruă klă”.

Jơlan hơdră lŏm lui sang dŏ tơ̆i, sang phô̆ ƀơi Gia Lai glăk pơtrut pơsur kiăng ană plơi hrưn đĭ pơklaih rin rơpa, hơđong tơlơi hơdip, djru akŏ pơdong plơi pla Gia Lai jai hrơi đĭ kyar, pơdrong sah, thâo rơgơi. Amăng anun, hơdôm khul grup Ping gah pơtrut tui tơlơi gơgrong bruă jing “hla gru nao hlâo” pơtô brơi, pơtruh nao rau hăng pơjing bruă mă bang hyu djŏp anih, bang hyu pran jua gum pơgôp djuai ania, anăp nao đĭ kyar hơđong kjăp amăng tơring čar./.