Mơguah lơ 26/8, ƀơi Hà Nội, Khua dêh čar ơi Phạm Minh Chính git gai Jơnum pơđut jơlan hơdră hăng bruă bơkơtưn “Dêh čar ta gum tơngan lŏm lui sang dŏ tơ̆i, sang phô̆”. Truh ră anai dêh čar ta hơmâo ruh hĭ, pơdong phrâo 334 rơbâo boh sang dŏ, pơhlôm ngă 3 mơta tơlơi kjăp; giăm 50 rơbâo klai hơmâo brơi nao amăng jơlan hơdră anai, amăng anun mrô prăk iâu pơthưr gum pơgôp hơmâo 24 rơbâo klai. Khua dêh čar hok mơ-ak lơ̆m Việt Nam hơmâo ngă giong laih bruă lŏm lui sang dŏ tơ̆i, phô̆ ƀơi abih bang anih amăng dêh čar, jing bruă dưi ngă prong biă, sit nik biă čơkă 80 thun Hrơi ngă hơkrŭ blan 8 truh kih, hrơi Akŏ pơdong kơnuk kơna lŏn ia lơ 2/9.

Khă hnun hai, tui hăng Khua dêh čar, anai kơnong kơ phun atur blung a đôč či dŏ hơđong - pơ anăp anai hơdôm ding jum, anom bruă kiăng hơmâo hơdră djru phara hloh dong đah mơ̆ng djru ba hơdôm boh sang anŏ anai hơđong bruă mă, gir truh thun 2030, Việt Nam ƀu hơmâo dong tah sang anŏ rin. Rơngiao kơ dŏ hơđong lĕ khŏm hơmâo bruă hơđong, djru ĕp brơi mă bruă, črâo brơi jơlan bơwih ƀong kơ mơnuih ƀôn sang./.