Hơdôm ring bruă, kual plơi prong dưi pơdŏng lu thun samơ̆ ƀu hmâo mơnuih dô̆. Lu ƀirô rơbêh, hơdôm ring bruă tuh pơplai kơ bruă hrŏm, pơdŏng hăng ngăn drăp kơnuk kơna lui lơi đôč... Tơlơi anai ƀu kơnong kơ ngă rơngiă đôč ngăn drăp ôh mơ̆, ñu dô̆ ngă tơdu trun pran đăo kơnang mơ̆ng mơnuih ƀôn sang pioh kơ khua git gai mơ̆ng Ping gah, tơlơi wai lăng mơ̆ng Kơnuk kơna dong.

Sa amăng hơdôm bôh than ba truh ngă bruă ngă tui pơkrem, pơgăn ngă khưi khai prăk mă yua ôh mơ̆ ñu dô̆ ngă hơdư̆ hĭ phun ñu lĕ yua kơ hơdră pơkă akă djơ̆ hăng tơlơi kiăng yua dong. Tơlơi phiăn ngă tui pơkrem, pơgăn ngă khưi khai akă sit nik nao djơ̆ bôh nik amăng tơlơi hơdip mơda rim hrơi yua kơ hơdôm tơlơi pơkă biă ñu ăt hmâo tơhnal tui tơlơi pơkă tơpă, kơƀăh hơdră khom gơgrong rơđah ba truh bôh tŭ yua ngă tui akă prong, lu ñu dô̆ hluai tui kơ tơlơi pơmin gơgrong mơ̆ng pô apăn akô̆ ƀirô, anom bruă, khul grŭp hăng mơ̆ng rim mơnuih apăn bruă, mơnuih mă bruă čar, rim mơnuih, sang anô̆. Ơi Hoàng Văn Cường, Ding kơna Jơnum min bơwih ƀong hăng prăk kak mơ̆ng Khua pơ ala mơnuih ƀôn sang lăi đĭ tơlơi gum pơhiăp:

"Bôh nik ñu lơm ƀing ta pok pơhai Tơlơi phiăn ngă tui pơkrem, pơgăn ngă khưi khai dô̆ ngă tui tŭ mơ̆ng hmâo, ngă tui djơ̆ hră pơ-ar đôč, lăi pơthâo kiăng kơ djơ̆ akô̆ tlôn ñu đôč. Ƀơi plơi pla, ƀơi ƀirô, ƀơi anom bruă rim sa kual hmâo hơdôm bôh than hơpă ngă khưi khai, hơdôm tơlơi hơget akă dưi ngă lĕ ngă tui thun dơi hmâo đing nao laih tơlơi anun lĕ akă hmâo ôh”.

Ƀơi anăp tơlơi anai, Jơnum min apăn bruă Khua pơ ala mơnuih ƀôn sang dêh čar hmâo tŭ ư laih lăi pơthâo kơ Khua pơ ala mơnuih ƀôn sang pel ĕp, pơplih pơkra abih bang Tơlơi phiăn pơkrem, pơgăn ngă khưi khai amăng Tal jơnum lok 10 pơ̆ anăp anai. Tơhnal ba tơbiă lĕ khom pơjing anih gru than kơđi čar djơ̆ phiăn abih bang, kơjăp phik kơ ngă tui pơkrem ƀơi djop gơnong bruă, djop bruă mă, djop mơnuih apăn bruă, mơnuih ping gah hăng mơnuih ƀôn sang, pơjing rai pơplih phun kơ anô̆ kơjăp amăng ngă tui pơkrem, pơgăn khưi khai. Tui hăng Khua pơ ala Bùi Hoài Sơn, Grŭp khua pơ ala kơ Khua pơ ala mơnuih ƀôn sang dêh čar ƀôn prong Hà Nội, kiăng hơdôm tơlơi pơkă amăng tơlơi phiăn ƀu kơnong kơ dŏng amăng hră pơ-ar kiăng hmâo hơdră pơkă pel ĕp, lăng tui kơjăp ôh:

“Khom hmâo akô̆ tlôn nao hrŏm bruă gơgrong, ăt kah hăng hơdôm bruă pel ĕp, lăng tui rơđah. Mơ̆ng anun, pơkĕ hrŏm bruă apah bơni hăng bruă pơsir hơdôm bruă ngă soh tơlơi phăn lăp djơ̆, tui hăng phiăn pơkă, rơđah mơnuih, rơđah bruă gơgrong. Abih bang hơdôm tơlơi anun khom dưi ngă tui hluh gah pioh pơjing rai sa anih anom dŏng yua kơ tơlơi juăt pơkrem, pơjing bôh thâo klă hiam pơkrem, ƀơi anun hơdôm jơlan gah pơsit tơlơi hơdip, bruă gơgrong pran jua ƀudah hơdôm bôh than pơkon nao truh bôh nik ñu”.

Hră čih Tơlơi phiăn pơkrem, pơgăn ngă khưi khai pơplih pơkra pơ̆ anăp anai dưi čang rơmang amra pơjing rai rơwang tơlơi phiăn rơđah, ba glăi bôh tơhnal, pơđĭ dlông tơlơi pơmin hăng bruă gơgrong mơ̆ng abih bang mơnuih mơnam amăng bruă pơkrem, pơgăn ngă khưi khai, ngă brơi lŏn ia anăp nao rơnuk phrâo pơđĭ kyar kơjăp phik./.