Amăng hơdôm mông bưp mơnuih ƀôn sang mơ̆ng khua pơ ala mơnuih ƀôn sang dêh čar ta ƀơi tơring čar Lâm Đồng, mơnuih ƀôn sang rơkâo khom pơpha gưl, pơpha bruă apăn rơđah rơđông kơplah wah tơring čar hăng să lơm ngă tui gong gai dua gưl, biă ñu pơhlôm tơlơi dưi pơsit hră pơ-ar mă yua lŏn kơ mơnuih ƀôn sang. Rơkâo pơđut mă yua kông ngăn glai klô hăng hơdră măi mok sô hơđăp ngă sat truh lŏn drŏn ayuh hyiăng; pel ĕp mă glăi lŏn pla kyâo akă mă yua, jao glăi kơ plơi pla, hăng đing nao tuh pơplai pơkra glăi jơlan nao rai, Tha plơi Liêng Jrong Ha Bri, ƀơi thôn 1, să Lạc Dương, tơring čar Lâm Đồng lăi nao:

“Lu neh ƀơi anai ăt kiăng hmâo hră pơ-ar lŏn mơn samơ̆ să ƀing ta ăt akă ngă tui ôh, rơkâo Khua pơ ala mơnuih ƀôn sang dêh čar ta tâ̆o hloh pel ĕp glăi hăng pơsir yua kơ anun lĕ tơlơi kiăng mơ̆ng neh wa. Tơlơi dong lĕ khom pel ĕp glăi gơnam ngă mă ča, ră anai kâo ƀuh leng kơ gơnam ngă mă ča, kơmok pruai ăt ngă ča mơn, kơphê ăt lĕ ngă mă ča mơn. Rơkâo Kơnuk kơna lăng tui kơjăp tơlơi anai kơ mơnuih ƀôn sang”.

Amăng mông bưp mơnuih ƀôn sang, khua pơ ala kơ gong gai plơi pla, hơdôm gơnong bruă bơdjơ̆ nao mơ̆ng tơring čar Lâm Đồng hmâo lăi pơthâo glăi, pơblang, tŭ mă hơdôm boh yôm gah tơlơi dưi pô. Hrŏm hăng anun grŭp Khua pơ ala mơnuih ƀôn sang dêh čar ăt ruah mă mơn tơlơi gum pơhiăp rơkâo đĭ mơ̆ng mơnuih ƀôn sang lăi pơthâo glăi kơ Khua pơ ala mơnuih ƀôn sang pel ĕp.

Jơnum bưp mơnuih ƀôn sang hơdôm anih anom gah Ngŏ tơring čar Dak Lak (tơring čar Phú Yên hơđăp) dưi hmâo Grŭp Khua pơ ala mơnuih ƀôn sang dêh čar tơring čar Dak Lak pơphun hăng hơdră ƀơi anăp ƀơi anih tô nao rai phun lĕ phường Tuy Hòa hăng tô nao rai lăng mơ̆ng ataih truh pơ̆ hơdôm anih anom gah hơdôm bôh să, phường: Đông Hòa, Sông Cầu, Tuy An Bắc, Phú Hòa 1, Tây Hòa, Sơn Hòa, Sông Hing hăng Đồng Xuân. Mơnuih ƀôn sang djă pioh pran jua gơgrong mơ̆ng Khua pơ ala mơnuih ƀôn sang dêh čar, hrŏm hăng anun pơdah pran jua čang rơmang Dak Lak tañ hmâo jơlan gah pơsit pơđĭ kyar phrâo tơdơi kơ pơmut hrŏm. Mơnuih ƀôn sang Võ Ngọc Hiền Minh, ƀơi phường Tuy Hòa, tơring čar Dak Lak brơi thâo:

“Tơring čar Dak Lak hơđăp ăt djă jă mơn gru grua bôh thâo Dap Kơdư bă mơta lăng, lơm anun Phú Yên lĕ kual kơtuai hang ia rơsĭ Tŏng Krah dêh čar phara ha jăn. Bruă pơmut hrŏm, pơhrua nao rai bôh thâo kơplah wah ia rơsĭ hăng glai klô amra pok tơbiă anô̆ gal pơđĭ kyar prong kơ tơring čar Dak Lak phrâo. Čang rơmang gong gai hơdôm gưl đing nao, črâo ba hmao tlôn pioh pơjing tơring čar jai hrơi jai pơdrŏng asah klă hiam, tơlơi hơdip mơda mơnuih ƀôn sang jai hrơi jai klă hloh”.

Lơm anun, mơnuih ƀôn sang ƀơi hơdôm bôh să gah Yŭ tơring čar Dak Lak pơdah pran jua dŏng yua hơdră gong gai 2 gưl dưi mă yua mơ̆ng akô̆ blan 7 truh ră anai. Mơnuih ƀôn sang rơkâo khom kơtưn ngăn rơnoh, pơphun pơhrăm pơđĭ dlông bôh thâo kơ mơnuih apăn bruă; tuh pơplai kơ anih anom mă yua, măi mok pioh kơ bruă git gai, wai lăng pioh pơhlôm ba glăi bôh tơhnal hăng bĕ rơgao hơnong bruă kơ gưl să, biă ñu bruă wai lăng lŏn drŏn tơdơi kơ ngă tui hơdră gong gai plơi pla dua gưl.

Pơhiăp amăng mông bưp, yă Nguyễn Thị Thu Nguyệt, Kơ-iăng Khua grŭp Khua pơ ala mơnuih ƀôn sang dêh čar tơring čar Dak Lak rơkâo hơdôm gưl gong gai mơ̆ng tơring čar truh pơ̆ să ngă tui tơpă dong hơdôm tơlơi pơtrun pơsit mơ̆ng dêh čar, biă ñu tơlơi pơtrun pơsit kơ dưm dăp pơphun bruă mă, mơ̆ng anun pơsir lăp djơ̆ bôh tŭ yua kơ anom bơwih ƀong hăng mơnuih ƀôn sang.

“Rơkâo Jơnum min mơnuih ƀôn sang tơring čar Dak Lak pel ĕp glăi dong, ba tơbiă hơdôm jơlan gah pơsir rơđah pioh ngă giong tơhnal ba tơbiă pơđĭ kyar 8% tui tơlơi črâo ba mơ̆ng Gong gai dêh čar truh thun 2025, hrŏm hăng anun hrưn đĭ dưi ngă djơ̆ rơnoh đĭ kyar 2 mrô amăng rơwang tô̆ tui. Kiăng dưi ngă tơlơi anai, rơkâo ba tơbiă lĕ khom hơđong bruă čar, hăng pơpha gưl , pơpha bruă apăn rơđah rah, khut khăt, jao bruă gơgrong rơđah kơ plơi pla, pơhlôm hơdôm tơhnal ba tơbiă pơđĭ kyar kơjăp phik hăng djơ̆ tơlơi dưi”.

Amăng tơlơi tơpă, djơ̆ hăng akô̆ pơjing, Jơnum bưp mơnuih ƀôn sang mơ̆ng hơdôm grŭp Khua pơ ala mơnuih ƀôn sang dêh čar tơring čar Dak Lak hăng Lâm Đồng ba glăi gru nam klă. Ƀing Khua pơ ala mơnuih ƀôn sang dêh čar; khua pơ ala plơi pla hăng hơdôm gơnong bruă hmâo djă pioh laih, pơblang lu bôh yôm phun; pơtŏng sit amra hmư̆ dong hăng gum hrŏm mơnuih ƀôn sang lơm pơdŏng plơi pla pơđĭ kyar tañ, kơjăp phik./.