Ơi Nguyễn Thành Công, Khua khul pơphun jơlan hơdră “Ngă hrŏm bruă djru mơnuih ƀôn sang”, kah pơpha, giong nao ĕp lăng, anom bruă anai brơi ƀuh Kon Chiêng lĕ să tơnap tap hloh ƀơi tơring čar Gia Lai hăng rơbêh 90% mrô mơnuih ƀôn sang djuai ƀiă. Grup hyu djru ba mơnuih ƀôn sang čang rơmang ngă bruă tô nao rai, bang bơngač pran jua thâo djru ba, kah pơpha brơi mơnuih ƀôn sang.

“Ƀing gơmơi ƀuh tơlơi hơdip mơda mơnuih ƀôn sang pơ anai tơnap tap, kiăng hơmâo lu tơlơi djru ba anun ƀing gơmơi pơsit ruah anih anai rai pơphun jơlan hơdră anai. Tơlơi mơ̆ ƀing gơmơi ƀuh hling hlang biă mă, hơdôm sang gru grua đưm, sang hăng ngŏ, jơlan lŏn ană plơi pla nao rai rim hrơi. Khul rơdêh pông khom pŏn  hăng klơi čơwăk kiăng huăi tơbor mơ̆ng dưi truh pơ anai”.

Jơlan hơdră anai hơmâo pok pơhai lu bruă mă tŭ yua sit nik, pơtum nao amăng bruă ia jrao, pơtô hrăm hăng djru tơlơi ngui ngor mơak kah hăng: Pơkă lăng tơlơi duăm ruă, pơtô brơi hơdră pơgang suaih pral laih anun ƀơk brơi ia jrao ƀu mă prăk ôh, brơi kơ 500 čô mơnuih ƀôn sang. Ba yua anih pơđok hră, răk pioh hơdrôm hră pơar djru čung cơđai nao sang hră, ƀơk hơdrôm hră pơđok, hră čih, gơnam yua hrăm hră, eng ao hrăm hră phrâo; pơphun klơi brơi dua boh ia bơmun wơi,man pơdong 1 boh sang hơdor tơngia....abih tih rơnoh prăk 850 klăk. Adơi Hà Hoàng Phú, dŏ ƀơi plơi Thương, čơđai sang hră hrăm anih 6D, dlưh pran jua lăi:

“Kâo rai arăng pơkă lăng tơlơi suaih pral, ƀơk ia jrao hăng tŭ mă gơnam djru, mơak biă mă, bơni kơ ƀing met anong, neh wa, ayong amai amăng grup pơyơr pran jua rai djru”.

Jơlan hơdră “Ngă hrŏm bruă djru mơnuih ƀôn sang” tal 31 anai, hơmâo pơhưč 130 čô hlăk ai ngă hrŏm. Amai Bùi Thị Minh Phương, čơđai sang hră gưl prong Đại học Y Dược ƀôn prong Hồ Chí Minh lăi lĕ, tal rai anai, sa tơlơi hrăm găn rơgao amăng bruă tơnap tap sit nik ƀu thâo wor rơbit ôh hăng drơi jăn kâo pô, ƀuh rơđah sa tơlơi khăp prong, anih anom tơnap tap, tơlơi hơdip mơda gleh glar, sa bruă mă khom hơmâo tơlơi pơdjru ba kơ bruă mă ta pơjrao brơi, pơhơdip mơnuih duăm ruă, ñu lăi:

“Ƀuh dlưh pran jua biă mă lơ̆m đĭ rơdêh abih 12 mông kah mơtruh, găn jơlan đĭ čư̆ siăng, trun găn hnoh ia hlong truh pơ plơi, anih pơkă lăng tơlơi duăm ruă kơ mơnuih ƀôn sang. Pran jua kâo ol kơdol biă mă ƀuh tui anun, kiăng ba lu ia jrao tuao hăng tơlơi khăp pap brơi kơ mơnuih ƀôn sang, pap drap biă mă”.