Hrơi anai (1/12), mông ngă lơphet “pok pơhai ječ ameč bruă man pơdong, pơkra ming sang dŏ brơi mơnuih kual ia ling dăo” amra pơphun ha amăng plĕ ƀơi tơring čar Dak Lak, anih răm, rơngiă kơtang hloh wŏt mơnuih hăng gơnam tam amăng tal ia ling dăo kơtang hloh rơgao. Him lăng rơbêh 680 boh sang hơmâo man pơdong phrâo. Hrŏm hăng Dak Lak, mông ngă lơphet pok pơhai ječ ameč man pơdong sang djru brơi mơnuih kual ia ling dăo ăt pơphun ƀơi tơring čar Gia Lai, Khánh Hòa hăng prăk djru aset hloh 170 klăk prăk sa boh sang.

Mông ngă lơphet hơmâo pok pơhai ngă tui kông điêng mơng Khua dêh čar ơi Phạm Minh Chính kơ bruă pơphun, pok pơhai tui “Hơdră ngă bruă Quang Trung” ječ ameč man pơdong, pơkra ming sang dŏ brơi hơdôm boh sang anŏ hơmâo sang răm rai yua hơjan kơthel rơgao ƀơi hơdôm boh tơring čar kual Tong krah. Tuy An Bắc lĕ anih Jơnum min mơnuih ƀôn sang tơring čar Dak Lak gum hrŏm ling tơhan pơphun ngă lơphet pok pơhai ječ bruă man pơdong, pơkra ming sang brơi mơnuih kual ia ling dăo rơgao. Jơnum min mơnuih ƀôn sang tơring čar Dak Lak pơsit pok pơhai man pơdong phrâo 684 boh sang; pơkra ming rơbêh 1.500 boh sang hăng man pơkra 333 boh sang juă glai amăng plơi pla hrŏm hăng anih kơđăp ia hơjan ia dăo amăng plơi pla, hăng abih tih prăk mă yua giăm 800 klai prăk.