Ơi Trần Thanh Mẫn, Khua git gai pơ ala mơnuih ƀôn sang dêh čar brơi thâo, anai lĕ tal blung a anom bruă khua pơ ala mơnuih ƀôn sang dêh čar pơphun jơnum bơkơtuai kơ bruă anai. Ñu lăi pơtong, bruă krăo lăng dưi hơmâo Khua mir sir Hồ Chí Minh đưm adih git gai ngă tui mơ̆ng thun 1946. Khua mir sir Hồ Chí Minh ăt brơi nao sem lăng pơ anih bơwih ƀong huă yom, kual mơnuih mơnam tơnap tap, nao giăm mơnuih ƀôn sang, jĕ giăm ană plơi pla, kiăng thâo hluh tơlơi ană plơi pla či kiăng. Khua git gai pơ ala mơnuih ƀôn sang dêh čar hơdôm gưl ăt đing nao mơ̆n kơ bruă krăo lăng, akŏ pơdong,, ƀư̆ pơkra bruă mă hăng pơgang lŏn ia. Bơ bruă krăo lăng ră anai lĕ kiăng ƀư̆ pơkra, akŏ pơdong glăi pơtrut pơđĭ kyar bơwih ƀong huă lŏn ia amăng rơnuk pơblih phrâo, Rơnuk lŏn ia ta hrưn đĭ kơ djuai ania.

Thun blan laih rơgao, khua mua pơ ala tal 15 đing nao lu biă mă bruă krăo lăng, lu wơ̆t hyu sem lăng hơmâo ngă bruă tơpă sit, tong ten, tŭ yua laih anun lăi pơthâo pơhaih tơpă hăng ƀing pơ ala mơnuih ƀôn sang dêh čar hăng mơnuih ƀôn sang ruah khua laih anun abih bang mơnuih ƀôn sang amăng dêh čar. Tui hăng anun, bruă akŏ pơdong, ngă pơgiong tơlơi phiăn pơtrun hăng bruă mă krăo lăng dưi đing nao, ngă hrŏm tong ten, hmao kru plah wah djop sang bruă khua pơ ala, kơnuk kơna, jơnum min djop djuai ania dêh čar, sang phat kơđi mơnuih ƀôn sang, sang bruă ĕp kơđi mơnuih ƀôn sang, sang bruă jŭ yap kơnuk kơna, sang bruă pel ĕp kơđi amăng bruă mă, djop sang bruă hră pơhing phrâo ƀơi gơnong dlông hăng djop tơring čar.

Tui hăng khua git gai pơ ala mơnuih ƀôn sang dêh čar, bruă mă tơña hăng lăi glăi jing sa bruă mă krăo lăng ƀuh tŭ yua biă mă mơ̆ng Sang bruă khua pơ ala mơnuih ƀôn sang dêh čar. Sang bruă wai lăng khul djuai ƀiă, djop jơnum min mơ̆ng sang bruă khua pơ ala mơnuih ƀôn sang dêh čar hơmâo jơnum lăi pơthâo kơ tơlơi mơnuih ƀôn sang ruah khua đing nao, mơnuih ƀôn sang dêh čar krăo lăng.

Thun blan laih rơgao, khua pơ ala mơnuih ƀôn sang dêh čar ngă hrŏm Kơnuk kơna, gah yŭ tơlơi git gai mơ̆ng Ping gah, Ping gah kơnang kơ jơlan hơdră, tơlơi pơtrun djơ̆ lăp, anăp brơi bruă mă pơđĭ kyar bơwih ƀong huă mơnuih mơnam, pơhlom tơlơi rơnuk rơnua dêh čar. Tui hăng anun, Kơnuk kơna čih pơkra tơlơi phiăn dêh čar, hră pơtrun pioh kơ Jơnum min apăn bruă phun pơ ala mơnuih ƀôn sang dêh čar, khua mua pơ ala mơnuih ƀôn sang dêh čar pô pơsit hĭ kiăng tơlơi phiăn kơnuk kơna, bruă čih pơkra tơlơi phiăn, tơlơi pơtrun yom kơ lŏn ia dưi ngă tui sit nik.

