Gru kơđŏm amăng rơwang bruă tal 15 lĕ bruă čih pơkra tơlơi phiăn dêh čar hăng pơblih phrâo kơtang biă mă amăng tơlơi pơmin, ba tơlơi phiăn pơkă jing anŏ gêh găl pioh pơhno. Boh nik ñu bră čih pơhrua hơdôm mơta tơlơi amăng hơdrôm hră phiah phiăn thun 2013, pơjing atur anăp brơi jơlan pơkă mă bruă sit nik, git gai wai lăng amăng gong gai kơnuk kơna dua gưl ƀơi tơring čar, kơtưn bruă pơpha gưl apăn bruă, pơpha tơlơi dưi git gai djơ̆ hơdră. Lăng yom boh tơhnal anun, pô pơ ala Nguyễcn Thị Thủy, grup pơ ala mơnuih ƀôn sang mơ̆ng tơring čar Thái Nguyên čang rơmang tui anai:

“Kiăng ngă tui dơ̆ng bruă pơblih phrâo tơlơi pơmin amăng bruă čih pơkra tơlơi phiăn dêh čar djơ̆ găl hăng tơlơi pơkă kơ hơdôm anŏ pơdjơ̆ nao hrŏm, tơlơi pơkă djơ̆ tum teč khom ngă, hơmâo lu tơlơi yua kơ jơlan hơdră prong, dŏ amăng hră pơtrun mơ̆ng kơnuk kơna dêh čar. Yua kơ anun, ƀing gơmơi rơkâo đĭ hăng kơnuk kơna dêh čar, lơ̆m čih pơkra tơlơi phiăn, hăng hơdôm jơlan hơdră anŏ pơkă prong pơdjơ̆ nao, kiăng kơnuk kơna dêh čar khom mă tơlơi pơgôp hiăp lu mơnuih hlâo kơ čih pơkra Hră pơtrun”.

Tui hăng pô pơ ala Dương Khắc Mai, grup mơ̆ng Lâm Đồng lăi, amăng guang bruă ( rơwang bruă) pơ anăp, bruă phun ƀu djơ̆ lăi čih pơkra rai lu tơlơi phiăn ôh, kiăng pơblih nao kơ anŏ ngă hơđong, tơlơi phiăn ngă tui sit nik djơ̆ găl, lăi lui hlâo hăng prăk tuh pơ alin ngă tui djơ̆ lăp hăng tơlơi phiăn pơkă. Biă mă ñu, kiăng kơtưn bruă krăp lăng prong hloh, khom brơi ngă tui ječ ameč hloh pơkă hăng hlâo, lơ̆m hơmâo lu bruă mă, tơlơi pơdjơ̆ nao tơlơi phiăn aka ƀu gêh găl pơsit brơi, kiăng khom krăp lăng ten hăng pơsir đut tơhnal:

“Thun blan pơ anăp, tơlơi tŭ yua sit nik lĕ khom pwosit ngă hiư̆m pă ăt ngă pơgiong tơlơi phiăn pơkă bruă mă kơ dêh čar, pơtrut ngă tui hăng krăp lăng bruă ngă tui djop tơlơi klah čun, tơlơi rơkâo đĭ tơdơi kơ krăp lăng. Bruă ngă sit nik brơi ƀuh, tơdah bruă laih krăp lăng, ƀu pơphun ngă tui sa hnơ̆ng, tong ten lĕ anŏ tŭ yua ngă tui mơ̆ng bruă krăp lăng ƀu sit ôh laih anun aka djop anŏ kơtang. Yua kơ anun, kâo rơkâo tơlơi lăi pơthâo anai kiăng lăi pơthâo rơđah hloh boh yom phun anăp či ngă bruă amăng guang bruă pơ anăp adih laih anun lăng anai kah hăng sa bruă mă phun pioh pơđĭ tui boh tŭ yua krăp lăng mơ̆ng ƀing pơ ala mơnuih ƀôn sang dêh čar”.

Lăi pơthâo rơđah guang bruă tal 15 hơmâo lu tơlơi pơtrun yom, pơdjơ̆ nao sit nik amăng bruă pơđĭ kyar bơwih ƀong huă mơnuih mơnam dêh čar, jao brơi tơlơi phiăn pơkă phara hơjăn, boh nik ñu amăng bruă čuk pơkra jơlan glông, brơi kơ hơdôm jơlan hơdră tơhnal pơkă mơ̆ng dêh čar laih anun ngă tui hơdôm tơlơi pơtrun, jơlan hơdră pioh ngă tui phara hơjăn kơ 10 boh tơring čar, ƀôn prong, pô pơ ala Tô Ái Vang, grup mơ̆ng Cần Thơ rơkâo :

