Hơdôm hrơi rơgao, sang anŏ ơi K’Thiệu, dŏ amăng ƀut plơi 1, să Bảo Lâm 4, tơring čar Lâm Đồng, hur har pran jua yua hơmâo sang prong prong rơhaih phrâo mut dŏ. Ñu brơi thâo, sang anai man pơdong abih tih 220 klăk prăk, amăng anun Kơnuk kơna djru brơi 50 klăk prăk, mrô prăk dŏ glăi yua sang anŏ pơkrem hrŏm hăng tơlơi gum pơgôp mơng kơnung djuai. 

“Kâo hok mơ-ak biă mă lơm hơmâo Ping gah hăng Kơnuk kơna đing nao lu kơ tơlơi hơdip neh met wa djuai ania ƀiă ƀun rin kual ataih, asuek kar hăng ƀing gơmơi. Hơmâo sang prong rơhaih tui anai ngă kâo hơđong pran jua bơwih ƀong huă, bơyan hơjan huăi hŭi ia tơdjoh kar hăng hlâo anun dong tah”.

Yap truh lơ 30/6, tơring čar Lâm Đồng (hơđăp) hơmâo pơgiong bruă pơkra ming hăng man pơdong phrâo 2.044 boh sang djru brơi sang anŏ ƀun rin, giăm ƀun rin tui jơlan hơdră ruh pơkra glăi sang dŏ jang jai, sang tơ̆i phŏ. Ƀu djơ̆ kơnong pơgiong tañ ƀiă 2 blan, tơring čar anai ăt rơgao hơnong pơkă 236 boh sang pơhmu hăng hơnong pơkă.

Ăt pơgiong tañ ƀiă jơlan hơdră ruh pơkra glăi sang dŏ jang jai, sang tơ̆i phŏ hlâo 2 blan, tơring čar Gia Lai hơmâo jak iâu pơgôp ngăn rơnoh kiăng ngă tui tŭ yua jơlan hơdră. Hrŏm hăng ngăn drăp djru brơi, lu anih anom hơmâo gum hrŏm hăng pran jua “hlơi hơmâo prăk djru prăk, hlơi wăn djru hrơi mă bruă”. Lơm anun, tơhan kông ang gơgrong phun amăng bruă pơdŭ pơgiăng, djru man pơdong ƀơi hơdôm boh ƀon lan. Hơdôm anom bruă ling tơhan anun lĕ Quân đoàn 34, Binh đoàn 15 hơmâo pơgôp abih bang giăm 40.000 hrơi mă bruă, pơgôp man pơdong hơdôm boh sang sir kjăp, bă blai pran khăp ling tơhan-mơnuih ƀôn sang. Đại tá Khuất Bá Cao-Khua git gai Ping gah, kơ-iăng khua anom bruă git gai ling tơhan Binh đoàn 15 pơsit tong:

“Bruă ruh pơkra glăi sang tơ̆i phŏ, sang dŏ jang jai yôm phăn biă mă djru brơi neh met wa, mơ̆ lu hloh lĕ mơnuih djuai ania ƀiă amăng ƀon lan hơmâo anih dŏ sir kjăp: djru brơi neh met wa pơđĭ kyar bơwih ƀong huă. Mơng anun, Binh đoàn 15 pơgôp hrŏm hăng ƀon lan man pơdong plơi pla phrâo hăng pơhlôm rơnuk rơnua, hơđong măng mơnuih mơnam ƀơi kual giăm guai”.

Hăng ƀing mơnuih dưi tŭ mă tơlơi djru ba, tơring čar Gia Lai (hơđăp) hơmâo pơgiong 100% hơnong pơkă djru brơi sang dŏ kơ hơdôm boh sang anŏ tui hơdră djru, mơnuih djru hơkrŭ; sang anŏ ƀun rin, giăm ƀun rin. Laih dong, hơdôm boh ƀon lan ăt pok pơhai hơdôm jơlan hơdră djru brơi tơlơi hơdip, djru brơi mơnuih ƀôn sang pơklaih mơng ƀun rin hơđong kjăp. Yă Ksor H’Phương-Khua hơđăp git gai Ping gah să Ia Rtô (hơđăp), ră anai lĕ să Ia Sao brơi thâo:

“Tơdơi kơ pơgiong jơlan hơdră ruh pơkra glăi sang dŏ jang jai, sang tơ̆i phŏ amăng să, ƀing gơmơi tŏ tui pel ĕp kiăng djru brơi hơdôm boh sang anŏ pơđĭ kyar bơwih ƀong huă, anun lĕ djru brơi rơmô, hlô rông hăng ĕp brơi anih čan prăk mă kmlai ƀiă”.

Hơdôm hrơi blung a blan 7 anai, tơring čar Gia Lai hơmâo pơgiong abih bang rơbêh 8.100 boh sang djru brơi sang anŏ tơnap tap, tañ ƀiă 2 blan pơhmu hăng hơnong pơkă. Anai ƀu djơ̆ kơnong lĕ anih dŏ sir kjăp đôč ôh mơ̆ ăt pok rai tơlơi čang rơmang sa tơlơi hơdip hơđong ƀiă dong, djru brơi hơdôm rơbâo boh sang anŏ dưi hrưn đĭ, ba glăi tơlơi čang rơmang anăp nao tơlơi hơdip hiam klă ƀiă. Ơi Rahlan Chung-Kơ-iăng Khua git gai Ping gah, Khua Jơnum min mơnuih ƀôn sang tơring čar Gia Lai brơi thâo:

“Anai lĕ jơlan hơdră bă blai pran khăp pap ană mơnuih. Anun lĕ đing nao bruă gum djru brơi ƀing mơnuih ƀun rin, ƀing tui hơdră djru hăng ƀing mơnuih ƀu hơmâo anih gơnang nao amăng đơ đam tơring čar. Jơlan hơdră hơmâo pơtrut tơlơi mut hrŏm mơng djop anih anom kơđi čar, djop gưl, gơnong bruă, ling tơhan hăng mơnuih ƀôn sang. Yua anun, tơring čar Gia Lai hơmâo pơplih pơkra hăng ngă tañ ƀiă kiăng pơsit pơgiong jơlan hơdră ruh pơkra glăi sang dŏ jang jai, sang tơ̆i phŏ amăng amăng ƀon lan”. /.