Nao pơ̆ kual phun mă bruă čar să Ea Rôk, tơring čar Dak Lak pioh ngă hră pơ-ar pơsit hrơi tơkeng kơ ană, ayong Đinh Thanh Hùng (ƀơi thôn 3) ƀuh heng hong, luk puk biă hăng bruă mă yua mrô glăk dưi pok pơhai. Tơdơi kơ ƀing hlăk ai tơdăm dra dô̆ gak ƀơi anai abih pran jua pơtô brơi, ñu amuñ amĕ ngă tui hơdôm yak. Kơnong amăng hơdôm pluh mơnit, djop mơta hră pơ-ar hmâo ngă giong gêh gal biă. Ayong Đinh Thanh Hùng lăi pơthâo:

“Tơdơi kơ dưi hmâo ƀing hlăk ai, tơdăm dra pơtô brơi lĕ kâo čih hră lăi pơthâo hăng hơdră ngă ƀơi plăng mă yua telephone. Ƀing hlăk ai, tơdăm dra djru kâo hur har pran jua biă hăng rơđah rơđông dong, amuñ thâo hluh anun kâo ăt dưi mă yua mơn hăng hơdor hơdră ngă tui kiăng mă yua kơ tal tơdơi”.

Ƀơi Anom mă bruă čar să Ea Rôk, rim hrơi hmâo ƀiă biă mă ñu 8 čô mơnuih hlăk ai dô̆ gak, djru mơnuih ƀôn sang pơtô brơi bruă ngă hră pơ-ar mrô. Kơnong amăng rơbêh kơ 1 blan pok pơhai, grŭp hlăk ai 40 čô mơnuih hmâo djru laih ha rơtuh wot čô mơnuih ƀôn sang ngă tui tơbêh 150 pok hră pơ-ar bruă čar, 200 mơta hră pơ-ar ngă hră pơsit hrơi tơkeng kơ ană bă, pơdô̆ rơkơi bơnai, lăi pơthâo mơnuih djai, hrŏm hăng ha rơtuh mrô pơsit hră pơ-ar pioh mă bruă kơ bruă ba mut amăng măi.

Amai Ngô Bảo Ngọc, mơnuih hlăk ai gum hrŏm djru ba ƀơi anai lăi pơthâo, rim hrơi hmâo lu mơnuih ƀôn sang nao ngă hră pơ-ar. Lu neh wa djuai ania ƀiă akă rơđah tơlơi Yuan, akă hmâo mrô mă yua pơsit anăn păn rơnoh 2, đa ƀu hmâo telephone hơdeč hmar ƀudah akă thâo hluh rơđah rơwang ngă hră pơ-ar mrô kiăng ngă.

“Ƀing gơmơi hmâo gơgrong hmâo pơtô brơi neh wa nao pơ̆ kông ang să Ea Rôk pioh pơsit anăn hăng djru neh wa pơhrua mut hơdôm hră lăi pơhing kơ pô, hră lăi pơthâo lơm ngă hơdôm mơta hră pơ-ar djru neh wa ngă hră pơ-ar ƀơi anăp amăng măi kompiutơr ƀudah telephone mơ̆ng Jơnum min mơnuih ƀôn sang să”.

Ƀu kơnong kơ djru ƀơi hơdôm anom mă bruă čar, hơdôm khul hlăk ai tơdăm dra nao gum djru dô̆ pơphun nao tơl hơdôm kual mơnuih ƀôn sang dô̆, nao rim sang anô̆, biă ñu hơdôm bôh sang anô̆ ƀu hmâo hlơi kơnang, mơnuih tha rơma, mơnuih djuai ania ƀiă, pioh lăi pơhing, dưm anăn mă yua mrô, pơtô mă yua hơdôm anăn amăng măi djru kơ tơlơi hơdip mơda hăng bruă čar. Ayong Ninh Tiến Đạt, Kơ-iăng Khua git gai Khul hlăk ai să Quảng Phú, tơring čar Dak Lak lăi pơthâo:

“Khul hlăk ai tơdăm dra nao tơl sang lăi pơhing djru mơnuih ƀôn sang amăng bruă dưm hơdôm anăn mă yua mrô, ngă hră tuh jia, mă yua glông anăn mrô ƀơi anăp lăi pơthâo nao rai amăng măi, mơ̆ng anun djru mơnuih ƀôn sang thâo hloh kơ hơdră mă bruă gong gai 2 gưl ăt kah hăng mă yua hơdôm anăn amăng măi mrô gêh gal hloh”.

Mơ̆ng akô̆ blan 7 truh ră anai, lơm hơdră gong gai 2 gưl dưi pok pơhai ha amăng plĕ, Khul hlăk ai tơring čar Dak Lak hmâo iâo pơhrui hăng djă pioh 131 grŭp hlăk ai djru pơplih mrô, “Pơtô mơnuih ƀôn sang mă yua măi mrô”, tŭ mă mơ̆ng hơdôm grŭp pơplih mrô mơnuih mơnam hlâo kơ anun. Ƀing hlăk ai, tơdăm dra tŭ mă klă hăng mă yua hơdră mă yua măi mok amăng hơdôm bruă mă gum djru. Mơ̆ng anun hmâo djru truh kih hơdôm pluh rơbâo wot čô mơnuih ƀôn sang ƀơi hơdôm anih anom plơi pla, kual čư̆ siăng, kual asuek kual ataih, djru ngă ƀiă hĭ rơwang mrô hăng pơđĭ bôh thâo tŭ mă bruă mă yua măi mok mrô mơ̆ng mơnuih ƀôn sang.

Tui hăng ayong Lương Minh Tùng, Khua git gai Khul hlăk ai tơring čar Dak Lak, pơ̆ anăp anai, khul hlăk ai amra dưi pơhrăm dơlăm pioh pơđĭ bruă mă, pơhlôm klă hloh bruă djru gong gai hăng mơnuih ƀôn sang lơm pơplih mrô.

“Pơsit anih anom ngă tui bruă gum djru lĕ ƀơi hơdôm boh anom mă bruă čar ƀơi hơdôm bôh să, phường, yua anun bruă ngă kơjăp amra lu hloh. Khul hlăk ai tơring čar ăt hmâo pok pơhai mơn pơhrăm phun ñu hơdôm bôh yôm pơplih mrô. Pơkă hlâo pơ̆ anăp Grŭp apăn bruă Hlăk ai ăt amra jak iâo mơn ƀing juăt bruă hăng khua mua hơdôm bôh gơnong bruă, anom bruă, pơtô brơi kơjăp hơdôm mơta anăn mă yua ƀơi Anom mă bruă čar pioh ƀing gơyut gơgrong phun amra thâo, tŭ mă hăng pok pơhai ha amăng plĕ, ba glăi bôh tơhnal”.

Hăng pran jua gơgrong hăng ngă juăt tañ hăng hơdră mă yua măi mok, khul hlăk ai, tơdăm dra Dak Lak glăk măng ƀrư̆ jing jơlan tô nao rai ba glăi bôh tơhnal kơplah wah mơnuih ƀôn sang hăng gong gai amăng bruă pơdŏng gong gai mrô, mơnuih mơnam mrô, anăp nao tơhnal pơkă yua kơ sa tơlơi hơdip gêh gal hăng rơnuk anai hloh kơ mơnuih ƀôn sang./.