Tlam lơ 3/12, ƀơi Ƀirô Ping gah, Khua git gai Ping gah dêh čar ơi Tô Lâm git gai mông mă bruă hăng djop ding jum, gơnong bruă kiăng pơčrông sai kơ hơdră bơwih brơi, djru ba mơnuih drơi jăn ƀu klă. Dêh čar ta ră anai hơmâo giăm 7,2% mrô mơnuih drơi jăn ƀu klă, dưm dưm 8 klăk čô mơnuih, amăng anun rơbêh 1 klăk čô mơnuih drơi jăn ƀu klă, ƀu hiam kơtang, hrŏm hăng giăm 600 rơbâo čô čơđai drơi jăn ƀu klă hiam kơtang rơnang phara. Pơđut mông jơnum, Khua git gai Ping gah dêh čar ơi Tô Lâm lăi pơtong bruă bơwih brơi mơnuih drơi jăn ƀu klă ƀu djơ̆ kơnong pơdah tơlơi yôm djru ba ană mơnuih đôč ôh mơ̆ ăt tơlơi pơƀuh brơi pran hơdip hiam, tơlơi rơkâo amăng pơđĭ kyar hơđong hăng mut hrŏm jar kmar.

Hơdôm thun rơgao, lu tơlơi črâo trun, hơdră bruă, hơbô̆ bruă djru ba, pơsuaih brơi, pơtô pơjuăt, djru brơi tơlơi hơdip hơmâo tŏ tui ba glăi tŭ yua. Khua git gai Ping gah dêh čar rơkâo djop ding jum, gơnong bruă hăng gong gai ƀon lan tŏ tui pơgiong hơdră djru, hrưn đĭ klă amăng tŭ mă tơlơi djru gah ia jrao, djru pơsuaih drơi jăn hăng hơdôm hơdră djru tơlơi hơdip kiăng pơhlôm brơi tơlơi dưi sit nik mơng mơnuih drơi jăn ƀu klă.