Hơdor glăi 80 thun Hơkrŭ blan čơpăn, Hrơi akŏ pơdong kơnuk kơna lŏn ia lơ 2/9 laih anun 80 thun hrơi Gru grua kông an mơnuih ƀôn sang, mơmŏt lơ 25/8, ƀơi sang bruă kơnuk kơna, Khua dêh čar ơi Phạm Minh Chính jơnum bưp ƀô̆ mơta, bơni hơ-ơč hơdor tơngia kơ Khul khua mua pơtruh nao rai ƀing kông an djru tơdron blah ƀơi kual Dơnung.

Khua dêh čar lăi pơtong, Ping gah, kơnuk kơna, mơnuih ƀôn sang hơdor tơngia na nao tơlơi tuh drah pơčah asar prong prin hơdôm rơbâo čô mơnuih ngă khua, tơhan kông an, amăng anun giăm 1000 čô tơhan khin hơtai, ayăt mă krư̆ kơđol amăng sang mơnă, taih čom ruă nuă, ƀing djơ̆ jrao hret, rơka rơkač, ruă nuă pioh glăi gru nam amăng drơi jăn. Anun lĕ, tơlơi lăp pơ-ư ang pran jua khin hơtai, ƀing tuh rơyuh pran jua čơđeh asar, kah hăng kông ngăn ƀu thâo pơkă nua ôh kơ lŏn ia ta hăng ƀing tơhan kông an mơnuih ƀôn sang khin hơtai. Khua dêh čar rơkâo, djop ding jum, anom bruă, tơring čar khom đing nao kơ sang anŏ, djru ba mơnuih ngă hơkrŭ, boh nik ñu ƀing tơhan kông an nao djru tơlơi blah ngă ƀơi kual Dơnung dêh čar.