Sa hơdră bruă pok prong hơmâo Khul pơlir hơbit đah kơmơi tơring glông Thuận Châu (hơđăp) gum hrŏm kjăp hăng gơnong bruă ia jrao Sơn La pok pơhai amăng 23 boh să tơnap tap hloh. Hăng jơlan gah “gru grua nao hlâo, tơlơi gum djru kiăo tui tlôn”, ƀing apăn bruă amăng khul hăng anih anom ia jrao hơmâo nao tơl rĭm boh plơi pla, gir run pơtrut pơsir, pơplih “tơlơi pơmĭn, bruă mă”. Yă Lường Thị Thanh Thủy, Kơ-iăng Khua git gai Ping gah să Thuận Châu, Khua khul pơlir hơbit đah kơmơi hơđăp tơringt glông Thuận Châu (hơđăp) brơi thâo, rơnoh prăk djru tơkeng ană bă rơnuk rơnua anăp nao ƀing apăn bruă amăng khul, ding kơna đah kơmơi hăng sit biă ñu lĕ ƀing đah kơmơi djuai ania ƀiă lĕ ƀing mơnuih dưi tŭ mă hơdră djru anai. Yua anun, mrô đah kơmơi djuai ania ƀiă hơmâo tŭ mă hơdră djru anai lĕ lu biă mă dong mơng thun 2021.

“Amăng rơwang tal 1 (2021-2025), Thuận Châu hơmâo pok pơhai tong hơdôm boh tơhnal djru ƀă ană bă tơl hơdôm boh ƀon lan. Yua anun ƀing đah kơmơi djuai ania ƀiă hơmâo tŭ mă hơdră djru ba kiăng tơkeng ană bă rơnuk rơnua anai lu biă mă”.

Kiăng pơhlôm tŭ yua, Khul pơlir đah kơmơi tơring glông Thuận Châu (hơđăp) hơmâo pơphun anih pơtop hrăm hrưn đĭ ngă bruă klă. Ƀing mơnuih mut hrŏm lĕ ƀing đah kơmơi hăng ƀing amăng bruă anom ia jrao să, ƀing mơnuih gơgrong bruă djru brơi ƀơi ƀon lan, Khul ăt hơmâo mă yua ngăn rơnoh mơng rơnoh prăk djru kiăng kơ djru brơi ƀing đah kơmơi djuai ania ƀiă dưi tơkeng ană bă rơnuk rơnua ƀơi hơdôm boh sang ia jrao kơnuk kơna pơdong.

Ăt tui yă Lường Thị thanh Thủy, dong mơng thun 2021-2024, tơring glông Thuận Châu (hơđăp) hơmâo djru brơi rơbêh 1.600 čô đah kơmơi djuai ania ƀiă kơ sa, dua bruă tơkeng ană bă rơnuk rơnua. Abih tih mrô prăk duh brơi ƀing đah kơmơi tơkeng ană bă truh 2,4 klai prăk. Anai lĕ sa amăng hơdôm boh ƀon lan hơmâo mrô djru hăng mrô đah kơmơi djuai ania ƀiă djru tơkeng ană bă lu hloh amăng tơring čar Sơn La.

“Hlâo kơ pok pơhai rơnoh prăk djru anai (hlâo kơ thun 2021), mrô đah kơmơi djuai ania ƀiă nao khăm kian pruăi tui tơđar hăng tơkeng ană ƀơi sang ia jrao dŏ aset, kơnong giăm 600 čô đah kơmơi rĭm thun. Samơ̆, tơdơi kơ 3 thun pok pơhai, rơbêh 1.000 čô đah kơmơi hơmâo tŭ mă tơlơi djru hăng nao tơkeng pơ sang ia jrao. Yua anun, bruă bơwih brơi tơlơi suaih pral ƀing amĭ hăng ană nge hơmâo pơplih tong ten, mrô đah kơmơi djai lơm tơkeng hrŏ trun lu biă mă, mrô čơđai nge tơkeng rai djai ăt hrŏ lu mơn”.

Hơdôm boh than ba glăi anai lĕ ngă atur yôm phăn kiăng Khul pơlir đah kơmơi Thuận Châu rơkâo đĭ gơnong glông, tơring čar hăng hơdôm gơnong bruă bơdjơ̆ nao tŏ tui pok pơhai rơnoh prăk djru anai amăng rơwang tal 2 (2026-2030), kiăng tŏ tui djru brơi đah kơmơi djuai ania ƀiă amăng ƀon lan. Hăng giăm 2,5 klai prăk hơmâo jao trun, rơbêh 1.000 čô đah kơmơi ƀơi Thuận Châu hơmâo djru brơi. Rơbêh ha rơbâo čô ană nge tơkeng rai hiam drơi jăn, rơbêh ha rơbâo đah kơmơi hơmâo bơwih brơi klă hloh. Amai Lò Thị Hồng, sa čô đah kơmơi djuai ania Thái brơi thâo:

“Hlâo adih ƀing gơmơi huăi nao pơ sang ia jrao, ăt yua ƀu hơmâo prăk. Ră anai hơmâo ƀing apăn bruă nao tơl sang pơtrut pơsur, laih dong djru brơi prăk ƀong, prăk nao rai, ƀing gơmơi hơđong pran jua biă. Ană bă tơkeng rai suaih pral ƀing gơmơi hok mơ-ak yơh”.

Akŏ bruă mrô 8 ƀơ djơ̆ kơnong ba glăi ngăn rơnoh brơi kual tơnap tap đôč ôh mơ̆ ăt yôm ƀiă dong, ba glăi tơlơi thâo thăi, pơplih tơlơi pơmĭn hăng jao glăi tơlơi rơnuk rơnua brơi ƀing amĭ kual čư̆ siăng, pơgôp pơjing rơnuk hơdip kơñ pơgi suaih pral hăng bơkơnar ƀiă dong./.