Tơdơi kơ hmư̆ hră lăi pơthâo hăng pơgôp hiăp mơ̆ng khua mua, ƀing pơ ala mơnuih ƀôn sang ta dŏ ƀơi dêh čar Lao, ơi Tô Lâm pơdah rai pran jua hơ̆k mơak lơ̆m ƀuh khul mơnuih Việt Nam thâo gum pơgôp pơdjru nao rai, djă pioh gru grua hiam djuai ania, ngă tui djơ̆ tơlơi phiăn dêh čar arăng, mut phung mơak hăng mơnuih ƀôn sang Lao laih anun jing ƀing ngă gong jơlan pơtruh brơi bruă ngă giăng mah hiam mơak kơ dua djuai ania.

Lăp bơni biă mă ñu, lu sang anŏ djuai ania Việt Nam, ăt đing glăi kơ plơi pla, lŏn ia ta pô, đing nao pơtô hrăm kơ khul čơđai muai djă pioh boh pơhiăp djuai ania Viet, gru grua đưm hăng gru grua hiam djuai ania. Lăi pơtong, mơnuih ƀôn sang dêh čar ta mah dŏ pơ dêh čar tač rơngiao hai, ăt jing sa črăn ƀu dưi pơčlah ôh hăng čơđeh asar drah kơtăk djuai ania, Khua git gai ping gah lăi pơtong, ping gah hăng kơnuk kơna ăt amra ngă pơgiong jơlan hơdră djru ba mơnuih ƀôn sang ta dŏ ƀơi dêh čar tač rơngiao glăi tuh pơ alin ngă bruă, hrăm bruă, kơsem min, pơphun bruă mă sĭ mơdrô, pơtô hrăm tơlơi Viet, jao glăi boh thâo ia rơgơi kơsem min, lir hơbit pơtrut lu bruă ngă mơak adoh suang, ngă gơyut gơyâo plah wah amăng mơnuih ƀôn sang, mơ̆ng anun kơtưn tơlơi lir hơbit khua mua anih jưh pơ ala hăng mơnuih ƀôn sang dŏ ƀơi tač rơngiao đing glăi kơ lŏn ia ta pô.