Kơplah wah bơyan hơjan blan 7/2025, sang anŏ ayong Rơ Mah Huệ, dŏ ƀơi plơi Dêr Sơ, să Ia Me, tơring čar Gia Lai, hok mơak tŭ mă sang dŏ phrâo yua Kông ti sa ding kơna Bình Dương (Binh đoàn 15) man pơkra brơi. Sang prong rơhaih năng ai 50m2, hơmâo sa anih đih pit, sang anih čơkă tuai, hăng sang apui man gah rơngiao. Hrŏm hăng sang anŏ ayong Rơ Mah Huệ, ƀơi plơi Dêr Sơ ăt hơmâo dong mơn 16 boh sang anŏ pơkŏn hơmâo djru ruh hĭ sang dŏ tơ̆i phô̆, man pơkra brơi sang phrâo. Binh đoàn 15 hơmâo djru abih bang prăk man pơdong 10 boh sang pơ anai. Ayong Rơ Mah Huệ hok mơak lăi pơthâo:“Kâo bơni kơ adơi ayong hlăk ai amăng kông ti 55 hơmâo man pơkra sang brơi sang anŏ kâo. Hlâo adih, sang dŏ ƀu rup, yik yôk, mông hơne hơmâo sang dŏ phrâo baih. Hơmâo gah kông ti djru ngă sang jing hơđong pran biă yơh, huăi bơngơ̆t dong tah, kơnong pơƀut jik bruă ngă hmua hăng ngă kông ñơn klă, hơđong tơlơi hơdip đôč yơh”.

Thượng tá Lê Đức Toàn - Khua ping gah, Kơ-iăng khua Kông ti sa ding kơna Bình Dương (Binh đoàn 15) brơi thâo, anom bruă hơmâo ngă giong hăng jao glăi 68 boh sang dŏ. Hrơi blan rơgao, kông ti hơmâo iâu pơthưr hơdôm rơbâo hrơi mă bruă mơ̆ng ƀing khua, mơnuih apăn bruă, mơnuih mă bruă pơ anai. Hơdôm boh sang anŏ hơmâo djru lĕ sang anŏ kông ñơn glăk mă bruă pơ hơdôm grup pơkra gơnam, tơnap tap kơtang.

Hrŏm hăng Kông ti Bình Dương, amăng thun 2025, Binh đoàn 15 hơmâo pơƀut pok pơhai lŏm lui sang dŏ tơ̆i sang phô̆ ƀơi abih bang anih. Abih tih ñu hơmâo 357 boh sang hơmâo ngă phrâo hăng pơkra glăi, jao glăi hlâo lơ 14/7, prăk man pơkra giăm 17 klai prăk. Yua hnun, hơdôm rơtuh boh sang anŏ jing kông ñơn rin rơpa, sang anŏ hơmâo anăn kơnuk kơna djru, hăng mơnuih djuai ƀiă kơtuai jơlan guai Gia Lai hơmâo sang dŏ phrâo kjăp. Thượng tá Lê Đức Toàn brơi thâo:“Kông ñơn, mơnuih man pơkra sang dŏ ƀơi anai ƀu hơmâo đơi ôh. Nua pơsơi pơsă pơtâo čuah hai pơmă mơn, djơ̆ anŏ ñu, gơnam pơmă truh kơ 230% pơhmu hăng nua blung a. Kiăng hơdôm boh sang hơmâo man pơdong kjăp, pơhlôm đĭ dŏ sui thun, gơmơi hơmâo ngă hrŏm hăng ping gah, gong gai ngă bruă hăng hơdôm boh sang sĭ pơtâo čuah gơnam man pơkra sang dŏ mă prăk rơgeh ƀiă, pơhlôm bruă man pơkra klă djơ̆ hăng tơlơi pơtrun mơ̆ng kơnuk kơna”.

Hrŏm hăng Binh đoàn 15 (Ding jum ling tơhan), tơhan pơgang guai tơring čar Gia Lai ăt gum pơgôp lu biă amăng bruă lŏm sang dŏ tơ̆i, sang phô̆ pơ guai dêh čar. Kơnong kơ sa blan dong mơ̆ng hrơi Ding jum ling tơhan pơphun bơkơtưn, truh lơ 15/4, Tơhan pơgang guai tơring čar Gia Lai ngă giong hăng jao 10 boh sang dŏ kjăp hăng nua rơbêh 800 klăk prăk, prăk hơmâo mơ̆ng prăk pơčruh sa hrơi mă bruă mơ̆ng ƀing khua, ling tơhan hăng tơlơi gum tơngan mơ̆ng ƀing thâo pap, khul grup anom bruă juăt djru mơnuih tơnap.

Ƀu kơnong pơdơi dơ̆ anun đôč ôh, tơhan pơgang guai ăt gum hrŏm hăng ping gah, gong gai plơi pla, djru hơdôm rơbâo hrơi mă bruă djru man pơkra 258 boh sang dŏ kơtuai jơlan glông rơbêh 20km giăm hăng dêh čar Kur. Đại tá Trần Tiến Hải, Kơ-iăng khua Anom git gai tơhan tơring čar ngă rah Khua tơhan pơgang guai tơring čar Gia Lai brơi thâo, anom bruă pơsit anai ƀu djơ̆ bruă ngă hla tui arăng đôč ôh mơ̆ anai jing bruă kiăng ngă na nao. Yua dah djru neh met wa man pơdong sang dŏ, ƀu kơnong djru gơñu hơmâo sang dŏ kjăp, hơđong pran ngă bruă đôč ôh ăt djru ngă kjăp tui pran gum pơgôp tơhan hăng mơnuih ƀôn sang, gum bong kjăp lŏn ia, rơnuk rơnua ƀơi guai: “Amăng hơdôm thun rơgao, gơmơi lăng yôm biă bruă djru mơnuih ƀôn sang man pơdong sang dŏ. Yua hnun gơmơi jak iâu ƀing thâo čơmah, mơnuih thâo pap, khul grup, ling tơhan. Yua dah anai jing tơlơi gơgrong bruă hăng neh met wa pơ guai dêh čar, pơpŭ kơ tơlơi kiăng khăp, tơlơi lăng ba mơ̆ng neh met wa pơ guai dêh čar hăng tơhan pơgang guai”.

Hăng tơlơi gum djru abih pran jua wơ̆t hăng tơlơi gơgrong bruă, hơdôm puih kơđông tơhan hơmâo gum djru gơnam, gum pran, brơi kơ mơnuih ƀôn sang pơ guai tơring čar Gia Lai hơmâo sang dŏ kjăp, laih dong djru ngă hơđong tơlơi hơdip, pơđĭ tui tơlơi bơwih ƀong hơdip mơda hăng ngă phun atur kiăng neh met wa hơđong pran đĭ kyar bơwih ƀong huă, hrưn đĭ tơklaih đuăi mơ̆ng ƀun rin./.