“Jao Kơnuk kơna ngă tui bruă jŭ yap glăi, pơƀut abih bang, pơtong glăi boh tơhnal ngă tui djop Hră pơtrun lông ngă lăng hlâo tui tơlơi phiăn jơlan hơdră djru ngă phara, kiăng ngă pơrơđah tui tơlơi phiăn, jơlan hơdră pơpă hơmâo ba glăi boh tŭ yua, pơjing rai pran kơtang ngă pơblih phrâo, tơlơi phiăn pơpă aka ƀu ngă tui hơmâo boh tŭ yua sit nik, yua kơ hơgĕt kiăng hơmâo hơdră pơsir hmai kru kơ črăn tŏ tui pơ anăp adih, kiăng huăi hơmâo anŏ rơhong rơhai lui soh sel amăng tơlơi phiăn pơkă hăng ngă phăk phai prăk kăk. Bruă pơjrao glăi hăng ngă tui plah wah dua guang bruă khua pơ ala mơnuih ƀôn sang dêh čar, khom hơmâo anŏ tŏ tui sa dơnuai, ngă tui djop Hră pơtrun, pơjing anŏ kưl đĭ, pơtrut jơlan hơdră jing pran kơtang pơđĭ kyar bơwih ƀong huă mơnuih mơnam sit nik brơi kơ djop tơring čar hăng đơ đam amăng dêh čar”.

Hăng hră lăi pơthâo bruă mă mơ̆ng kơnuk kơna guang bruă thun 2021-2026, ƀing pơ ala lăi pơtong, amăng tơlơi pơhing ƀơi dêh čar ta hăng jar kmar hơmâo lu tơlơi pơblih kơtang, samơ̆ hăng tơlơi gir run khut khăt ba mơtam, bruă ngă ƀu pơdơi ôh pơblih phrâo, pơpha djơ̆ hơdră, beč bal git gai wai lăng, Kơnuk kơna dêh čar ăt ngă giong bruă jao, črăn bruă pơprong hơdôm tơhnal pơkă, anŏ pơtrun, djop hră pơtrun mơ̆ng ƀing pơ ala mơnuih ƀôn sang dêh čar dưi ngă djop soh. Bruă rŭ pơdong glăi, pơđĭ kyar bơwih ƀong huă, pơhưč prăk tuh pơ alin hơmâo đing nao lăp, hrŏm hăng anun rŭ glăi lu kơčăo bruă tuh pơ alin bơwih ƀong huă mơ̆ng kơnuk kơna lu thun lui soh, hơmâo pơphun tơgŭ ngă glăi, hơmâo ba glăi kơmlai kơ dêh čar. Lăi pơthâo anŏ čang rơmang pơ anăp, pô pơ ala ơi Trần Hoàng Ngân, grup mơ̆ng ƀôn prong HCM lăi pơthâo:

“Yak nao amăng rơnuk pơblih phrâo, tơhnal pơkă prong biă mă hăng ječ ameč mơ̆n samơ̆ ƀing ta đăo sit ăt amra tŭ yua. Kâo rơkâo hăng kơnuk kơna đing nao hrŏm hăng bruă pơđĭ kyar tañ khom pơhlom tơlơi hơđong, boh nik ñu anŏ hơđong bơwih ƀong huă prong laih anun đing nao anŏ pơblih ayuh hyiăng ră anai, pioh tuh pơ alin kơ bruă čar, jơlan glông nao rai hiam klă pơtrut tơlơi bơwih ƀong huă kơ mơnuih mơnam hơđong rơnuk rơnua tŭ yua hloh, tañ rŭ glăi, ngă pơblih phrâo jơlan rơdêh treng ră anai”.

Hơdôm tơlơi pơgôp hoăp tơpă djơh hăng anun, bruă glăm ba mơ̆ng ƀing pơ ala mơnuih ƀôn sang dêh čar brơi ƀuh, tơlơi khut khăt ngă tui bruă pơblih phrâo kơtang biă mă amăng bruă čih pơkra tơlơi phiăn, krăp lăng hăng git gai, kiăng ngă klă hloh tơlơi pơtrun kơ bruă mă pơđĭ kyar lŏn ia amăng rơnuk phrâo. Ƀing khua pơ ala čang rơmang hơdôm atur ngă giong laih, pơjing rai amăng rơwang bruă laih rơgao ƀing pơ ala mơnuih ƀôn sang dêh čar ntal XV, ăt amra tŏ tui ngă hrŏm, djă pioh, ngă pơgiong hăng pơđĭ tui hloh pơ anăp adih, kiăng rĭm jơlan hơdră tơlơi pơtrun lêng kơ dưi ngă tui sit nik bơwih brơi kơ tơlơi hơdip mơda mơnuih ƀôn sang dêh čar.