Khua git gai pơ ala mơnuih ƀôn sang dêh čar brơi thâo, ƀơi mông jơnum phrâo anai, ƀing pơ ala mơnuih ƀôn sang dêh čar tal 15 hơmâo čih pơkra lu tơlơi phiăn, hră pơtrun hrŏm hăng pơblih phrâo amăng tơlơi phiăn čih pơkra rai, tơlơi pơkă tum teč, amăng anun pơpha, pơkă tơlơi dưi amăng bruă mă kơtang hloh jao kơ kơnuk kơna hăng gong gai kơnuk kơna plơi pla, tơring čar tui hăng tơlơi git gai mơ̆ng Khua git gai ping gah ơi Tô Lâm hăng anăp ngă bruă, tơring čar pơsit, tơring čar pô ngă, tơring čar glăm ba.

“Ngă hiư̆m pă bruă mă mơ̆ng gong gai kơnuk kơna plơi pla dua gưl mă bruă hơđong pơ anăp anai, laih anun kiăng bruă krăo lăng mơ̆ng khua pơ ala mơnuih ƀôn sang dêh čar, jơnum min apăn bruă phun pơ ala mơnuih ƀôn sang dêh čar mă bruă tŭ yua sit nik pioh krăo lăng ngă tui djơ̆ tơlơi phiăn, hră pơtrun, hră pơčrâo ba. Bơmhutu 1 thun hơmâo dua wơ̆t jơnum lăi pơthâo bruă krăo lăng mơ̆ng ƀing pơ ala mơnuih ƀôn sang dêh čar, 2 wơ̆t krăo lăng mơ̆ng Jơnum min apăn bruă phun pơ ala mơnuih ƀôn sang dêh čar. Kơñ pơgi, ƀing ta amra ngă tui bruă krăo lăng mơ̆ng sang bruă khua pơ ala, samơ̆ Jơnum min apăn bruă phun pơ ala ăt khom krăo lănglu hloh, na nao, wơ̆t hăng bruă nao ĕp ječ ameč kiăng ƀuh hơdôm bruă soh glăi, aka ƀu găl hmao pơsir hĭ tơlơi tơnap tap”.

Khua git gai pơ ala mơnuih ƀôn sang dêh čar brơi thâo, Jơnum min apăn bruă phun pơ ala mơnuih ƀôn sang dêh čar amra tŭ mă hiăp pơgôp mơ̆ng ƀing pơ ala mơnuih ƀôn sang dêh čar, kiăng pơ anăp adih čih pơkra glăi tơlơi phiăn krăo lăng mơ̆ng khua mua pơ ala mơnuih ƀôn sang dêh čar hăng ƀing pơ ala mơnuih ƀơi tơring čar sem glăi, pơsit amăng mông jơnum lok 10 khua mua pơ ala tal 15, kiăng pơhlom djop hră pơtrun krăo lăng dưi ngă tui djơ̆ tơpă hơnơ̆ng.

Ơi Trần Thanh Mẫn lăi pơtong, khom pơtô lăi tong ten thâo hluh kơjăp tơlơi pơhiăp git gai lơ̆m jơnum lok 8, khua mua pơ ala mơnuih ƀôn sang dêh čar tal 15 mơ̆ng Khua git gai ping gah ơi Tô Lâm hơmâo lăi rơđah: Kiăng tañ pơtong rơđah anăp mă bruă, tơlơi pơhing krăo lăng prong hloh mơ̆ng sang bruă khua pơ ala mơnuih ƀôn sang dêh čar djơ̆ găl hăng bruă mă sit nik, anăm pơrơkua nao rai hăng djop bruă kơnuk kơna hŭi ngă huač prăk phăk phai. Khom pơđĭ tui boh tŭ yua bruă mă, krăo lăng, lăi pơthâo, pơblang tong ten tơlơi krăo lăng amăng hră tơlơi phiăn pơkă; đing nao krăo lăng, sem lăi, pơtrut pơsur bruă ngă tui tơlơi rơkâo krăo lăng. Khua git gai pơ ala mơnuih ƀôn sang dêh čar ơi Trần Thanh Mẫn lăi dơ̆ng:

“Jơnum bơkơtuai tal anai ƀuh rơđah pơdah thâo tơlơi rơgơi kơhnâo pơdah thâo abih pran jua, khut khăt glăm ba mơ̆ng ƀing pơ ala mơnuih ƀôn sang dêh čar, ƀing mơnuih kơsem min rơgơi kơhnâo, thâo hră kiăng djru ngă pơgiong tơlơi phiăn dêh čar, djru hrŏm pơtrun pơđĭ kyar lŏn ia, tơlơi bơwih ƀong huă, pơhlom pơgang rơnuk rơnua dêh čar, akŏ pơdong glông bruă kơđi čar tong ten rơgoh, tơpă, pơgăn hưp ham ƀong kông ngăn, phăk phai soh sel.