Kơčăo bruă mrô 8, yua Khul pơlir hơbit đah kơmơi Việt Nam git gai, hơmâo ngă jai hrơi tŭ yua hloh bruă bơkơnar đah rơkơi đah kơmơi hăng pơsir hĭ hơdôm bruă kiăng ječ hăng đah kơmơi wơ̆t čơđai anet. Kiăng pơtrut tui boh tŭ yua hăng hơyak nao ataih hloh amăng rơwang 2 (2026-2030), Nai prin tha Lê Ngọc Thắng črâo pơƀuh pă mơta bruă kiăng hơmâo ngă tơl tơhnal. Sa lĕ Pơmut hrŏm bruă đah kơmơi đah rơkơi hăng bruă pơkŏn ƀudah tuh pơ alin phara hơjăn? Tui hăng ñu, truh mông ƀing ta kiăng pơplih tơlơi pơmin laih. Tơdah hlâo adih, bruă pơmut hrŏm đah rơkơi đah kơmơi amăng hơdôm jơlan hơdră pơkŏn jing bruă kiăng biă či pơđĭ tui tơlơi thâo hluh, jing sui sui pơ anăp, bơkơnar đah rơkơi đah kơmơi kiăng tuh pơ alin phara hơjăn: “Kâo pơmin, bruă bơkơnar đah rơkơi đah kơmơi jing bruă mơ̆ng ha mơkrah mơnuih tơpuôl mơtăm...Pơmut hrŏm aset tui jing klă hloh mơn, yua dah bơkơnar đah rơkơi đah rơkơi kiăng lăng kar hăng sa bruă kiăng tuh pơ alin phara, ƀu djơ̆ jing bruă djru ba đôč ôh”.

Bruă tal 2 lĕ bruă dưi kiăo tui tơlơi pơplih phrâo anom bruă kơnuk kơna. Bruă dăp glăi, ngă hơbôt anom bruă kơnuk kơna dŏ glăi dua gưl jing gưl tơring čar hăng gưl să, jing hơmâo tơlơi tơña prong biă kơ bruă mă mơ̆ng Khul đah kơmơi hăng tơlơi rơgơi pok pơhai bruă mơ̆ng khua mua. Tơlơi anai khŏm kiăng pơtŏp hrăm bruă, pơđĭ tui tơlơi rơgơi kơ ƀing khua mơ̆ng Khul tơring čar hăng să kiăng gơñu thâo hluh hăng pok pơhai kơčăo bruă tŭ yua.

Bruă tal 3 lĕ kiăng pơtum glăi boh thâo ia rơgơi. Tui hăng Nai prin tha Lê Ngọc Thắng, kiăng hơmâo tơlơi pơtum glăi 10 thun (2021-2030) djơ̆ glông amăng hăng djơ̆ hăng tơlơi hơmâo sit či lăi glăi tơlơi tơña: Kơčăo bruă mrô 8 hơmâo tơlơi pơplih hơget kơ bruă bơkơnar đah rơkơi đah kơmơi djuai ania ƀiă? Hơdôm tơlơi anai amra jing phun tơhnal kjăp kơ bruă prăp rơmet hơdră djru pơ anăp.

Laih anun tal 4 dong lĕ pơlir anŏ hơdjă hăng hơdôm bruă kiăng ječ amăng mơnuih tơpuôl. Bơkơnar đah rơkơi đah kơmơi ƀu dưi pơčlah đuăi hơdôm bruă ngă ruă akŏ hlâo kah hăng dŏ rơkơi bơnai aka ƀu truh thun, dŏ glăi ană anong wa pô, pơklaih rơkơi bơnai lơ̆m đah bơnai hyu mă bruă pơ ataih, kơplong mă juă jon ƀudah sĭ mơdrô mơnuih. Kơčăo bruă mrô 8 kiăng pơsit hăng pơsir hĭ tơlơi anai, lăng anai jing ha bơnah ƀu dưi kơƀah ôh amăng bruă jao tơlơi dưi kơ đah kơmơi.

Nai prin tha Lê Ngọc Thắng kiăng pơ anăp anai ngă bruă abih bang hloh samơ̆ khŏm djơ̆ akŏ phun. Ăt kiăo tui hơdôm bruă kiăng ngă phun: pơđĭ tui tơlơi thâo pơmin, pơgang ba tơlơi dưi hăng tơlơi klă djơ̆ tơlơi phiăn, lăng ba tơlơi hơdip mơda bơwih ƀong, pran jua hăng biă ñu lĕ pơđĭ tui tơlơi dưi bơwih ƀong kơ đah kơmơi: “Hơdră djru djuai ania sit biă nu lĕ pơtruh abih bang anom bruă, bơdjơ̆ nao ană mơnuih - ƀu kơnong 53 phung djuai ƀiă đôč ôh mơ̆ wơ̆t hăng Yuan hai hnun mơn. Hơmâo wơ̆t bruă ia jrao, gru grua, pơtô hrăm, lŏm lui rin rơpa. Yua hnun, hơdôm kơčăo bruă amăng Jơlan hơdră dêh čar pơtrun kiăng hơmâo lăng abih bang. Kơ bruă hơduah ĕp, kiăng thâo rơđah, kâo tŭ ư hăng bruă kiăo tui pô ta kiăng djru, anih ta hơmâo pơsit amăng jơlan hơdră, biă ñu lĕ hơdôm boh plơi pla tơnap tap”.

Kơčăo bruă 8 ƀu kơnong jing sa amăng jơlan hơdră ngă bruă đôč ôh ăt pơsit brơi tơlơi gir run kơđi čar prong mơ̆ng Ping gah hăng Kơnuk kơna. Hăng tơlơi gơgrong bruă mơ̆ng Khul đah kơmơi Việt Nam, bruă pơƀut ngă bruă rơđah rơđông, pơsir hĭ hơdôm bruă kiăng ječ, ƀơ ƀrư̆ lăng bơkơnar đah rơkơi hăng đah kơmơi jing sa bruă tuh pơ alin lăng ƀơi anăp amra jing boh pơkhoă kiăng pơplih hơđong, akŏ pơdong kơnuk kơna mơnuih mơnam bơkơnar./.