Khua git gai Ping gah dêh čar ơi Tô Lâm lăi pơtong: pơtô pơjuăt, ia jrao hăng gru grua lĕ hơdôm atur phun amăng dêh čar, anai lĕ hơnong pơkă rah, tơlơi pơtrut kiăng pơđĭ kyar ană mơnuih - gơnam yôm hloh amăng dêh čar. Khua git gai Ping gah brơi thâo hơdôm jơlan hơdră tui hơnong pơkă dêh čar amăng hrơi blan rơgao ăt ngă tui raih daih, luk puk, pơčlah ngăn rơnoh, aka ƀu rơđah hơnong pơkă akŏ phun hăng aka ƀu tong ten tơlơi glăm ba phun.

Hăng bruă ia jrao, Khua git gai Ping gah rơkâo pơplih mơng đing nao pơjrao brơi klă hloh hơdai hơdai nao bơwih brơi tơlơi suaih pral hăng pơgang brơi, pơsir hĭ abih anŏ bơdjơ̆ mơng ayuh hyiăng, ia hơdjă, mơnong ƀong huă hơdjă-hơdôm anŏ ngă čeh čar klin kman. Tơdah ƀu dưi pơgang mơng phun akha, mah tuh pơ alin hơdôm hơpă tŭ mơn, lu sang ia jrao ăt ƀu dưi pơhlôm lăp djơ̆ tơlơi rơkâo.

“Hăng bruă ia jrao, akŏ phun lĕ bơwih brơi tơlơi suaih pral blung a, kiăng ba bruă pơgang lĕ blung hlâo. Mơ̆ ră anai glăk anăp nao bruă khăm pơjrao brơi, anun lĕ jing bruă khŏm ngă đôč-yua bruă pơgang hlâo aka ƀu klă anun ngă kman čeh čar. Kiăng pơsit tong rĭm bruă phara, bruă hơget glăk aka ƀu klă ? 5 thun dong ƀing ta amra djop prăk mă yua hă ƀŭ ? kiăng kơ ngă rơđah tơlơi anai. Tơlơi kơsô̆ amăng rŏng lŏn tơnah dưi pơgang hĭ abih laih, ƀing ta pioh lar hyu na nao anun bruă pơgang rơngiă prăk kak. Ruă bơbrah hơtai hiưm pă ñu, lar hyu hiưm ñu ? Kâo pơmĭn jơlan hơdră dêh čar lĕ kiăng đing nao tong ten, hơmâo hơnong pơkă”.

Kơ bruă pơtô pơjuăt, Khua git gai Ping gah lăi pơtong, kiăng tuh pơ alin lăp djơ̆ amăng anih anom, mơnuih mă bruă, jơlan hơdră pơtô hrăm, dưm dăp glăi sang hră, jŭ yap glăi mơnuih mă bruă biên chế tui mrô čơđai sang hră, hrưn đĭ klă bruă pơtô, sit biă ñu lĕ gah tơlơi hrăm Angle hăng boh thâo pơtô hrăm tơlơi hrăm Angle. Khua git gai Ping gah pơsit tong djop hơdră bruă kiăng anăp nao hơnong pơkă rơnuč: mơnuih ƀôn sang dưi tŭ mă tơlơi dưi sit nik, dưi hrăm hră, bơwih brơi tơlơi suaih pral, hơdôm rơnuk rơnua hăng mơ-ak klă. Lơm anun hơdôm jơlan hơdră pơđĭ kyar kah ba glăi tơlơi yôm sit nik.

Pơgôp hiăp kơ hơdră tuh pơ alin jơlan hơdră tui hơnong pơkă dêh čar amăng pơplih phrâo, hrưn đĭ klă amăng pơtô pơjuăt rơwang thun 2026-2035, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, amăng rơwang ră anai glăk bơdjơ̆ nao kơtang mơng bruă pơplih yua boh thâo phrâo 4.0, tơlơi hơđuh đĭ mơng bruă yua boh thâo ia rơgơi ană mơnuih AI hăng tơlơi rơkâo mơnuih mă bruă thâo rơgơi. Yua anun tơlơi kiăng ngă lĕ ƀu djơ̆ kơnong dŏ glăi ƀơi bruă pơtô klă, hrăm thâo tui hơđăp ôh mơ̆ ăt kiăng hơmâo tơlơi pơplih  amăng tơlơi pơmĭn hăng yua boh thâo kiăng bruă pơtô pơjuăt pơđĭ kyar:

“Jơlan hơdră kiăng anăp nao sui pơ anăp, đăo lăng hlâo jơlan gah pơđĭ kyar amăng mơnuih mơnam, anih anom mă bruă kơñ pơgi. Jơlan hơdră tui hơnong pơkă dêh čar kiăng pơsir hĭ hơdôm bruă akŏ phun, ječ ameč kiăng pơtrut kơtang mơng gơnong bruă pơtô pơjuăt. Tui kâo pơmĭn lĕ đing nao pơplih mrô, pơtô brơi bruă mă klă hloh ƀudah đing nao pơtô brơi kual ataih, asuek kiăng hơmâo hơdră yua prăk tuh pơ alin lăp djơ̆. Dua dong lĕ kiăng pơhlôm brơi ngăn rơnoh tơhnal pơkă wai lăng, pel ĕp, krăo lăng. Prăk ƀiă samơ̆ ngă hiưm pă ngă hră pơ-ar tañ, pơhlôm brơi amăng ngă bruă, anăm brơi ƀuh hưp ƀong, ngă soh”.

Tui Khua git gai pơ ala mơnuih ƀôn sang dêh čar, tơdơi kơ hơmâo Khua pơ ala mơnuih ƀôn sang dêh čar ba tơbiă jơlan hơdră kiăng tañ prap lui hơdôm hră pơ-ar črâo ba, kah gưl tong ten amăng pơphun ngă tui hăng dưm dăp mă yua prăk lăp djơ̆. Anai lĕ bruă yôm hloh tui sit nik ră anai. Hrŏm hăng anun kiăng pel ĕp na nao, krăo lăng. Khua git gai pơ ala mơnuih ƀôn sang dêh čar lăi pơtong, anai lĕ dua jơlan hơdră bơdjơ̆ nao mơnuih ƀôn sang, tơdah ngă klă, mơnuih ƀôn sang amra tŭ mă hăng ngă tui pă tơlơi anun lĕ mơnuih ƀôn sang thâo, mơnuih ƀôn sang pơčrông sai, mơnuih ƀôn sang pel ĕp, mơnuih ƀôn sang tŭ mă tơlơi hiam klă./.