Nao pơhmư̆ hmâo khua mua git gai Ping gah tơring čar, Jơnum min mơnuih ƀôn sang tơring čar hrŏm hăng giăm truh 100 čô mơnuih apăn bruă khul đăo mơbruă. Lâm Đồng ră anai hmâo 24 khul grŭp tui hơdôm tơlơi đăo dưi tŭ yap hăng rơbêh kơ 1,67 klăk čô mơnuih tui đăo, 3.599 čô mơnuih apăn bruă khul đăo hăng giăm truh 1.300 bôh anih anom jơnum djơ̆ phiăn. Hơdôm bruă mă gah khul đăo pơphun hơđong, djơ̆ tơlơi phiăn, nao hrŏm hăng pran jua “hơdip klă, đăo hiam”, “gum hrŏm hăng djuai ania”.

Pơhiăp amăng mông jơnum, yă Phạm Thị Phúc, Kơ-iăng Khua git gai Ping gah tơring čar, Khua Jơnum min djop djuai ania mơnuih mơnam dêh čar Việt Nam tơring čar rơkâo hơdôm gưl ping gah, gong gai lăng ba dong, hmư̆ lăng tơlơi pơmin, ngă gal brơi kơ bruă jơnum khul đăo. Hrŏm hăng anun, čang rơmang ƀing apăn bruă khul đăo ngă tui dong bruă mă mơ̆ng pô, gum hrŏm hơbit gong gai hăng mơnuih ƀôn sang, ngă klă bruă mơnuih mơnam, djru pơjing Lâm Đồng pơđĭ kyar kơjăp phik./.