Tui jŭ yap mơng gơnong bruă pơtô pơjuăt tơring čar Dak Lak, tơdơi kơ hơjan ia ling dăo hơmâo laih 183/243 boh sang hră ƀơi hơdôm să gah Ngŏ tơring čar Dak Lak rơkâo djru brơi hăng abih tih 535.830 hơdrôm hră. Lu khul grup hơmâo gum hrŏm, ƀơk brơi djop mrô hơdrôm hră anai brơi gơnong bruă pơtô pơjuăt Dak Lak, hăng abih tih prăk djru giăm 8,2 klai prăk. Tơdơi kơ tŭ mă mơng hơdôm anih anom djru brơi, dong mơng lơ 27/11 mrô hơdrôm hră anai hơmâo pơgiăng nao hơdôm boh sang hră hăng him lăng amra jao giong hlâo lơ 4/12.

Amăng tal hơjan ia ling dăo dong mơng lơ 16-22/11, lu să kual Ngŏ tơring čar Dak Lak ia dăo dơlăm, ngă đung đuăi lu gơnam tam mơnuih ƀôn sang, wŏt hơdrôm hră, gơnam yua kơ čơđai sang hră. Bruă gơnong bruă pơtô pơjuăt Dak Lak glăk ječ ameč pơgiăng nao hơdrôm hră pơ hơdôm boh ƀon lan bơdjơ̆ nao, amra ngă bruă hrăm hră amra pơphun glăi tui hơđăp, laih dong djru plai ƀiă ngă kơtrâ̆o brơi hơdôm boh sang anŏ, tơdơi kơ rơngiă abih kông ngăn lơm ia dăo.