Tơdơi kơ anih phun ngă bruă kơnuk kơna tơring čar Gia Lai glăi pơ Quy Nhơn, hơdôm rơtuh čô khua apăn bruă, mơnuih ngă bruă kơnuk kơna mơ̆ng Plei Ku nao mă bruă pơ anih phrâo, bưp ƀu ƀiă ôh tơlơi tơnap tap amăng tơlơi hơdip mơda. Kiăng djru ba, Gơnong bruă Man pơdong tơring čar Gia Lai lăi pơthâo pơphun brơi rơdêh pơgiăng ƀing apăn bruă čar mơ̆ng Plei Ku nao pơ Quy Nhơn hăng pơwơ̆t, mơ̆ng 3 mông mơguah mơnŭ tơdjô̆ rim hrơi. Ră anai hơmâo năng ai 400 čô khua mua, mơnuih apăn bruă, mơnuih mă bruă apah kơ kơnuk kơna khom nao rai 160 km dưi truh pơ anih mă bruă phrâo.

Kiăng pơsir hơđong sui thun pơ anăp adih, tơring čar Gia Lai pơtrut kơtang brơi pok pơhai lu akŏ bruă sang dŏ djru mơnuih tơnap kiăng djru ba anih dŏ hơđong kơ ƀing apăn bruă čar hơđong pran jua mă bruă. Him lăng truh thun 2026, tơring čar amra hơmâo dơ̆ng 5000 boh sang djru mơnuih tơnap hăng 500 boh sang brơi kơ mơnuih ngă bruă čar dŏ jăng jai. Anai lĕ sa tơlơi gir run mơ̆ng gong gai kơnuk kơna kiăng pơhlom brơi anŏ gêh găl bruă mă hăng anih dŏ kơ abih bang khua mua, mơnuih apăn bruă čar hăng mơnuih mă bruă apah dưi hơđong pran jua hăng pơđĭ kyar tơlơi hơdip mơda ƀơi anih mă bruă phrâo.