Tong krah atur sang hơđăp dŏ hơmâo drưp drap djah djâo tơdơi kơ ia ling dăo ngă, ayong Nguyễn Thế Kiên, plơi Chánh Hưũ, să Ngô Mây, tơring čar Gia Lai dik dăk hăng khua mua, ling tơhan sang hră ling tơhan Quân đoàn 34 dưm truă akă hring kuăt pơsơi, prăp lui ngă tơmeh bêtông pơdong sang phrâo.

Kơthel 13 ngă kơ sang ayong Kiên pok bơbung. Aka ƀu hmao ming pơkra ôh,  ia ling dăo dơ̆ng truh, anun hlong lip ngă dlưh abih sang gơñu. Dưi hơmâo kơnong djru 60 klăk prăk, hơmâo ƀing ling tơhan djru man pơdong brơi, anun sang anŏ gơñu čan 40 klăk prăk dơ̆ng kiăng dưi djop 100 klăk prăk man pơdong sang kơjăp. Ayong Nguyễn Thế Kiên kah pơpha, sang phrâo gơñu prong 30 met karê tơdah ăt tuh hăng ƀêtông kơjăp mơ̆n, ñu lăi:

“Ƀing ling tơhan yơh djru ba rơkơi bơnai gơmơi pơdong glăi sang kiăng kơjăp, hiam hloh sang hơđăp. Ră anai pơdong sang, tuh ƀêtông ngă tơmeh, tuh ƀêtông yông tơda brơ kơjăp hloh kơ sang gưl 4 hlâo adih. Kâo blơi kuăt pơsơi pơdong, tơdah ia ling dăo lĕ đĭ dŏ amăng anih gah drông yông tơda, huăi pŭ ba hyu dram gơnam nao pơ anih pơkŏn dơ̆ng tah”.

Ăt ƀơi plơi Chánh Hữu mơ̆n, ƀing ling tơhan sang hră tơhan Quân đoàn 34 hlăk djru sang anŏ ayong Ngô Đình Vị man pơdong sang. Sang amăng jơlan anet, lŏn dăo tơrung anun ƀing tơhan pơgiăng nao tuh lŏn pơbŭ đĭ ngă atur dlông hloh, dưi rơgao hnơ̆ng ia dưi ling nao. Anai lĕ sang pơdong phrâo hiam, hiam yua rơngioa rơnoh prăk 60 klăk mơ̆ng kơnuk kơna djru, ñu dŏ ba yua abih 120 klăk prăk pơkrem pioh mơ̆ng hlâo blơi gơnam man pơdong sang, dŏ glăi ƀing tơhan djru hrơi bruă man pơdong. Jing mơnuih ngă bruă man pơdong sang, anun ayong Vị ngă hrŏm tong ten biă mă amăng bruă man pơdong sang. Ñu hơ̆k mơak lăi:

“Ƀing adơi ayong tơhan krah hơjan pơđiă mă bruă lăng pap biă mă. Adai hơjan, kâo lăi ƀing gơñu pơdơi ƀiă, samơ̆ gơñu ăt buh ao hơjan mă bruă đôč. Gơnam ƀong huă, ia mơñum ƀing gơñu tơl ƀu hmao wăn ƀong mơñum đơi ôh. Ƀing gơñu glăi djru ană plơi pla, sang anŏ gơmơi mơak biă mă. Sang anŏ tơki bruă hơgĕt, ƀing tơhan ngă soh. Him lăng, sang anŏ amra man pơdong amăng 45 hrơi”.

Amăng bruă mă djă anăn “Bruă Quang Trung” tal anai, ling tơhan Quân đoàn 34 dưi jao man pơdong 70 boh sang ƀơi kual ia ling dăo tơring čar Gia Lai hăng 30 boh sng ƀơi kual ia ling dăo tơring čar Dak Lak. Tơdơi kơ tŭ mă tơlơi pơtrun nao mă bruă pơ plơi pla, jao djop anom bruă wai lăng gơgrong ba ngă bruă tum teč, gum hrŏm sa pran jua tong ten hăng gong gai kơnuk kơna djop plơi pla hăng pô sang dăp hơdră hăng pơphun mă bruă mơtam yơh.

Đại tá Phạm Hồng Sơn, Kơ-iăng khua anom kơđi čar Sang hră ling tơhan Quân đoàn 34, tŭ mă bruă man pơdong ƀơi să Ngô Mây, tơring čar Gia Lai brơi thâo: abih bang ling tơhan lêng kơ iâu pơtum mă bruă kiăng ngă hmao hăng tơlơi jao man pơdong. Puih kơđông hăng sang hră gơñu pơkă tơhnal mă bruă truh lơ 20/1/2026 khom giong abih, kiăng hmao brơi kơ mơnuih ƀôn sang mơak ƀong têt, ngă yang thun phrâo djuai ania.

“Bruă pơkă lăng pơdong sang ƀơi plơi pla hăng sang anŏ pô sang gơgrong ba ngă giong hlâo, puih kơđông tơhan kơnong mă bruă man podong hăng pơdŭ ba, glăm gơnam mă bruă man pơdong. Huă ƀong lĕ, anom bruă ăt pơhlom brơi gơnam ƀong huă djơ̆ hăng tơlơi pơkă kơ tơhan. Ƀing gơmơi prăp lui djop mơnong ƀong huă, ba nao tơl anih mă bruă, dŏ man pơdong sang kơ mơnuih ƀôn sang kiăng ƀing tơhan huă ƀong jơman đĭ pran mă bruă djơ̆ tơlơi jao kơ ƀing gơñu”.

Hăng lu sang anŏ phrâo găn rơgao kơthel ngă, ia ling dăo truh, hơdôm boh sang ngă kơjăp hlăk pơdong đĭ ƀu kơnong jing sanih dŏ hơđong đôč ôh, dŏ jing anih ưh kơnang pran jua, juh alum sa črăn tơlơi rơngiă rơngiom mơ̆ng mơnuih ƀôn sang yua lŏn adai ngă. Rim pơnăng sang, bơbung sang pơdong đĭ lêng kơ hơmâo ia hŏu hang hăng pran jua ƀing tơhan rơnuk Wa Hồ, sa wơ̆t dơ̆ng kiăng pơtong glăi tơlơi khăp ling tơhan hăng mơnuih ƀôn sang tong ten kơjăp hơđong pơdjru nao amăng mông hơmâo tơlơi truh, ƀu lui kơ hlơi dŏ glăi gah klôn ôh.